Llapan kanqanman ëwari

Qateqnin kaqman ëwë

Jehoväpa testïgunkuna

Quechua (Ancash)

Jehoväpa Testïgunkunata Pushaqkunapa cartan (2017)

Jehoväpa Testïgunkunata Pushaqkunapa cartan (2017)

Kuyashqa wawqikuna y panikuna:

Diospa willakoqnin Ezequiel suëñïninchönö alläpa espantëpaqta rikanqampitaqa, ishkë waranqa joqta pachak (2.600) watakunanönam pasarishqa. Pëqa Ciëluchö y Patsachö Autoridäyoq mëtsikan jatun cärrunta controlëkaqtam rikarqan. Peru ciëluchö tsë cärrupa mas espantakïpaqqa karqan, räyu tillapyaqnöraq ras ëwanqanmi, jina juk läduman ëwarpis manam ni ichikllapis pärareqtsu ni tumaqtsu (Ezeq. 1:4, 9, 12, 14, 16-27).

Suëñïninchönö Ezequiel rikanqanqa, ¿imatataq yarpätsimantsik? Ciëluchö Jehoväpa markan mana jamanqantam. ¿Y imanötaq patsachö markanqa këkan? Patsachö markampis imëkata rurar këkänampaq Jehovä yanapëkanqanqa rikakun, pasaq watachö Diosta sirwinqantsikchö imëkata logranqantsikkunam.

Estädus Unïdus nacionchöqa, Betel wayichö mëtsikaq yanapakoqkunam Brooklyn markapita Warwick (Nueva York) markachö këkaq mushoq principal oficïnaman o Betelpa juk edificiunkunaman llapan cösasninkunata apapakïkäyashqa. Y wakinkunataqa juk läduchö yanapakuyänampaqmi mandayashqa. Juk nacionkunachöqa, juk nacionllapitana sucursal juk nacionkunata rikänampaqmi Betel wayikunata rurëchö, altsëchö y apapakïchö yanapakuyashqa o wakinkunaqa juk lädutam ëwakuyashqa. Pëkunanö wakinnikikuna juk läduta täraq mana ëwakuyashqa kayaptikipis, Diospa kaqchöqa mëtsika rurëyoqchi kayarqunki.

Jehoväpa markan avanzanqanmannö entëru Patsachö cristiänukuna imëkata rurar këkäyanqampitaqa, Jehoväpa Testïgunkunata Pushaqkunataqa alläpam kushitsin y kallpatam qon. Mas yachatsikoqkunata wanayanqan sitiukunaman wakinnikikuna yanapakoq ëwayanqëkita musyayämi. Wakinkunanam juk idiömachö yachatsikuyänampaq churapakäyashqa o Diospa markan juknöpana yachatsikunapaq ninqannö yachatsikur qallayashqa. Y wakinnam Diosta sirwiyanqanchö masta rurayänampaq juk rurëkunata rurayashqa. Jina, Jehoväta llapan sirweqkunam, edäna kar o qeshyëkarpis, Jehoväta sirwiyanqanchö imëkata rurar y Satanas ulikoq kanqanta rikätsikïta munar, kawëman chätsikoq carrërachö alli tsarakur ëqikäyan (1 Cor. 9:24).

Munënikikunata juk kuchuman churëkur tsë llapanta rurayanqëkipitaqa Jehoväqa alläpam kushikun (Heb. 6:10). Pensënikikunaqa Abrahanpa y Särapa pensëninkunanömi. Setenta (70) watapitapis masyoqna këkarmi, pëqa caldëachö këkaq Ur markapita alläpa karu Canaan markaman familianwan ëwakunampaq listu këkarqan. Tsëchöqa pachak watapam (100) hasta wanunqanyaq carpa wayikunallachö tärarqan. Abrahanwan kuyashqa warmin Säraqa juk kuchumanmi munëninkunata  churariyarqan (Gen. 11:31; Hëch. 7:2, 3).

Pensënintsik pëkunapa pensëninnölla kanqanta o mana kanqanta kikintsikta tapukunantsikqa alläpa allim kanman. Awmi, kë ushanan junaqkunachö alli tsarakoqqa, noqantsikpita Jesus shuyaranqantam cumplikan. Pëmi këta mandakurqan: “Tsëqa, ëwayë y qatimaqnïkuna tikrayänampaq llapan nacionkunapita nunakunata yachatsiyë, Teytapa, Tsuripa y santu espïritupa jutinchö bautizatsirnin” (Mat. 28:19).

“Ëwayë” nirqa, Diospa kaqchö imëka rurapakïkunayoq këkänapaqmi nikarqan. ¡Y alläpa kushishqam sientikuntsik pasaq wata tsënö rurarnin Cristupa qateqninkuna imëkata lograshqa kanqantsikpita! Entëru Patsaman Diospa gobiernumpita alli noticiakuna chänampaq Jehovä bendicikämunqanqa alleq clärum rikakun, pëqa puëdeq këninwanmi kë rurëchö yanapëkämantsik (Mar. 13:10).

Willakïkanqantsik willakïkunataqa mëtsikaq nunakunam chaskikïkäyan. Pasaq wataqa Diospita yachatsikoqkuna karquntsik 8.340.847 y cada killam 10.115.264 nunakunata Bibliapita yachatsirquntsik. Clärum këkan, ciëluchö Jehoväpa cärrunqa manam pärantsu, ¡y qamkunapis manam jamayankitsu! Salvacionta tarinapaq punkuta Jehovä wichqarkunampaqqa alläpa wallka tiempullanam pishin, tsëyaqqa kë precisaq rurëta rurarnin siguikäyëlla.

¡2017 watapaq textuchöqa alläpa shumaq yarpätsikïtam tarintsik! Kënömi nin: “Jehoväman markäkï y alli kaqta rurë” (Sal. 37:3). Kë textu ninqanta wiyakurnin y Jehoväta sirwirnin alli kaqta rurarqa, pëman markäkunqantsiktam rikätsikuntsik. Y japallantsik mana këkanqantsiktam yarpänantsik, porqui Jesusmi këta änimashqantsik: “¡Rikäyë!, llapan junaqkunam qamkunawan këkäshaq imëkapis imanö këkanqampa ushëninyaq” (Mat. 28:20). ¿Manatsuraq pëqa änikunqanta cumplinqa?

Yarpäshun: Jehoväqa pëpaq ruranqantsikkunata bendicikämunqallam. Atskata rurashqa o wallkallata rurashqapis, masqa precisan llapan puëdinqantsikmannö y shonqupita patsë ruranqantsikmi. Tsënö rurashqaqa shonquntam kushitsishun (2 Cor. 9:6, 7). Tsëqa, kuyashqa Teytantsikta mañakurnin, Palabranta estudiarnin y kushi kushilla Diospita yachatsikurnin sïguikäshun. Tsënöpam, pëwan amïgu kënintsikqa masraq sinchiyanqa.

Satanasqa ‘wallka tiempullana karinantam musyan’, tsëmi Jehoväta jaqirinapaq imëkata ruran (Rev. 12:12). Kë alläpa mana alli contrakoqqa Jehoväta jaqirinapaqmi imëkata rurarnin sïguinqa. Peru Jehoväpa lädunchö imëpis kashqaqa, Diabluqa manam tsëta logranqatsu (Sal. 16:8). Ama qonqayëtsu alläpa kuyayanqaqta y kë ushanan junaqkunachö Diospa gobiernumpa kaqkunata cuidëchö yanapayämanqëkipita alläpa agradecikuyanqaqta.

Wawqikikuna y turikikuna,

Jehoväpa Testïgunkunata Pushaqkuna