Llapan kanqanman ëwari

Qallananchö tïtulukunaman ëwë

Jehoväpa testïgunkuna

Idiömata akrë Quechua (Ancash)

Revelacion 9:1-21

IMAKUNA KANQAN

  • Pitsqa kaq trompëta (1-11)

  • Punta kaq allaw pasarin, ishkë mas shamun (12)

  • Joqta kaq trompëta (13-21)

9  Pitsqa kaq angelmi trompëtanta tocarqan. Y ciëlupita patsaman shikwashqa qoyllurtam rikärirqä, y pëtam wanwanyarëkaq* uchkupa* llävinta qoyarqan.  Pëmi wanwanyarëkaq uchkuta* kicharirqan, y tsë uchkupitam* imëka juk jatun hornupita yarqoq qoyënö qoyë* witsämurqan, y intitam* ampïratsirqan,* jina vientutapis, tsë uchkupita* yarqamoq qoyë.  Y tsë qoyëpitam pinteq kurukuna* patsaman yarqayämurqan, y autoridätam chaskiyarqan, patsachö atoq kurukuna katsiyanqan autoridätanö.  Y ni patsachö këkaq qorakunata, ni ima verdiraq plantata ni ima montita mana imanayänampaqmi pëkunata niyarqan, sinöqa urkunkunachö Diospa sëllunta mana katseq kaq nunakunallata.  Y tsë pinteq kurukunaqa autoridäta chaskiyarqan, manam wanutsiyänampaqtsu, sinöqa pitsqa killapa sufritsiyänampaqmi, y tsë sufritsikïninkunaqa imëka atoq kuru nunata kaniptin sufrimientunömi karqan.  Tsë junaqkunaqa wanïtam nunakuna ashiyanqa, peru manam ni imanöpapis tariyanqatsu, y wanïtam alläpa munayanqa, peru wanïqa pëkunapita escapakunqam.*  Y rikëninkunachöqa, tsë pinteq kurukunaqa imëka guërrapaq listu këkaq bestiakuna niraqmi kayarqan; y peqankunachöqa* imëka örupita corönanömi kayäpurqan, y qaqllankunaqa imëka nunakunapa qaqllankunanömi karqan,  peru aqtsankunaqa imëka warmipa aqtsannömi karqan. Y kirunkunaqa imëka leonkunapa kirunkunanömi karqan,  y qasqu* tsapaq fiërrupita chalëkunömi chalëkunkuna kayäpurqan. Y älankuna sapapanqanqa imëka guërraman ras ëwaq bestiakuna sutayanqan carrëtakuna büllaqnömi karqan. 10  Jina atoq kurukunapanömi chuksikoq chupankuna kayäpun, y nunakunata pitsqa killapa sufritsiyänampaq autoridäninkunam chupankunachö këkan. 11  Juk reyninkunam kayäpun, wanwanyarëkaq* uchkupa angelnin. Hebreu idiömachöqa Abadonmi* jutin, peru griëgu idiömachöqa Apolionmi* jutin. 12  Punta kaq allawqa pasarishqanam. ¡Rikäyë! Ishkë mas allawkunaran tsëpita shayämun. 13  Joqta kaq angelmi trompëtanta tocarqan. Y Diospa nöpanchö këkaq örupita rurashqa altarpa waqrankunapitam juk parlëta wiyarqä, 14  trompëta katseq joqta kaq angelta kënö neqta: “Precisaq Eufratis mayupa lädunchö watarëkaq chuskun angelkunata paskë”. 15  Tsënam, patsätsishqa hörapaq, junaqpaq, killapaq y watapaq alistashqa kaq chuskun angelkuna paskashqa kayarqan nunakunapita kima* kaq partita wanutsiyänampaq. 16  Bestian montashqa tröpakuna ëkaq kayanqanqa karqan ishkë chunka waranqa (20.000) kuti chunka waranqam (10.000);* noqam pëkuna ëkaq kayanqanta wiyarqä. 17  Y suëñuchönö* rikanqä bestiakuna y tsë bestiakunata montaraqkunaqa kënömi kayarqan: qasqunkuna tsapaq chalëkunkunaqa ninanö puka, jacintunö azul y azufrinö qallwashmi karqan, y bestiakunapa peqankunaqa imëka leonkunapa peqankunanömi karqan, y shiminkunapitam nina, qoyë y azufri yarqurqan. 18  Kë kiman castïgukunawanmi nunakunapita kima kaq parti wanuyarqan, shiminkunapita yarqoq ninawan, qoyëwan y azufriwan. 19  Porqui bestiakunapa autoridäninkunaqa shiminkunachö y chupankunachömi këkan, porqui chupankunaqa imëka culebranömi, y peqayoqmi kayan, y tsëkunawanmi nunakunata sufritsiyan. 20  Peru tsë castïgukunawan mana wanoq wakin kaq nunakunaqa, manam makinkunawan rurayanqankunapita arrepentikuyarqantsu; manam supëkunata, ni örupita, pläta metalpita, cobripita, rumipita y qerupita rurashqa imäginkunata adorëta jaqiyarqantsu, tsëkunaqa manam rikëta, ni wiyëta ni purita puëdiyantsu. 21  Y manam wanutsikuyanqampita, ni brujerïa rurëninkunapita, ni rakcha rurëninkunapita* ni suwakuyanqankunapita arrepentikuyarqantsu.

Päginapa ura kuchunchö willakïkuna

Kënöpis niyanmi: mankaraykaq; äpa.
O: “pözupa”.
O: “pözuta”.
O: “pözupitam”.
Kënöpis niyanmi: qoshninö qoshni.
Kënöpis niyanmi: rupaytam.
Kënöpis niyanmi: tsakäratsirqan; tutapäratsirqan.
O: “pözupita”.
Kënöpis niyanmi: chukllushkuna; pinteqshakuna; chichigällukuna; wallpakurukuna.
Kënöpis niyanmi: qeshpinqam; safakunqam.
Kënöpis niyanmi: umankunachöqa.
Kënöpis niyanmi: pëchu.
Kënöpis niyanmi: mankaraykaq; äpa.
Tsëqa, “Ushakë” ninanmi.
Tsëqa, “Ushakätsikoq” ninanmi.
Kënöpis niyanmi: kimsa.
Juk parlakïchöqa, ishkë pachak millon (200.000.000).
Kënöpis niyanmi: visionchö.
Griëgu idiömachö: por·nëi·a. Rikäri “Käyitsikïkuna” nishqanta.