Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Këchö Biblia | TRADUCCIÓN DEL NUEVO MUNDO DE LAS SANTAS ESCRITURAS

Revelacion 7:1-17

IMAKUNA KANQAN

  • Ushakätsikoq vientunkunata chusku angelkuna tsaparäyan (1-3)

  • Juk pachak chusku chunka chusku waranqa (144.000) sellashqakuna (4-8)

  • Largu yulaq röpakunawan vistishqa mëtsikaq nunakuna (9-17)

7  Tsëpitanam patsapa chuskun esquïnankunachö chusku angelkunata shëkaqta rikärirqä, patsapa chuskun lädunkunapita shamoq vientunkunata tsaparëkaqta, tsënöpa ni ima vientupis patsaman, ni lamarman ni ima montiman* mana pükanampaq.  Y juk angeltam rikärirqä inti* yarqamunan lädupita* witsëkämoqta, kawëkaq Diospa sëllunta tsarashqa; y patsata y lamarta ushakätsiyänampaq autoridäta chaskishqa chuskun angelkunatam sinchipa qayarqan,  y kënömi nirqan: “Ama patsata ni lamarta ni montikunata imanayëtsu, Diosnintsikpa sirweqninkunata urkunkunachö sellar ushayanqäyaq”.  Y ëkaq sellashqa kayanqantam wiyarirqä, Israelpa tsurinkunapa llapan kastankunapita pachak chusku chunka chusku waranqa (144.000) sellashqakuna kayanqanta:  Judä kastapita, chunka ishkë waranqa (12.000) sellashqakuna; Ruben kastapita, chunka ishkë waranqa (12.000); Gad kastapita, chunka ishkë waranqa (12.000);  Aser kastapita, chunka ishkë waranqa (12.000); Neftalï kastapita, chunka ishkë waranqa (12.000); Manases kastapita, chunka ishkë waranqa (12.000);  Simeon kastapita, chunka ishkë waranqa (12.000); Levï kastapita, chunka ishkë waranqa (12.000); Isacar kastapita, chunka ishkë waranqa (12.000);  Zabulon kastapita, chunka ishkë waranqa (12.000); Josë kastapita, chunka ishkë waranqa (12.000); Benjamin kastapita, chunka ishkë waranqa (12.000) sellashqakuna.  Tsëpitanam rikärirqä, y ¡rikäyë!, mëtsikaq nunakuna, ni pï nunapis yupëta mana puëdinqan, llapan nacionkunapita, kastakunapita, markakunapita y idiömakunapita, gobernar täkunapa y Achkaspa* nöpanchö shëkäyaqta, largu yulaq röpakunawan vistishqa; y palmërapa rämankunatam makinkunachö këkätsiyarqan. 10  Y sinchipa qaparirmi kënö nir sïguiyan: “Salvacionqa Diosnintsikpitam shamun, gobernar täkunachö tëkaqpita, y Achkaspita”. 11  Llapan angelkunam gobernar täkunapa, gobernaqkunapa y chuskun querubinkunapa jiruroqninchö* shëkäyarqan, y gobernar täkunapa nöpanchömi qonqurikur puktiyarqan y Diosta adorayarqan, 12  kënö nirnin: “¡Tsënö katsun!* Alabashqa kë, alläpa precisaqpaq churashqa kë, yachëyoq kë, agradecishqa kë, respetashqa kë, poderyoq kë y kallpayoq kë Diosnintsikpa imëyaqpis katsun. Tsënö katsun”.* 13  Tsënam gobernaqkunapita juknin kaq kënö nimarqan: “Largu yulaq röpayoq vistishqakunaqa, ¿pikunataq kayan, y mëpitataq shayämushqa?”. 14  Tsënam jinan höra kënö nirqä: “Señorllä, qammi tsëtaqa musyanki”. Y pënam kënö nimarqan: “Këkunaqa alläpa jatun sufrimientukunapita yarqamushqa kaqkunam kayan, y Achkaspa yawarninchömi largu röpankunata taqshayashqa y yulaqyätsiyashqa. 15  Tsëmi Diospa gobernar täkunampa nöpanchö këkäyan, y templunchömi paqasta junaqta sagrädu rurëta pëpaq rurëkäyan; y gobernar täkunachö tëkaq Kaqmi carpa wayinta pëkunaman mashtanqa. 16  Mananam mallaqäyanqanatsu ni yakunäyanqanatsu, y manam ni intipis* ni ima alläpa achachëpis pëkunata rupanqanatsu. 17  Porqui gobernar täkunapa chowpinchö këkaq Achkasmi pëkunata mitsinqa, y kawëta qokoq yakuyoq pukyukunamanmi* pushanqa. Y Diosmi llapan weqinkunata pëkunapa nawinkunapita pitsanqa”.

Päginapa ura kuchunchö willakïkuna

Kënöpis niyanmi: jachaman.
Kënöpis niyanmi: rupay.
O: “esti kaq lädupita”.
Kënöpis niyanmi: Ashkashpa.
Kënöpis niyanmi: entëru kuchunkunachö.
O: “amen”.
O: “amen”.
Kënöpis niyanmi: rupaypis.
O: “pashtaq yakukunamanmi”.