Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Këchö Biblia | TRADUCCIÓN DEL NUEVO MUNDO DE LAS SANTAS ESCRITURAS

Revelacion 6:1-17

IMAKUNA KANQAN

  • Qallanan joqta sëllukunata Achkas kichan (1-17)

    • Yulaq bestian montashqa venceq (1, 2)

    • Nina color bestiata montaraq patsapita yamë këta ushakätsinqa (3, 4)

    • Yana bestiata montaraq mallaqëta apamunqa (5, 6)

    • Oqi color bestiata montaraqpa Wanï jutin (7, 8)

    • Altar jawanchö këkaq mana ankupashpa wanutsishqakuna (9-11)

    • Patsa feyupa kuyun (12-17)

6  Y qanchis sëllukunapita juk kaq sëlluta Achkas kichaqtam rikarqä, y imëka räyu janraraqnö* parlarnin chuskun querubinkunapita juknin kaq querubintam kënö neqta wiyarqä: “¡Shamï!”.  Y rikärirqämi, y ¡rikäyë!, juk yulaq bestia, y tsëta montarëkaqqa makinchömi juk flechana arcuta këkätsirqan, y juk corönatam qoyarqan, y vencirmi yarqurqan, vencir ushanampaq.  Ishkë kaq sëlluta kichariptinnam, ishkë kaq querubinta kënö neqta wiyarqä: “¡Shamï!”.  Jukmi yarqaramurqan, nina color bestia, y tsëta montarëkaqqa mana ankupänakushpa* wanutsinakuyänampaqmi patsapita yamë këta ushakäratsinampaq autoridäta chaskirqan, y juk jatun espädatam chaskirqan.  Kima* kaq sëlluta kichariptinnam, kima kaq querubinta kënö neqta wiyarqä: “¡Shamï!”. Y rikärirqämi, y ¡rikäyë!, juk yana bestia, y tsëta montarëkaqqa juk balanzatam makinchö katsirqan.  Y chuskun querubinkunapa chowpinkunapitam kënö nir parlaqnö wiyakarqan: “Juk kïlu* trïguta juk denariuchö,* y kima kïlu* cebädata juk denariuchö; y ama olïva aceitita ni vïnuta lluta ushëtsu”.  Chusku kaq sëlluta kichariptinnam, chusku kaq querubinta kënö neqta wiyarqä: “¡Shamï!”.  Y rikärirqämi, y ¡rikäyë!, juk oqi color bestia, y tsëta montarëkaqqa Wanï jutiyoqmi karqan, y qepan qepantam Sepultüra* qatirnin shamïkarqan. Y autoridätam chaskirqan juk jatun espädawan, mallaqëwan, wanutsikoq qeshyawan y patsachö chukaru animalkunawan patsachö kaqkunapita chusku kaq partita wanutsinampaq.  Pitsqa kaq sëlluta kichariptinnam, Diospa palabranrëkur y yachatsikur kayanqampita mana ankupashpa* wanutsiyanqan kaqkunapa almankunata* altar jawanchö këkaqta rikärirqä. 10  Y sinchipam kënö nikäyarqan: “¿Imëyaqtaq Llapanta Gobernaq Señor, santu y rasumpa kaq, patsachö täraqkunata mana juzgashpa y yawarnïkunapita mana vengakushpa kanki?”. 11  Y cada ünutam qoyarqan juk largu yulaq röpata, y wallka tiempullapana shuyäriyänampaqmi niyarqan, hasta sirwipakoq mayinkuna ëkaq kayänampaq kaq y ichikllachöna pëkunanölla wanuyänampaq këkaq wawqinkuna* completashqa kayanqanyaq. 12  Y joqta kaq sëlluta kichariptinnam rikärirqä, y patsam feyupa kuyurqan; y intiqa,* aqtsapita* rurashqa qachqa tëlanömi* yana tikrarirqan, y entëru killam yawarnö tikrarirqan, 13  y ciëluchö qoyllurkunam patsaman shikwariyarqan imëka hïgus montita feyupa vientu kuyutsiptin manaraq poqushqa hïgusninkuna shikwareqnö. 14  Y ciëluqa imëka röllunömi ëllukärirqan y illaririrqan,* y llapan jirkakuna y llapan islakunam* sitiunkunapita kuyutsishqa kayarqan. 15  Tsënam patsachö reykuna, precisaq carguyoq nunakuna, soldädukunapa comandantinkuna, kapoqyoq* kaqkuna, puëdeq kaqkuna, llapan sirwipakoq kaqkuna y llapan libri nunakuna machëkunaman y jirkakunachö qaqakunaman ratakuyarqan.* 16  Y jirkakunata y qaqakunatam kënö nir sïguiyan: “Tsapëkayämë y pakëkayämë gobernar täkunachö tëkaq Kaqpa rikënimpita y Achkaspa* piñakïnimpita,* 17  porqui pëkunapa alläpa jatun piñakïninkuna junaqmi chämushqa, y ¿pitaq shëkar këta puëdin?”.

Päginapa ura kuchunchö willakïkuna

Kënöpis niyanmi: kumruroqnö.
Kënöpis niyanmi: llakipänakuypa.
Kënöpis niyanmi: kimsa.
O: “litru”.
Tsëqa, pläta metalpita romänu qellëmi karqan, y tsëtaqa juk junaq trabäjupitam chaskiyaq. Rikäri “Käyitsikïkuna” nishqanta.
O: “litru”.
O: “Hädes”. Tsënö nirqa, llapan wanushqakuna këkäyanqan sepultürapaqmi parlëkan. Rikäri “Käyitsikïkuna” nishqanta.
Kënöpis niyanmi: mana kuyapaypa.
Clärum këkan tsënö nirqa altarchö ramayanqan yawarninkunapaq parlëkanqan. Rikäri “Käyitsikïkuna” nishqanta.
Höraqa ollqupaq y warmipaq parlarmi Bibliaqa “wawqikuna” nin.
Kënöpis niyanmi: rupayqa.
Itsapis chiwapa aqtsampita karqan.
Rikäri “Käyitsikïkuna” nishqanchö “Qachqa tëla” neqta.
Kënöpis niyanmi: illakäriyarqan.
Rikäri “Käyitsikïkuna” nishqanta.
Kënöpis niyanmi: rïcu.
Kënöpis niyanmi: tsinkakuyarqan.
Kënöpis niyanmi: ashkashpa.
Kënöpis niyanmi: ajanaynimpita.