Llapan kanqanman ëwari

Qallananchö tïtulukunaman ëwë

Jehoväpa testïgunkuna

Idiömata akrë Quechua (Ancash)

Revelacion 4:1-11

IMAKUNA KANQAN

  • Ciëluchö Jehovä imanö këkanqan (1-11)

    • Gobernar täkunachö Jehovä tëkanqan (2)

    • Gobernar täkunakunachö ishkë chunka chusku (24) gobernaqkuna (4)

    • Chusku querubinkuna (6)

4  Tsëpitanam rikëkurqä, y ¡rikäyë!, ciëluchömi juk punku kicharëkarqan, y parlapämaptin puntata wiyanqä kaq parlëqa imëka trompëta waqaqnömi wiyakarqan, y kënömi nirqan: “Këman witsämï, y pasakunampaq kaqkunatam rikätsishqëki”.  Tsëpitanam, santu espïritupa poderninchö jinan höra rikakurirqä, y ¡rikäyë!, ciëluchömi juk gobernar täkuna këkarqan, y tsë gobernar täkunachömi juk tëkarqan.  Y tsëchö tëkaqpa rikëninqa imëka jaspi ruminö y cornalina ruminömi* karqan, y tsë gobernar täkunapa entëru jiruroqninchömi* esmeralda niraq turmanyë këkarqan.  Tsë gobernar täkunapa entëru jiruroqninchömi ishkë chunka chusku (24) gobernar täkunakuna këkarqan, y tsë gobernar täkunakunachömi rikarqä yulaq röpawan vistishqa y peqankunachö* örupita corönayoq ishkë chunka chusku (24) gobernaqkuna tëkaqta.  Tsë gobernar täkunapitam yarqoq tillapyëkuna,* parlëkuna y janrarëkuna;* y tsë gobernar täkunapa nöpanchömi qanchis jatun chiwchikuna rawrëkäyan, y tsëkunaqa Diospa qanchis espïritunkunatam rikätsikun.  Gobernar täkunapa nöpanchömi imëka vidriunö lamar këkarqan, imëka cristalnö. Gobernar täkunapa chowpinchö* y tsë gobernar täkunapa entëru jiruroqninchömi* chusku querubinkuna këkäyarqan, puntampa y qepampa junta nawikunayoq.  Punta kaq querubinqa imëka leon niraqmi karqan, y ishkë kaq querubinqa imëka töru niraqmi karqan, y kima* kaq querubinqa nunapanö qaqllayoqmi karqan, y chusku kaq querubinqa volëkaq äguila niraqmi karqan.  Tsë chuskun querubinkunaqa, cada ünum joqta älakunayoq kayarqan; tsë älakunaqa entëru janampa y rurimpam mëtsika nawiyoq kayarqan. Y mana jaqitam, paqasta junaqta kënö niyan: “Santu, santu, santum Jehovä* Diosqa, Llapanta Puëdeq kaq, kashqa kaq y këkaq kaq y shamoq kaq”.  Gobernar täkunachö tëkaq Kaqta, imëyaqpis kawaq Kaqta, tsë querubinkuna cada alläpa precisaqpaq churayaptin, respetayaptin y agradecikuyaptinmi, 10  ishkë chunka chusku (24) gobernaqkuna, gobernar täkunachö tëkaqpa nöpanchö qonqurikuyan y imëyaqpis kawaq Kaqta adorayan, y corönankunatam gobernar täkunapa nöpanchö jitayan, y kënömi niyan: 11  “Diosnïkuna Jehovä,* qamllam derëchuyoq kanki alläpa precisaqpaq churayäshunëkipaq, respetayäshunëkipaq, y poderyoq kanëkipaq, porqui qammi llapan imëkakunata kamarqëki, y qampa munënikirëkurmi yuriyarqan y kamashqa kayarqan”.

Päginapa ura kuchunchö willakïkuna

O: “puka color alläpa shumaq ruminömi”.
Kënöpis niyanmi: entëru kuchunchömi.
Kënöpis niyanmi: umankunachö.
Kënöpis niyanmi: illaqukuna.
Kënöpis niyanmi: kumruruykuna.
O: “chowpichö gobernar täkunawan juntu”.
Kënöpis niyanmi: entëru kuchunchömi.
Kënöpis niyanmi: kimsa.
Rikäri “Käyitsikïkuna” nishqanta.
Rikäri “Käyitsikïkuna” nishqanta.