Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Këchö Biblia | TRADUCCIÓN DEL NUEVO MUNDO DE LAS SANTAS ESCRITURAS

Revelacion 21:1-27

IMAKUNA KANQAN

  • Juk mushoq ciëlu y juk mushoq patsa (1-8)

    • Wanïqa mananam kanqanatsu (4)

    • Llapan imëkakunata mushoqta ruran (5)

  • Mushoq Jerusalen imanö kanqan (9-27)

21  Y juk mushoq ciëluta y juk mushoq patsatam rikärirqä, porqui unë kaq ciëlu y unë kaq patsaqa pasashqanam kayarqan, y lamarqa mananam kannatsu.  Jina santu markatam rikärirqä, Mushoq Jerusalenta, Diospita patsë ciëlupita urëkämoqta, imëka adornashqa novianö qowan* kanampaq kaqpaq alistashqata.  Tsënam gobernar täkunapita* patsë juk parlë sinchipa kënö neqta wiyarqä: “¡Rikë! Diospa carpa wayinmi nunakunawan këkan, pëmi pëkunawan täranqa, y pëkunam markan kayanqa. Y kikin Diosmi pëkunawan këkanqa.  Y nawinkunapitam llapan weqita pitsanqa, y wanïqa mananam masqa kanqanatsu, ni manam alläpa llakikï ni waqakï ni nanatsikï kanqanatsu. Unë kaq cösaskunaqa pasarishqanam”.  Y gobernar täkunachö tëkaq Kaqmi kënö nirqan: “¡Rikë!, llapan imëkakunatam mushoqta rurashaq”. Jina kënömi nin: “Qellqë, porqui kë palabrakunaqa markäkïpaq* y rasumpa kaqmi kayan”.  Y kënömi nimarqan: “¡Cumplikärishqanam! Noqam Alfa y Omëga* kä, qallanan kaq y ushanan kaq. Pipis yakunaq kaqtaqa kawëta qokoq yakuyoq pukyupitam* debaldilla* qoshaq.  Pipis venceq kaqqa këkunatam chaskinqa,* y noqam Diosnin kashaq, y pëmi tsurï kanqa.  Peru mantsallïshukuna,* mana markäkoq* kaqkuna, rakcha* këninchö melanëpaq kaqkuna, wanutsikoqkuna, rakcha rurëkunata* ruraqkuna, brujerïa ruraqkuna, imäginkunata adoraqkuna y llapan ulikoq* kaqkunaqa, ninawan y azufriwan rawraq qochachömi ushayanqa. Tsëqa ishkë kaq wanïtam rikätsikun”.  Ushanan kaq qanchis castïgukunata qanchis tazonkunachö katseq qanchis angelkunapita juknin kaqmi shamurqan y kënö nimarqan: “Shamï, y noviatam rikätsishqëki, Achkaspa* warmin kanampaq kaqta”. 10  Tsëmi santu espïritupa poderninwan jatun y mëtsikan jirkaman apamarqan, y Jerusalen santu markatam rikätsimarqan, Diospita patsë ciëlupita urëkämoqta, 11  y Diospa chipapäkïninyoqmi karqan. Chipapäkïninqa imëka alläpa shumaq ruminömi karqan, vidriunö cläru chipapaq jaspi ruminö. 12  Jatun y mëtsikan perqayoqmi karqan, y chunka ishkë (12) punkukunayoq y punkukunachö chunka ishkë (12) angelkunayoqmi karqan, y tsë punkukunachöqa Israelpa tsurinkunapa chunka ishkë (12) kastankunapa jutinkunam qellqarëkarqan. 13  Inti* yarqamunan lädupam* kima* punkukuna karqan, uma kaq lädupam* kima punkukuna, ura kaq lädupam* kima punkukuna y inti jeqanan lädupam* kima punkukuna. 14  Tsë markapa perqampaqa jina chunka ishkë (12) cimientu rumikunam kapurqan, tsëkuna jananchömi Achkaspa chunka ishkë (12) apostolninkunapa chunka ishkë (12) jutinkuna këkarqan. 15  Y parlapëkämaq kaqqa örupita medina shoqushtam katsirqan, markata, punkunkunata y perqanta medinampaq. 16  Y tsë markaqa entërumpam juk cuadrädunö, y largunqa anchunnö jatunmi. Y shoqushwanmi tsë markata medirqan, ishkë waranqa ishkë pachak ishkë chunka (2.220) kilömetrutanö;* largun, anchun y altunqa igualmi kayan. 17  Jina pëqa perqantapis medirqanmi, joqta chunka chusku (64) metrutanö,* nunapa medïdanmannö, tsë medïdatam angelqa inshirqan.* 18  Tsë perqaqa jaspi rumipita rurashqam karqan, y markaqa öru pürum karqan, imëka vidriunö cläru. 19  Markapa perqampa cimientunkunaqa tukïläya alläpa shumaq rumikunawan adornashqam këkarqan: punta kaq cimientuqa jaspi rumim karqan; ishkë kaqnam, zafïru rumi; kima kaqnam, calcedonia rumi; chusku kaqnam, esmeralda rumi; 20  pitsqa kaqnam, sardönica rumi; joqta kaqnam, sardiu rumi; qanchis kaqnam, crisölitu rumi; puwaq kaqnam, berïlu rumi; isqun kaqnam, topaciu rumi; chunka kaqnam, crisopräsa rumi; chunka juk (11) kaqnam, jacintu rumi; chunka ishkë (12) kaqnam, amatista rumi. 21  Jina chunka ishkë (12) punkukunapis chunka ishkë (12) perlaskunam kayarqan; cada punkum juk perlasllapita rurashqa karqan. Y markapa mas precisaq kaq cällinqa öru pürum karqan, imëka vidriunö rikakoq. 22  Y manam tsëchö templuta rikarqätsu, porqui Llapanta Puëdeq Jehovä* Diosmi templun, jina Achkaspis.* 23  Y markaqa manam intipa* ni killapa aktsin aktsinanta wanantsu, porqui Diospa chipapäkïninmi aktsirqan, y chiwchinnam Achkas karqan. 24  Y nacionkunaqa tsë aktsiwanmi puriyanqa, y patsachö reykunam chipapäkïninkunata tsëman apayanqa. 25  Punkunkunaqa manam ni imanöpapis junaqpa wichqakanqatsu, porqui tsëchöqa manam ampi* kanqatsu. 26  Y tsëmanmi nacionkunapa chipapäkïninta y respetashqa këninta apayanqa. 27  Peru imapis rakchatashqa kaq y pipis melanëpaq kaqta ruraq kaq y engañakoq kaqqa, manam ni imanöpapis tsëman yëkunqatsu; Achkaspa kawë röllunchö qellqarëkaq kaqkunallam yëkuyanqa.

Päginapa ura kuchunchö willakïkuna

Kënöpis niyanmi: runan.
Kënöpis niyanmi: trönupita.
Kënöpis niyanmi: yärakuypaq.
O: “A y Z”. Alfa y Omëgaqa griëgu idiömachö abecedariupa qallanan kaq y ushanan kaq letrankunam kayan.
O: “pashtaqpitam”.
O: “chaninnaqta”.
Griëgu idiömachöqa “heredanqa” ninmi.
Kënöpis niyanmi: waylläyukuna.
Kënöpis niyanmi: mana yärakoq.
Kënöpis niyanmi: qanra.
Rikäri “Käyitsikïkuna” nishqanta.
Kënöpis niyanmi: llullakoq.
Kënöpis niyanmi: Ashkashpa.
Kënöpis niyanmi: rupay.
O: “esti kaq lädupam”.
Kënöpis niyanmi: kimsa.
O: “norti kaq lädupam”.
O: “sur kaq lädupam”.
O: “oesti kaq lädupam”.
Griëgu idiömachöqa “chunka ishkë waranqa (12.000) estadiukunata” ninmi. Juk estadiuqa pachak puwaq chunka pitsqa (185) metrum kaq.
Griëgu idiömachöqa “pachak chusku chunka chusku (144) kukuchikuna” ninmi.
Kënöpis niyanmi: utilizarqan.
Rikäri “Käyitsikïkuna” nishqanta.
Kënöpis niyanmi: Ashkashpis.
Kënöpis niyanmi: rupaypa.
Kënöpis niyanmi: paqas; tutapë.