Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Këchö Biblia | TRADUCCIÓN DEL NUEVO MUNDO DE LAS SANTAS ESCRITURAS

Revelacion 14:1-20

IMAKUNA KANQAN

  • Achkas y juk pachak chusku chunka chusku waranqa (144.000) akrashqakuna (1-5)

  • Kima angelkunapa willakïninkuna (6-12)

    • Ciëlupa chowpinchö volëkaq angel alli willakïkunata katsin (6, 7)

  • Kushishqam kayan Cristuwan juknölla këkar wanoq kaqkuna (13)

  • Patsachö ishkë cosëchakuna (14-20)

14  Tsënam rikärirqä, y ¡rikäyë!, Sion jirkachömi Achkas* shëkarqan, y pëwanmi kikimpa jutinta y Teytampa jutinta urkunkunachö qellqashqata katseq pachak chusku chunka chusku waranqa (144.000) këkäyarqan.  Y ciëlupita shamoq büllatam wiyarqä, imëka mëtsika yaku büllaqtanö y räyu* sinchipa janraraqtanö;* y tsë wiyanqä büllaqa imëka arpankunata tocar cantaqkuna büllayanqannömi karqan.  Y gobernar täkunapa, chuskun querubinkunapa y gobernaqkunapa nöpankunachömi juk mushoq canciontanö cantëkäyan, y tsëtaqa manam ni pipis yachakïta puëdirqantsu, sinöqa patsapita rantishqa pachak chusku chunka chusku waranqa (144.000) kaqkunallam.  Pëkunaqa warmikunawan mana rakchatäkushqa* kaqkunam kayan; awmi, pëkunaqa manam piwampis oqllanakuyashqatsu.* Pëkunam kayan mëpa ëwaptimpis Achkasta qateq kaqkuna. Pëkunaqa imëka punta kaq wayïnömi Diospaq y Achkaspaq nunakunapita rantishqa kayashqa,  y manam shiminkunachöqa engañakï karqantsu; llapanchömi alli kayan.  Y ciëlupa* chowpinchö volëkaqtam juk angelta rikarqä, y mana ushakaq alli willakïkunatam katsirqan patsachö täraqkunata willanampaq, llapan nacionkunata, kastakunata, idiömakunata y markakunata.  Pëmi sinchipa kënö nikarqan: “Diosta mantsayë y alläpa precisaqpaq churayë, porqui juzganan höram chäramushqa, tsëqa, ciëluta, patsata, lamarta y pukyukunata* ruraqta adorayë”.  Juk masmi, ishkë kaq angel, tsëpita shamurqan, kënö nirnin: “¡Ishkirishqam! ¡Alläpa Puëdeq Babiloniam ishkirishqa! Rakcha* rurëkunata* ërayëpa munënimpa vïnunta llapan nacionkunata uputseq”.  Juk angel masmi, kima* kaq, qepankunata shamurqan, y sinchipam kënö nikarqan: “Sitsun pipis mantsanëpaq chukaru animalta y imäginninta adoranqa y urkunchö o makinchö juk marcata chaskinqa, 10  tsëqa jina piñakïnimpa* cöpanman ni imawampis mana takushpa winashqatam Diospa piñakïnimpa vïnunta upunqa, y santu angelkunapa rikëninchö y Achkaspa rikëninchömi ninawan y azufriwan sufritsishqa kanqa. 11  Y pëkuna sufritsishqa kayanqampita witsaq qoyëqa* mana ushakëtam imëyaqpis witsan, y manam ni paqasta ni junaqta jamayantsu, mantsanëpaq chukaru animalta y imäginninta y jutimpa marcanta chaskishqa kaqkuna. 12  Tsëchömi precisan santu nunakuna alli tsarakuyänan, Diospa mandakïninkunata wiyakoq y Jesuspa markäkïninta* qateq kaqkuna”. 13  Y ciëlupita kënö neqtam wiyarqä: “Qellqë: kushishqam kayan kanan tiempupita patsë Señorwan juknölla këkar wanoq kaq wanushqakuna. Awmi, espïritum nin rurëninkunapita jamayänampaq, porqui rurayanqan cösaskunaqa pëkunawan juntum ëwan”. 14  Tsënam rikärirqä, y ¡rikäyë!, juk yulaq pukutë, y tsë pukutëchömi nunapa tsurin niraq juk tëkarqan, peqanchö örupita corönayoq y makinchö fïlu ösiyoq. 15  Juk angelmi templupa santu kaq sitiumpita yarqamurqan, pukutëchö tëkaqta sinchipa kënö nishpa qayarnin: “Ösikita yakë y seguë, porqui seguë höram chäramushqa, porqui patsachö cosëchaqa chipyëpa poqunam këkan”. 16  Y pukutë jananchö tëkaqmi patsaman ösinta yakarirqan, y patsam segashqa karqan. 17  Y juk angel masmi ciëluchö këkaq templupa santu kaq sitiumpita yarqamurqan, y pëpis juk fïlu ösitam katsirqan. 18  Y juk angel masmi altarpita yarqamurqan, y ninatam autoridäninchö katsirqan. Y fïlu ösita këkätseqtam sinchipa qayarqan y kënö nirqan: “Fïlu ösikita yakë, y patsachö üvas plantakunapa sartankunata ëllï,* porqui üvasninkunam poqurishqana”. 19  Y angelqa patsamanmi ösinta yakarirqan, y patsachö üvas plantakunapitam üvasta ëllurirqan, y Diospa piñakïnimpa jatun pözunmanmi jitarkurqan. 20  Y markapa jaqninchömi* tsë pözuchö üvas jalushqa* karqan, y tsë pözupita yarqoq yawarqa bestiakunapa jäkimankunayaqmi charqan, y ishkë pachak isqun chunka joqta (296) kilömetruyaqnömi* yarqurqan.

Päginapa ura kuchunchö willakïkuna

Kënöpis niyanmi: Ashkash.
Kënöpis niyanmi: tillaqu.
Kënöpis niyanmi: kumruroqtanö.
Kënöpis niyanmi: qanratäkushqa.
Griëgu idiömachöqa “pëkunaqa doncëllam kayan” ninmi. Griëgu idiömachöqa tsënö nirqa soltëru warmikunapaqpis y ollqukunapaqpis kanmanllam.
O: “vientupa chowpinchö; rarapa”.
Kënöpis niyanmi: pashtaqkunata.
Kënöpis niyanmi: qanra.
Griëgu idiömachö: por·nëi·a. Rikäri “Käyitsikïkuna” nishqanta.
Kënöpis niyanmi: kimsa.
Kënöpis niyanmi: ajanaynimpa.
Kënöpis niyanmi: qoshniqa.
Kënöpis niyanmi: yärakuyninta.
Kënöpis niyanmi: qorï.
Kënöpis niyanmi: markapita waqtachömi.
Kënöpis niyanmi: jarushqa.
Griëgu idiömachöqa “waranqa joqta pachak (1.600) estadiukunayaqmi” ninmi. Juk estadiuqa pachak puwaq chunka pitsqa (185) metrum kaq.