Llapan kanqanman ëwari

Qallananchö tïtulukunaman ëwë

Jehoväpa testïgunkuna

Idiömata akrë Quechua (Ancash)

Revelacion 13:1-18

  • Qanchis peqayoq mantsanëpaq chukaru animal lamarpita yarqamun (1-10)

  • Ishkë waqrayoq mantsanëpaq chukaru animal patsapita witsämun (11-13)

  • Qanchis peqayoq mantsanëpaq chukaru animalpa imäginnin (14, 15)

  • Mantsanëpaq chukaru animalpa marcan y nümerun (16-18)

13  Y lamar kuchun aqushachömi shëkar quedakurqan.* Y lamarpita yarqëkämoqtam juk mantsanëpaq chukaru animalta rikarqä, chunka waqrayoqta y qanchis peqayoqta,* y waqrankunachömi chunka corönakuna* karqan, peru peqankunachöqa Diosta ashaq* jutikunam karqan.  Tsë rikanqä mantsanëpaq chukaru animalqa imëka leopardu* niraqmi karqan, tsënö kaptimpis, chakinkunaqa imëka ösupanömi karqan, y shiminqa imëka leonpa shiminnömi karqan. Y mantsanëpaq jatun culebram tsë mantsanëpaq chukaru animalta poderninta, gobernar täkunanta y alläpa autoridäyoq këta qorqan.  Juk peqanqa wanunampaqnö jatun herïdayoqnö kashqa kanqantam rikarqä, peru wanunampaqnö jatun herïdanqa kachakärishqam kanaq, y entëru patsam tsë mantsanëpaq chukaru animalta espantakurnin qatirqan.  Y mantsanëpaq jatun culebratam adorayarqan, porqui pëmi tsë mantsanëpaq chukaru animalta autoridänin qorqan, y kënö nirmi tsë mantsanëpaq chukaru animalta adorayarqan: “¿Pitaq mantsanëpaq chukaru animalnö, y pitaq pëwan pelyëta puëdinman?”.  Y alabakur parlanampaq y Diosta ofendir parlanampaqmi poderta chaskirqan, y chusku chunka ishkë (42) killakunapa munanqanta ruranampaqmi autoridäta chaskirqan.  Y Diosta ofendir parlanampaqmi shiminta kicharqan, jutinta, täranqan sitiuta y hasta ciëluchö täraqkunata ofendir parlanampaq.  Santu nunakunapa contran guërrata ruranampaq y pëkunata vencinampaqmi permitishqa karqan, y llapan kastakunata, markakunata, idiömakunata y nacionkunata makinchö katsinampaqmi autoridäta chaskirqan.  Y patsachö llapan täraqkunam pëta adorayanqa. Patsachö nunakuna yurikur qallayanqampita patsëmi, pëkunapaqa ni mëqampapis, mana ankupashpa* wanutsishqa Achkaspa kawë röllunchö jutinkuna qellqashqatsu kashqa.  Pipis rinriyoq kaqqa, wiyatsun. 10  Pipis prësu apashqa kanampaq kaqqa, prësum apashqa kanqa. Pipis espädawan wanutsikoq kaqqa,* espädawanmi wanutsishqa kanqa. Tsëchömi precisan santu nunakuna tsarakuyänan y markäkuyänan.* 11  Tsënam patsapita witsëkämoqta juk mantsanëpaq chukaru animalta rikarqä, y achkaspanömi ishkë waqrankuna kapurqan, peru juk mantsanëpaq jatun culebranömi parlar qallëkurqan. 12  Y punta kaq mantsanëpaq chukaru animalpa llapan autoridänintam rikëninchö inshin.* Y patsata y tsëchö täraqkunatam punta kaq mantsanëpaq chukaru animalta adoratsin, pëpam wanunampaqnö jatun herïdan kachakashqa karqan. 13  Y jatun señalkunatam ruran, hasta llapan nunakunapa rikëninkunachö ciëlupita patsaman ninata urätsir. 14  Patsachö täraqkunatam engañan, mantsanëpaq chukaru animalpa rikëninchö señalkunata ruranampaq permitishqa kashqa karnin, jina patsachö täraqkunatam nin, espädawan roqushqa këkarpis kachakärir kawëkaq mantsanëpaq chukaru animalpaq juk imäginta rurayäpunampaq. 15  Y mantsanëpaq chukaru animalpa imäginninta kawatsikoq jamanita* qonampaqmi permitishqa karqan, tsënöpa mantsanëpaq chukaru animalpa imäginnin parlanampaq, y tsë mantsanëpaq chukaru animalpa imäginninta adorëta mana munaq kaqkunata wanutsiyänampaq mandakunampaq. 16  Llapan nunakunatam obligan —mana precisaq kaqkunata y precisaq kaqkunata, kapoqyoqkunata* y waktsakunata, libri kaqkunata y sirwipakoqkunata— derëcha kaq makinkunachö o urkunkunachö marcashqa kayänampaq, 17  y pipis rantita o rantikïta mana puëdinampaq, sinöqa marcayoq kaq nunakunalla, mantsanëpaq chukaru animalpa jutinta o jutimpa nümerunta katseq kaqkunalla. 18  Këchömi precisan yachëyoq kë: pipis tantiyëta yachaq kaqqa, mantsanëpaq chukaru animalpa nümerunta tantiyatsun, porqui nunapa nümerunmi, y nümerunqa joqta pachak joqta chunka joqtam (666).

Päginapa ura kuchunchö willakïkuna

Juk parlakïchöqa, mantsanëpaq jatun culebra.
Kënöpis niyanmi: umayoqta.
Griëgu idiömachöqa “diadëmakuna” ninmi. Itsa tsëqa karqan reykunapa peqankunachö wataraq cintanö.
Kënöpis niyanmi: insultaq.
Tsëqa imëka muru muru puma niraq mëtsikan mishim.
Kënöpis niyanmi: mana llakipaypa.
O, itsapis: “pipis espädawan wanutsishqa kanampaq kaqqa”.
Kënöpis niyanmi: yärakuyänan.
Kënöpis niyanmi: utilizan.
O: “espïrituta”.
Kënöpis niyanmi: rïcukunata.