Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Këchö Biblia | TRADUCCIÓN DEL NUEVO MUNDO DE LAS SANTAS ESCRITURAS

Mateu 7:1-29

IMAKUNA KANQAN

  • JIRKACHÖ JESUS YACHATSIKUNQAN (1-27)

    • Amana pitapis juzgayënatsu (1-6)

    • Sïguiyë mañakurnin, ashirnin, takakurnin (7-11)

    • Wakinkunawan alli apanakunapaq precisaq mandakï (12)

    • Kichki kaq punku (13, 14)

    • Rurëninkunapita reqishqa (15-23)

    • Qaqa jananchö wayi, aqusha jananchö wayi (24-27)

  • Mëtsika nunakuna Jesus yachatsikunqampita alläpa espantakuyan (28, 29)

7  Amana pitapis juzgayënatsu, kikikikunapis mana juzgashqa kayänëkipaq;  porqui juzgayanqëkimannömi qamkunapis juzgashqa kayanki, y tupuyanqëki tupunawanmi kikikikunapaqpis tupuyämunqa.*  Tsëqa, ¿imanirtaq creikoq mayikipa nawinchö këkaq achuta* rikanki, peru kikikipa nawikichö këkaq terrädutaqa* rikankitsu?  O, ¿imanötaq creikoq mayikita, ‘nawikichö këkaq achuta jorqaramushaq’ ninkiman, kikikipa nawikichö juk terrädu këkaptinqa?  ¡Ishkë qaqlla! Puntataqa nawikichö këkaq terrädutaraq jorqë, tsënöpam creikoq mayikipa nawinchö këkaq achuta imanö jorqanëkipaq mas cläru rikanki.  Ama Diospa kaqta allqukunata qoyëtsu, ni perlasnikikunata kuchikunapa puntanman jitayëtsu, tsënöpa mana jalukacharkuyänampaq, y tsëpita tikrëkamur, kikikikunatapis mana rachikacharkuyäshunëkipaq.  Sïguiyë mañakurnin, y qoyäshunkim; sïguiyë ashirnin, y tariyankim; sïguiyë takakurnin, y kichapuyäshunkim;  porqui llapan mañakoqkunam chaskiyan, y llapan asheqkunam tariyan, y llapan takakoqkunatam kichapuyanqa.  Rasumpa kaqchöqa, ¿qamkunapita pitaq wamran tantata mañakuptin rumin qoykunman? 10  O juk pescäduta mañakuptin, ¿manachi culebrantsu qoykunman aw? 11  Tsëqa, qamkuna jutsasapa këkarpis wamrëkikunata alli qarëkunata qoyta yachëkäyaptikiqa, ciëluchö këkaq Teytëkikunanäqa, ¡masraqchi mañakoqninkunataqa alli cösaskunata qoykunqa! 12  Tsënö këkaptinqa, imanömi nunakuna tratayäshunëkita munayanki, tsënölla qamkunapis pëkunata tratayë.* Rasumpa kaqchöqa, tsëtam Ley y Diospa Willakoqninkuna Qellqayanqankuna yachatsikuyan. 13  Kichki kaq punkupa yëkuyë, porqui jatun punkuyoq anchu näniqa ushakëmanmi chätsikun, y mëtsikaqmi tsë nänipaqa ëwayan; 14  peru kawëman chätsikoq näniqa llanum y punkumpis kichkim, y wallkaqllam tsë nänitaqa tariyan. 15  Mäkoq mäkoqlla* kayë Diospa willakoqnin tukoqkunapita, porqui pëkunaqa üshanö vistishqam qamkunaman shayämun, peru rurimpaqa mallaqashqa atoqnömi* kayan. 16  Rurëninkunapitam* pëkunataqa reqiyanki. Manam ni imëpis kashakunapitatsu nunakunaqa üvasta pallayan, ni cardonkunapitatsu hïgusta pallayan, ¿aw? 17  Jina tsënöllam alli plantaqa allita wayun, peru mana alli plantaqa mana sirweqtam wayun. 18  Juk alli plantaqa manam mana sirweqtaqa wayïta puëdintsu, ni mana alli plantaqa allita wayïta puëdintsu. 19  Allita mana wayoq plantakunataqa, llapantam walluriyan y ninaman jitarkuyan. 20  Rasumpa kaqchöqa, rurëninkunapitam tsë nunakunataqa reqiyanki. 21  Manam llapan ‘Señor, Señor’ nimaqnïtsu ciëluchö Gobiernuman yëkunqa, sinöqa ciëluchö këkaq Teytäpa munëninta ruraq kaqllam. 22  Mëtsikaqmi tsë junaqchöqa ‘Señor, Señor, ¿manaku Dios musyatsikunqanta jutikichö willakushqa kayä, y jutikichö supëkunata qarqushqa kayä, y jutikichö milagrukunata* rurashqa kayä?’ niyämanqa. 23  Tsënam noqaqa pëkunata kënö nishaq: ‘¡Manam ni imëpis qamkunataqa reqiyarqoqtsu! ¡Noqapita witikuyë, mana allikunata ruraqkuna!’. 24  Tsëmi, kë ninqäkunata wiyakur ruraq kaqqa, imëka qaqa jananchö wayinta sharkatseq alli juiciuyoq nunanö kanqa. 25  Y tamyarmi qallëkurqan, lloqllam shamurqan, y sinchipam vienturqan, y tsë wayitam apakïta munarqan, peru tsë wayiqa qaqa jananchö patsätsishqa karmi juchurqantsu. 26  Peru kë ninqäkunata wiyëkar mana ruraq kaqqa, imëka aqusha* jananchö wayinta sharkatseq upa nunanömi kanqa. 27  Y tamyarmi qallëkurqan, lloqllam shamurqan, y sinchipam vienturqan, y tsë wayitam apakïta munarqan, y tsë wayiqa juchurirqanmi, y chipyëpam ushakärirqan”. 28  Jesus tsëkunata parlar ushariptinnam, imanö yachatsikunqampita tsëchö këkaq mëtsika nunakuna alläpa espantakuyarqan, 29  porqui pëqa autoridäyoq nunanömi pëkunata yachatsirqan, y manam Ley qellqaqninkunanötsu.*

Päginapa ura kuchunchö willakïkuna

Kënöpis niyanmi: “mediyanqëki medïdawanmi, kikikikunapaqpis mediyämunqa”.
Kënöpis niyanmi: shumpata.
Kënöpis niyanmi: vïgataqa.
Griëgu idiömachöqa “llapan imëkatapis nunakuna rurayäshunëkita munayanqëkitam, qamkunapis pëkunata rurayänëki” ninmi.
Kënöpis niyanmi: mayaq mayaqlla.
Griëgu idiömachöqa “löbum” ninmi. Tsë animalqa atoq niraqmi, peru mas jatunmi.
Griëgu idiömachöqa “wayïninkunapitam” ninmi, peru tsënö nirqa, rurëkunapaqmi parlëkan.
Griëgu idiömachöqa “espantakïpaq rurëkunata” ninmi.
Kënöpis niyanmi: arëna.
Rikäri “Käyitsikïkuna” nishqanta.