Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Këchö Biblia | TRADUCCIÓN DEL NUEVO MUNDO DE LAS SANTAS ESCRITURAS

Mateu 4:1-25

IMAKUNA KANQAN

  • Jesusta Diablu tentëta tïran (1-11)

  • Galilëa provinciachö Jesus willakur qallan (12-17)

  • Puntata qayanqan qateqninkuna (18-22)

  • Jesus willakun, yachatsikun y kachakätsikun (23-25)

4  Tsëpitanam, Jesusta santu espïritu tsunyaqman* pusharqan, tsëchömi Diablu* tentëta tïrarqan.  Chusku chunka (40) junaq y chusku chunka (40) paqas ayunashqa* karmi, Jesusqa mallaqarqan.  Tsënam, Diablu pëman witirir tentëta tïrarnin kënö nirqan: “Diospa tsurinkunapita karqa, kë rumikunata niri tantaman tikrariyänampaq”.  Peru pëqa kënömi contestarqan: “Qellqashqam këkan: ‘Nunaqa manam tantallawantsu kawanan, sinöqa Jehovä* llapan ninqankunawanmi’”.  Tsëpitanam Diabluqa Jerusalenchö* templupa perqan jananman aparqan  y kënö nirqan: “Diospa tsurinkunapita karqa, këpita jeqakurkï, porqui qellqashqam këkan: ‘Angelninkunatam qamman kachamunqa’, y: ‘Pëkunam makinkunawan tsaräyäshunki rumichö chakikita mana takanëkipaq’”.  Jesusnam kënö nirqan: “Jina qellqashqam këkan: ‘Manam Jehovä* Diosnikita pruëbaman churanëkitsu’”.  Tsëpitanam Diabluqa alläpa jatun jirkapa jananman aparqan, y patsachö llapan gobiernukunata y riquëzankunata rikäratsirqan.  Y kënömi nirqan: “Qonqurïkur juk kutilla adorëkamaptikiqa, kë llapantam qoykushqëki”. 10  Tsënam Jesusqa kënö nirqan: “¡Këpita ëwakï Satanas! Porqui qellqashqam këkan: ‘Jehovä* Diosnikillatam adoranëki, y pëllatam sirwinëki’”. 11  Tsënam Diabluqa jaqirir ëwakurqan, y ¡rikë!, angelkuna shamurmi atiendir qallëkuyarqan. 12  Juk kutichönam, Juanta prësutsishqa kayanqanta wiyarir, Galilëa provinciata ëwakurqan. 13  Y tsëpitanam Nazaretpita yarqurir ëwarqan Zabulon y Neftalï distrïtukunachö këkaq qocha kuchunchö Capernaumman, y tsëchömi tärarqan,* 14  tsënöpa Diospa willakoqnin* Isaïas kënö nir willakunqan cumplikänampaq: 15  “¡Lamarman* ëwaq nänichö y Jordan mayupa wak tsimpanchö Zabulonwan Neftalï markakuna këkanqan juk nacion nunakuna täräyanqan Galilëa! 16  Paqaschö tëkaq markam alläpa atsikyaqta rikashqa, y wanïpa wäninnö* këkaq sitiuchö tëkaqkunachömi aktsi atsikyashqa”. 17  Tsëpita patsëmi Jesusqa kënö nir willakur qallëkurqan: “Arrepentikuyë, ciëluchö Gobiernuqa këllachönam këkan”. 18  Galilëa qocha* kuchumpa ëwarëkarmi, ishkaq wawqikunata rikärirqan pescana mällata qochaman jitëkäyaqta: Pëdru nir reqiyanqan Simonta y wawqin Andresta, pëkunaqa pescadormi kayarqan. 19  Y kënömi nirqan: “Qepäta shayämï, nunakunata pesquëtam yachatsiyashqëki”. 20  Tsë höram mällankunata jaqirïkur qatiyarqan. 21  Tsëpita pasarirnam ishkaq mas wawqikunata rikärirqan: Zebedeupa tsurin Santiägutawan wawqin Juanta. Pëkunaqa teytankuna Zebedeuwanmi barcuchö mällankunata remendarnin këkäyarqan, y pëkunatapis qayarqanmi. 22  Tsë höram barcuta y teytankunata jaqirïkur qatiyarqan. 23  Y entëru Galilëa provinciapam purirqan Diosta adorayänan wayinkunachö yachatsikurnin, Diospa Gobiernumpita alli willakïkunata willakurnin, y imëka nanatsikïyoqkunata y qeshyayoqkunata kachakätsirnin. 24  Y entëru Siriamanmi pëpita willakuyanqan chärirqan, tsëmi imëka nakakïkunawan* y alläpa nanatsikïkunawan sufrikaqkunata, supëyoqkunata, atäkiwan qeshyaqkunata, y kuyukïta mana puëdeqkunata pëman apayämurqan, y llapantam kachakätsirqan. 25  Tsëmi, Galilëa provinciapita, Decäpolispita,* Jerusalenpita, Judëa provinciapita y Jordanpa wak tsimpampita mëtsikaq nunakuna qatiyarqan.

Päginapa ura kuchunchö willakïkuna

Kënöpis niyanmi: tsutsinman.
Griëgu idiömachöqa “Tentakoq” ninmi.
Rikäri “Käyitsikïkuna” nishqanta.
Rikäri “Käyitsikïkuna” nishqanta.
Griëgu idiömachöqa “santu markachö” ninmi.
Rikäri “Käyitsikïkuna” nishqanta.
Rikäri “Käyitsikïkuna” nishqanta.
Kënöpis niyanmi: pärarqan.
Griëgu idiömachöqa “profëta” ninmi. Rikäri “Käyitsikïkuna” nishqanta.
Itsachi Mediterraniu nishqan lamarpaq parlëkan, peru wakinkunaqa niyan Galilëa nishqan qochapaq parlëkanqantam.
Kënöpis niyanmi: llantunnö; tutapëninnö.
Wakin Bibliakunachöqa Galilëa lamar ninmi, peru mishki yakuyoq kaptin y lamarnö jatun mana kaptinmi kë Bibliachöqa Galilëa qocha nin.
Kënöpis niyanmi: ñakaykunawan.
Rikäri “Käyitsikïkuna” nishqanta.