Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Këchö Biblia | TRADUCCIÓN DEL NUEVO MUNDO DE LAS SANTAS ESCRITURAS

Mateu 26:1-75

IMAKUNA KANQAN

  • Jesusta wanutsiyänampaq sacerdötikuna yachatsinakuyan (1-5)

  • Jesuspa peqanman pukutaq aceitita juk warmi jichan (6-13)

  • Ushanan kaq Pascua fiesta y Jesus rantikushqa kanqan (14-25)

  • Señorpa Cënan patsakan (26-30)

  • Pëdru neganampaq kaq puntallapitana willakï (31-35)

  • Getsemanï sitiuchö Diosman Jesus mañakun (36-46)

  • Jesusta tsaririyan (47-56)

  • Judïukunapa Precisaq Cortinchö Jesusta juzgayan (57-68)

  • Jesusta Pëdru negan (69-75)

26  Tsëkunata parlar usharirnam Jesusqa qateqninkunata kënö nirqan:  “Qamkunaqa musyayankim këpita ishkë junaqta Pascua fiesta* kanampaq kaqta, y qeruchö wanutsishqa kanampaqmi nunapa Tsurinqa entregashqa kanqa”.  Tsënam, precisaq sacerdötikuna y respetashqa nunakuna, Caifas jutiyoq mandakoq kaq sacerdötipa patiunchö ëllukäriyarqan,*  y llapankunam yachatsinakuyarqan Jesusta yachëllapa tsariyänampaq y wanutsiyänampaq.  Tsënö kaptimpis, kënömi niyarqan: “Ama fiestachöqa, nunakuna contrantsik büllar mana shärikurkuyänampaq”.  Betaniachö lepra qeshyayoq nirnin reqiyanqan Simonpa wayinchö Jesus këkaptinnam,  alabastru rumipita rurashqa botëllachö alläpa chaniyoq y pukutaq* aceitin aparkur pëman juk warmi witirqan, y cenëkaptinmi* tsë aceitita peqanman* jichar qallëkurqan.  Tsëta rikëkurnam qateqninkunaqa piñakuyarqan* y kënö niyarqan: “¿Imapaqtaq tsë aceitita perditsin?  Porqui tsë aceititaqa atska qellëchö rantikïkurmi waktsakunata qoshwan karqan”. 10  Tsëta cuentata qokurirnam Jesusqa kënö nirqan: “¿Imanirtaq kë warmipaq tsënö parlayanki? Pëqa alläpa allitam noqapaq rurashqa. 11  Porqui waktsakunataqa qamkunawanmi imëpis katsiyanki, peru noqataqa manam llapan tiemputsu katsiyämanki. 12  Kë warmi pukutaq* aceitita cuerpüman jichamurqa, pampashqa kanäpaqmi alistaramashqa. 13  Rasuntam niyaq, më tsëchöpis nunakuna kayanqanchö alli willakïkunata willakuyanqanchöqa, kë warmi yarpashqa kanampaqmi ruranqanta willakuyanqa”. 14  Tsënam, chunka ishkë (12) apostolninkunapita Jüdas Iscariöti jutiyoq kaq, precisaq sacerdötikunaman ëwarqan 15  y kënö nirqan: “¿Imatataq qoyämanki makikikunaman entreguëkamunäpaq?”. Tsënam, kima* chunka (30) pläta metal qellëta qoyänampaq äniyarqan. 16  Tsëpita patsëmi pëqa rantikïkunampaq* alli tiemputa ashirqan. 17  Levadürannaq Tantata Mikuyänan fiestapa qallanan junaqmi, Jesusman qateqninkuna shayämurqan y kënö niyarqan: “¿Mëchötaq Pascua mikïta mikunëkipaq alistayämunäta munanki?”. 18  Pënam kënö nirqan: “Markaman ëwayë, y tal nunata kënö niyë: ‘Maestrum kënö nishunki: “Wanunäpaq dispunishqa tiempum chäramunna; wayikichömi qateqnïkunawan Pascua fiestata pasashaq”’”. 19  Tsënam qateqninkunaqa Jesus mandanqannölla rurayarqan y Pascua fiestapaq alistapakuyarqan. 20  Ampïriptinnam* Jesusqa chunka ishkë (12) qateqninkunawan tëkur* mësaman kinkishärëkarqan. 21  Mikïkäyaptinnam, pëqa kënö nirqan: “Rasuntam niyaq, qamkunapita juknikikunam rantikamanqa”.* 22  Tsënö ninqampita alläpa llakikurmi juknin juknin llapankuna kënö niyarqan: “Teytë, ¿manam noqallätsu aw?”. 23  Tsëta contestarnam pëqa kënö nirqan: “Noqawan juntu tsë tazonllaman tantanta tullpoqmi rantikamanqa. 24  Awmi, nunapa Tsurinqa pëpaq qellqarëkanqannöllam ëwakunqa, peru ¡allaw, nunapa Tsurinta rantikoq nuna! Tsë nunapaqqa mas allim kanman karqan mana yurikunqan”. 25  Tsënam rantikunampaqna këkaq Jüdasqa kënö nirqan: “Maestru, ¿manam noqallätsu aw?”. Jesusnam kënö nirqan: “Kikikim nikanki”. 26  Mikurëkäyaptinmi Jesusqa juk tantata tsarirkurqan, y Diosta mañakurir pakirirqan, nïkurmi qateqninkunata qorqan y kënö nirqan: “Kë tantata mikuyë. Këqa cuerpü cuentam”. 27  Y juk cöpata tsarirkurnam, Diosta agradecikurirqan y kënö nirmi pëkunata qorqan: “Këpita llapëkikuna upuyë, 28  porqui këqa ‘conträtupaq yawarnï’ cuentam, y mëtsikaq nunakuna jutsankunapita perdonashqa kayänampaqmi ramashqa* kanqa. 29  Peru këtam niyaq: manam ni imanöpapis yapëqa kë vïnuta upushaqnatsu, hasta Teytäpa Gobiernunchö qamkunawan mushoq vïnuta yapë upunqä junaqyaq”. 30  Tsëpitanam, cantarnin Diosta alabarir,* Olïvus jirkaman ëwayarqan. 31  Tsënam Jesusqa kënö nirqan: “Kanan paqasqa noqarëkurmi llapëkikuna ishkitsishqa kayanki, porqui kënömi qellqarëkan: ‘Mitseqtam wanuratsishaq, y üshakunam witsikar* ëwakuyanqa’. 32  Peru wanunqäpita sharkaramurqa, puntëkikunatam Galilëa provinciaman ëwashaq”. 33  Peru Pëdruqa kënö nirmi contestarqan: “Qamrëkur llapankunata ishkitsiyaptimpis, ¡noqataqa mana ni imëpis ishkitsiyämanqatsu!”. 34  Jesusnam kënö nirqan: “Rasuntam neq, kanan paqasmi manaraq juk gällu cantaptin, kima* kuti negamanki”. 35  Pëdrunam kënö nirqan: “Qamwan wanunä kaptimpis, manam ni imanöpapis negashqëkitsu”. Jina wakin kaq qateqninkunapis tsënöllam niyarqan. 36  Tsënam Jesusqa pëkunawan Getsemanï niyanqan sitiuman ëwarqan, y qateqninkunata kënö nirqan: “Këchö tëkäyë Diosman mañakoq washata* ëwanqäyaq”. 37  Y Pëdrutawan Zebedeupa ishkan tsurinkunata pusharkurmi ëwarqan, y alläpa llakikur y pasëpa yarpachakurmi qallëkurqan. 38  Tsëmi pëkunata kënö nirqan: “Alläpa llakishqam këkä,* hasta wanunanqäyaq. Këchö quedakuyë, y noqawan juntu mäkoq mäkoqlla* këkäyë”. 39  Y ichik mas washaman ëwarirmi, qonqurikïkur patsaman puktïkur* kënö mañakurqan: “Teytallä, puëdikaptinqa, noqalläpita kë cöpa pasëkullätsun. Tsënö kaptimpis, ama noqa munanqänöqa katsuntsu, sinöqa qam munanqëkinö kallätsun”. 40  Qateqninkunaman kutirirnam, punïkäyaqta taririrqan, y Pëdrutam kënö nirqan: “¿Manaku juk hörallapis noqawan juntu mäkoq mäkoqlla* këta puëdiyarqunki? 41  Mäkoq mäkoqlla y mañakur këkäyë, tsënöpa tentacionman mana ishkiyänëkipaq. Rasumpa kaqchöqa, nunaqa alli kaqtam rurëta munan,* peru jutsasapa ëtsanqa dëbilmi”. 42  Jina ishkë kaq kutichöpis yapëmi ëwarqan y kënö mañakurqan: “Teytallä, kë cöpapita upuptïraq kë cöpa pasanan kaptinqa, munëniki rurakätsun”. 43  Y yapë kutiramurpis, jina yapëmi punukashqa këkäyaqta taririrqan, punï* alläpa nitiptinmi punukashqa këkäyarqan. 44  Tsëmi pëkunata jaqirir yapë ëwarqan, y kë kima kaq kutichöpis puntata mañakunqannöllam yapë mañakurqan. 45  Tsëpitanam, qateqninkunaman kutïkurnin kënö nirqan: “¡Kë precisaq hörachöran qamkunaqa punïkäyanki y jamëkäyanki! ¡Rikäyë! Höra chäramushqanam nunapa Tsurinta jutsasapakunapa makinman rantikïkuyänampaq.* 46  Sharkuyë, aku ëwakushun. ¡Rikäyë! Rantikamaqnïqa këchönam këkan”. 47  Parlar manaraq ushaptinmi, chunka ishkë (12) apostolninkunapita Jüdas jutiyoq kaq chäramurqan, y pëwanmi precisaq sacerdötikuna y respetashqa nunakuna kachayanqan mëtsikaq nunakuna espädankunawan y garrutinkunawan këkäyarqan. 48  Y rantikoqnin kaqqa kënö nirmi pëkunata juk señalta qoshqa karqan: “Mutsanqä kaqmi kanqa, pëta tsariyanki”. 49  Y Jesusman defrenti ëwëkurmi kënö nirqan: “¿Yamëllaku Maestru?”,* y nïkurmi kuyëllapa mutsëkurqan. 50  Peru Jesusqa kënömi nirqan: “Amïgu, ¿imarëkurtaq këchö këkanki?”. Tsëllanam Jesusta tsaririyarqan y prësuriyarqan. 51  Peru ¡rikë!, Jesuswan këkaqkunapitam juk qateqnin espädanta sutaramurqan, y mandakoq kaq sacerdötipa sirweqnimpa rinrinta shikwaqpaq wallurapurqan.* 52  Tsënam Jesusqa kënö nirqan: “Espädëkita sitiunman kutitsi, porqui espädata tsareq kaqkunaqa, espädawanmi wanutsishqa kayanqa. 53  ¿O kanan höra chunka ishkë (12) tröpa angelkunata kachamunampaq Teytäta rogakïta mana puëdinqätaku pensanki? 54  Tsëqa, ¿imanöraq cumplikanman kënö pasanampaq kaqta Diospa Palabran willakunqan?”. 55  Tsë höram Jesusqa tsëchö këkaq mëtsika nunakunata kënö nirqan: “¿Imëka suwatanö tsariyämänëkipaqku espädëkikunawan y garrutikikunawan shayämurqunki? Waran waranmi templuchö tëkurnin yachatsikur karqä, peru tsënö kaptimpis qamkunaqa manam tsariyämarqëkitsu. 56  Peru kë llapankunaqa pasakushqa Diospa willakoqninkuna* qellqayanqan cumplikänampaqmi”. Tsënam, llapan qateqninkuna pëta jaqirïkur escapar* ëwakuyarqan. 57  Jesusta tsareqkunaqa mandakoq kaq sacerdöti Caifasmanmi apayarqan, tsëchömi Ley qellqaqkuna* y respetashqa nunakuna ëllurëkäyarqan.* 58  Peru Pëdruqa karu qepantam qatir ëwarqan hasta mandakoq kaq sacerdötipa patiunyaq, y tsëman yëkurirmi, wayichö sirwipakoqkunawan täkurirqan imachö ushanampaq kaqta musyanampaq. 59  Tsëyaqnam, precisaq sacerdötikuna y Judïukunapa Precisaq Cortinchö* këkaqkuna, wanutsiyänanrëkur Jesuspa contran parlaq mana rasumpa willakïkunata ashiyarqan. 60  Peru mëtsikaq uli* testïgukuna chäyaptimpis, manam ima pruëbatapis culpatsayänampaq tariyarqantsu. Tsëpitanam ishkaq testïgukuna chäriyarqan 61  y kënö niyarqan: “Kë nunaqa kënömi nirqan: ‘Diospa templunta juchuratsirmi noqaqa kima junaqllachö sharkaratsita puëdï’”. 62  Tsënam, mandakoq kaq sacerdötiqa sharkurnin kënö nirqan: “¿Manaku imatapis ninki? ¿Ima ninkitaq kë nunakuna contrëki parlayanqampaq?”. 63  Peru Jesusqa upällam kakurqan. Tsëmi mandakoq kaq sacerdötiqa kënö nirqan: “¡Kawëkaq Diospa jutinchö jurëkur niyämë qam Diospa Tsurin Cristu kanqëkita o mana kanqëkita!”. 64  Jesusnam kënö nirqan: “Kikikim nirqunki. Peru qamkunatam niyaq, kanampita witsëpaqa, puëdeqpa derëcha kaq lädunchö tëkaqta y ciëlu pukutë jananchö shamïkaqtam nunapa Tsurinta rikäyanki”. 65  Tsënam mandakoq kaq sacerdötiqa janan kaq röpanta rachirirqan, y kënö nirqan: “¡Diostam ofendishqa! ¿Imapaqnataq testïgukunatapis wanantsik?* ¡Rikäyë! Wiyayarqunkim Diosta ofendinqanta. 66  ¿Ima niyankitaq?”. Tsënam, “wanunanmi” nir contestayarqan. 67  Tsëpitanam qaqllanchö toqapuyarqan y kutar ushayarqan. Wakinkunanam laqyar ushayarqan, 68  kënö nir: “Diospa willakoqnin kanqëkita rikätsikur willayämë Cristu, ¿pitaq maqashurqunki?”. 69  Tsëyaqnam Pëdruqa waqta patiuchö tëkarqan, y juk sirwipakoq warmim pëman witirir kënö nirqan: “¡Qampis Galilëapita Jesuswanmi këkarqëki!”. 70  Peru pëqa llapankunapa jananchömi kënö nir negarqan: “Manam musyätsu imapaq parlëkanqëkita”. 71  y sawan kaqman yarquriptinnam, juk shipashna rikärirqan y tsëchö këkaqkunata kënö nirqan: “Kë nunaqa Nazaretpita Jesuswanmi këkarqan”. 72  Y yapëmi negarqan kënö nir jurarnin: “¡Manam tsë nunata reqïtsu!”. 73  Tsëpita rätunllatanam, tsëchö shëkaqkuna pëman witiyarqan, y Pëdruta kënö niyarqan: “Rasumpam qampis pëkunapita kanki, porqui parlakïnikim tsëta rikätsikun”. 74  Tsënam pëqa kikinta maldecikur y jurarnin kënö nirqan: “¡Manam tsë nunata reqïtsu!”. Tsëllanam juk gällu cantarirqan. 75  Y Pëdruqa Jesus kënö ninqantam yarpärirqan: “Manaraq juk gällu cantaptinmi, kima* kuti negamanki”. Y waqtaman yarqurirmi, alläpa pësakur waqakïkurqan.

Päginapa ura kuchunchö willakïkuna

Rikäri “Käyitsikïkuna” nishqanta.
Kënöpis niyanmi: qorikäriyarqan.
Kënöpis niyanmi: mushkoq.
O: “tëkur mësaman kinkishärëkaptinmi”.
Kënöpis niyanmi: umanman.
Kënöpis niyanmi: ajäyarqan.
Kënöpis niyanmi: mushkoq.
Kënöpis niyanmi: kimsa.
Kënöpis niyanmi: traicionanampaq.
Kënöpis niyanmi: paqasyäriptinnam.
Kënöpis niyanmi: jamaykur.
Kënöpis niyanmi: traicionamanqa.
Kënöpis niyanmi: jichashqa.
O: “salmukunata cantarir”.
Kënöpis niyanmi: matsikar.
Kënöpis niyanmi: kimsa.
Kënöpis niyanmi: washaläman.
O: “Almäqa alläpa llakishqam këkan”. Rikäri “Käyitsikïkuna” nishqanchö “Alma” neqta.
Kënöpis niyanmi: mayaq mayaqlla.
Kënöpis niyanmi: umpuykur.
Kënöpis niyanmi: mayaq mayaqlla.
Griëgu idiömachöqa “espïrituqa listum këkan” ninmi.
Kënöpis niyanmi: puñunay.
Kënöpis niyanmi: traicionayänampaq.
Griëgu idiömachöqa “Rabï” ninmi.
Kënöpis niyanmi: roqurapurqan.
Griëgu idiömachöqa “profëtakuna” ninmi. Rikäri “Käyitsikïkuna” nishqanta.
Kënöpis niyanmi: qeshpir; safar.
Rikäri “Käyitsikïkuna” nishqanta.
Kënöpis niyanmi: qoriraykäyarqan.
Griëgu idiömachöqa “Sanedrinchö” ninmi. Rikäri “Käyitsikïkuna” nishqanta.
Kënöpis niyanmi: llulla.
Kënöpis niyanmi: necesitantsik.
Kënöpis niyanmi: kimsa.