Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Këchö Biblia | TRADUCCIÓN DEL NUEVO MUNDO DE LAS SANTAS ESCRITURAS

Mateu 19:1-30

IMAKUNA KANQAN

  • Casakï y divorciakï (1-9)

  • Soltëru kë qarë (10-12)

  • Wamrakunata Jesus bendicin (13-15)

  • Kapoqyoq jövinpa tapukïnin (16-24)

  • Diospa Gobiernunrëkur imëkata jaqï (25-30)

19  Tsëkunata parlar usharirnam Jesusqa Galilëapita ëwakurqan, y Jordan mayupa wak tsimpanchö Judëa provinciapa kuchunkunamanmi chärirqan.  Jinamampis, mëtsikaq nunakunam qatiyarqan, y tsëchömi qeshyëkaqkunata kachakätsirqan.  Y fariseukunam pruëbaman churëta munarnin pëman shayämurqan y kënö tapuyarqan: “¿Alliku kanman juk nuna ima asuntullapitapis warmimpita divorciakurinan?”.  Tsëta contestarnam pëqa kënö nirqan: “¿Manaku leyiyarqunki qallananchö nunakunata kamaqqa ollquta y warmita ruranqanta,  y kënö ninqanta: ‘Tsëmi ollquqa teytanta y mamanta jaqirinqa y warminman laqakanqa, y ishkankunam juk ëtsallana kayanqa’?  Tsëmi, ishkaqnatsu kayan, sinöqa juk ëtsallanam. Tsënö këkaptinqa, juk yüguman Dios juntanqantaqa, ama ni pipis rakitsuntsu”.  Pëkunanam kënö niyarqan: “Tsëqa, ¿imanirtaq Moisesqa nirqan divorciu papelnin qoykurnin pipis warmimpita rakikäkurinampaq?”.  Pënam kënö nirqan: “Chukru shonqu kayaptikim Moisesqa permitirqan warmikikunapita divorciakuyänëkita, peru qallananchöqa manam tsënötsu karqan.  Peru noqam niyaq, pipis majan rakcha* rurëman* mana ishkishqa këkaptin warmimpita divorciakurir jukwan casakoq kaqqa, mana majanwan oqllanakïmanmi ishkishqa”. 10  Qateqninkunanam kënö niyarqan: “Ollquwan warmi tsënö kayänan këkaptinqa, manam conviënintsu casakï”. 11  Pënam kënö nirqan: “Manam llapan nunakunatsu nikanqäta rurëta puëdiyan, sinöqa tsë qarëta katseq kaqkunallam.* 12  Porqui kanmi tsënö yurikushqa karnin japallan kakoqkuna, jina kanmi nunakuna kapashqa kayaptin japallan kakoqkunapis, y wakinnam, ciëluchö Gobiernurëkur japallankuna kakuyan. Pipis japallan këta puëdeq kaqqa, japallan kakutsun”. 13  Tsëpitanam nunakunaqa wamrakunata pëman apayämurqan bendicinampaq y pëkunapaq Diosman mañakunampaq, peru qateqninkunaqa piñapäyarqanmi.* 14  Tsënö kaptimpis Jesusqa kënömi nirqan: “Wamrakuna yamë kakuyänanta jaqiyë, y noqaman shayämunanta ama michëta tïrayëtsu, porqui ciëluchö Gobiernuqa pëkunanö kaqkunapaqmi”. 15  Y pëkunaman makinta churarninmi bendicirqan, y nïkurnam, tsëpita ëwakurqan. 16  Tsëpitanam, ¡rikë!, juk nuna pë kaqman witirqan y kënö nirqan: “Maestru, ¿ima allitataq ruranä imëyaqpis kawakïta chaskinäpaq?”. 17  Pënam kënö nirqan: “¿Imanirtaq noqata tapumanki ima alli kanqampaq? Jukllaqllam kan alli kaqqa. Tsënö kaptimpis, kawëta chaskita munarqa, Diospa mandakïninkunata imëpis wiyakï”. 18  Pënam, “¿mëqankunata?” nirqan. Jesusnam kënö nirqan: “Manam pitapis wanutsinëkitsu, mana majëkiwanqa manam oqllanakunëkitsu, manam suwakunëkitsu, manam pitapis tumpanëkitsu, 19  teytëkitawan mamänikita precisaqpaq churar respetë y nuna mayikitam kikikitanö kuyanëki”. 20  Tsë jövinnam kënö nirqan: “Tsë llapankunatam wiyakurqö; ¿ima masta ruranätaq pishin?”. 21  Jesusnam kënö nirqan: “Imëkachöpis chipyëpa alli këta munarqa, ëwë, y kapushunqëkikunata rantikïkï y tsë qellëta waktsakunata qoykï, tsëqa ciëluchömi fortünëki kapushunki; y shamï, qatimaqnï kë”. 22  Tsëta wiyëkurmi tsë jövinqa llakishqa ëwakurqan, porqui imëkayoqmi karqan. 23  Tsënam Jesusqa qateqninkunata kënö nirqan: “Rasuntam niyaq, alläpa sasam kanqa kapoqyoq* nuna ciëluchö Gobiernuman yëkunampaqqa. 24  Jina yapëmi niyaq, mas fäcilmi awjapa uchkumpa juk camëllu pasarinman, kapoqyoq nuna Diospa Gobiernunman yëkunampitaqa”. 25  Tsëta wiyëkurnam qateqninkunaqa mantsakäyarqan y kënö niyarqan: “Tsëqa, ¿pillanataq salvakïta puëdinman?”. 26  Tsënam pëkunata alleq rikëkurnin Jesusqa kënö nirqan: “Nunakunapaqqa tsëqa mana puëdipaqnömi, peru Diospaqqa llapampis puëdikanmi”. 27  Tsënam Pëdruqa contestarnin kënö nirqan: “¡Rikë! Noqakunaqa llapan imëkakunatam jaqiyarqö y qamta qatiyarqoq; tsëqa, ¿imataq noqakunapaq kanqa?”. 28  Jesusnam kënö nirqan: “Rasuntam niyaq, llapampis mushoq këman kutinqanchö nunapa Tsurin chipapäkïkaq täkunanman* täkuriptinmi, qamkunapis qatiyämaqni kaqkuna, chunka ishkë (12) gobernar täkunakunaman täkuyanki, y Israelpa chunka ishkë (12) kastankunata juzgayanki. 29  Y pipis wayinkunata, o wawqinkunata, o paninkunata, o teytanta, o mamäninta, o wamrankunata, o chakrankunata jutïrëkur jaqishqa kaqqa, pachak (100) kuti mastam chaskinqa y imëyaqpis kawakïmi herencian kanqa. 30  Peru mëtsikaq puntachö kaqkunam, qepachö kayanqa; y qepachö kaqkunanam, puntachö kayanqa.

Päginapa ura kuchunchö willakïkuna

Kënöpis niyanmi: qanra.
Griëgu idiömachö: por·nëi·a. Rikäri “Käyitsikïkuna” nishqanta.
Juk parlakïchöqa, soltëru kë qarëta chaskikoq kaqkunalla.
Kënöpis niyanmi: ajäpäyarqanmi.
Kënöpis niyanmi: rïcu.
Kënöpis niyanmi: trönunman.