Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Këchö Biblia | TRADUCCIÓN DEL NUEVO MUNDO DE LAS SANTAS ESCRITURAS

Mateu 14:1-36

IMAKUNA KANQAN

  • Juanpa peqanta muturiyan (1-12)

  • Pitsqa waranqa (5.000) nunakunata Jesus pachan qaran (13-21)

  • Yaku janampa Jesus purin (22-33)

  • Genesaret markachö kachakätsikun (34-36)

14  Tsë witsankunam Galilëa provinciata gobernaq Herödis, Jesuspaq parlayanqanta wiyarirqan,  y sirweqninkunatam kënö nirqan: “Tsëqa bautizakoq Juanmi. Wanushqakunapitam sharkatsimushqa kashqa, tsëmi tsë milagrukunata* rurëkan”.  Herödisqa wawqin Filïpupa warmin Herodïasrëkurmi* Juanta tsarïkatsirnin y cadenarkatsirnin carcelatsishqa karqan.  Porqui Juanqa kutin kutinmi kënö nishqa karqan: “Mana allitam rurëkanki pëta katsirnin”.  Peru wanutsita munarpis, nunakunatam mantsaq, porqui Juantaqa Diospa willakoqnintanömi* rikäyaq.  Peru Herödispa santunchömi, convidashqakunapa* nöpanchö Herodïaspa warmi wamran tushïkurqan,* y tsëta ruranqanmi Herödista alläpa kushitsirqan,  tsëmi jurarnin änirqan* imatapis mañanqanta qoykunampaq.  Tsënam tsë shipashqa mamänin yachatsishqa kaptin, kënö nirqan: “Juk jatun palta plätuchö Bautizakoq Juanpa peqanta* qomë”.  Tsënam reyqa alläpa llakikurqan, peru jurashqa kanqanrëkur y pëwan mikïkaqkunarëkurmi,* tsëta qoyänampaq mandakurqan, 10  tsëmi juk soldäduta kacharqan Juanpa peqanta carcelchö muturinampaq. 11  Juk jatun palta plätuchömi peqanta apamurqan y tsë shipashta qorqan, y pënam, maman kaqman aparqan. 12  Tsëpitanam Juanpa qateqninkuna shamïkur, ayanta apakuyarqan y pampëkuyarqan; y nïkurnam ëwar Jesusta willayarqan. 13  Tsëta wiyëkurnam Jesusqa japallan këta munarnin barcuman lloqarkur tsunyaq sitiuta ëwakurqan. Peru tsëta musyarirmi, mëtsika nunakuna markankunapita chakipa qatiyarqan. 14  Tsëpitanam barcupita yarpurir mëtsika nunakunata rikëkurnin, alläpa ankuparqan* y qeshyëkaqninkunata kachakätsirqan. 15  Peru ampïriptinnam,* qateqninkuna pë kaqman shamïkur kënö niyarqan: “Kë sitiuqa tsunyanmi, y alläpa tardinam, despachëkïna këchö këkaq mëtsika nunakunata caserïukunaman ëwar mikïninkuna rantiyänampaq”. 16  Peru Jesusnam kënö nirqan: “Manam precisantsu ëwakuyänan; qamkuna imallatapis mikuyänampaq qoyë”. 17  Pëkunanam kënö niyarqan: “Këchöqa manam imapis kayäpamantsu, sinöqa pitsqa tantakuna y ishkë pescädukunallam”. 18  Pënam, “këman apayämi” nirqan. 19  Y tsampa jananman täkuyänampaqmi tsëchö këkaq mëtsika nunakunata mandarqan. Nïkurmi pitsqa tantakunata y ishkë pescädukunata tsarirkur ciëluta rikärirqan, y bendicionta mañakurirmi, tsë tantakunata pakirqan y qateqninkunata qorqan, y qateqninkunanam, tsëchö këkaq mëtsika nunakunata qoyarqan. 20  Tsënam pachankuna juntanqanyaq llapankuna mikuyarqan, y chunka ishkë (12) canasta juntatam sobranqanta ëlluyarqan.* 21  Y mikoqkunaqa ollqullam pitsqa waranqanö kayarqan, peru warmikuna y wamrakunapis kayarqanmi. 22  Tsënam, qateqninkunata tsë höra nirqan tsëchö këkaq mëtsika nunakunata despachanqanyaq, barcuman lloqarkur qochapa wak tsimpanman tsimparëkäyänampaq. 23  Tsëpitanam, tsëchö këkaq mëtsika nunakunata despacharirnin, mañakunanrëkur jirkaman japallan witsarqan. Y tardiyäriptimpis, japallanmi tsëchö këkarqan. 24  Tsë hörapaqqa, patsapita atska pachak metrukuna* karuchönam barcuqa këkarqan, y yaku alläpa laqcheqsaptinmi avancëta puëdirqantsu, porqui vientum contrankunachö karqan. 25  Peru asqu asqullaraq** këkaptinmi, qocha janampa purirnin pëkuna kaqman shamurqan. 26  Y qocha janampa shamïkaqta rikëkurnam, qateqninkunaqa mantsakarnin kënö niyarqan: “¿Imataq taqë shamïkan?”.* Y mantsakarninmi qayarïkuyarqan.* 27  Peru Jesusqa jinan höram kënö nirnin parlaparqan: “¡Kallpata tsariyë! Noqam kä; ama mantsakäyëtsu”. 28  Pëdrunam kënö nirqan: “Teytë, qam karninqa yaku janampa qam kaqman shamunäpaq mandamë”. 29  Pënam, “¡shamï!” nirqan. Tsënam Pëdruqa barcupita yarpurirnin, yaku janampa purir Jesus kaqman ëwarqan. 30  Peru llutëpa y feyupa vientïkaqta rikëkurmi alläpa mantsakarqan. Y hundikar qallëkurnam, “¡Teytë, salvëkallämë!” nirnin qayarïkurqan. 31  Tsënam Jesusqa jinan höra makinta makyëkurnin tsarirkamurqan, y kënö nirqan: “Markäkïnin* pisheq nuna, ¿imanirtaq segürutsu karqunki?”. 32  Barcuman lloqarkuyaptinnam, llutëpa y feyupa vientïkanqan pärarirqan. 33  Tsënam barcuchö këkaqkunaqa respetarnin puntanman qonqurikuyarqan y kënö niyarqan: “Qamqa rasumpam Diospa Tsurin kanki”. 34  Y tsë qochata tsimparirnam, Genesaret markachö tsaki patsaman chäriyarqan. 35  Tsëchö reqirirnam, tsë sitiupita nunakunaqa entëru jiruroqnin* markakunachö tsëta musyatsikuyarqan, y nunakunanam, llapan qeshyëkaqkunata pëman apayämurqan. 36  Y janan kaq röpampa shalshanllatapis* yatëkuyänanta jaqinampaqmi rogakuyarqan, y llapan yatëkoq kaqkunam chipyëpa kachakäriyarqan.

Päginapa ura kuchunchö willakïkuna

Griëgu idiömachöqa “espantakïpaq rurëkunata” ninmi.
Kënöpis niyanmi: Herodïaspa jananmi.
Griëgu idiömachöqa “profëtatanömi” ninmi. Rikäri “Käyitsikïkuna” nishqanta.
Kënöpis niyanmi: invitashqakunapa.
Kënöpis niyanmi: tushuykurqan.
Kënöpis niyanmi: awnirqan.
Kënöpis niyanmi: umanta.
Griëgu idiömachöqa “tëkur mësaman kinkisharëkaqkunarëkurmi” ninmi.
Kënöpis niyanmi: llakiparqan.
Kënöpis niyanmi: tsakäriptinnam; tutapäriptinnam.
Kënöpis niyanmi: qoriyarqan.
Griëgu idiömachöqa “atska estadiukuna” ninmi. Juk estadiuqa pachak puwaq chunka pitsqa (185) metrum kaq.
Kënöpis niyanmi: tsaka tsakallaraq; rusqa rusqallaraq.
Griëgu idiömachöqa “chusku kaq riyëlla këkäna höra” ninmi. Jesus kawanqan witsan nunakunapaqqa, las tres de la mañänapitanö patsa waranqanyaqmi asqu asqullaraq kaq.
Griëgu idiömachöqa “¡Juk yuripukïmi!” ninmi.
Kënöpis niyanmi: qayaraykuyarqan.
Kënöpis niyanmi: yärakuynin.
Kënöpis niyanmi: jururushtin.
Kënöpis niyanmi: shamshilninllatapis.