Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Këchö Biblia | TRADUCCIÓN DEL NUEVO MUNDO DE LAS SANTAS ESCRITURAS

Mateu 10:1-42

IMAKUNA KANQAN

  • Chunka ishkë (12) apostolkuna (1-4)

  • Diospita willakïpaq yachatsikïkuna (5-15)

  • Jesuspa qateqninkuna chikishqa y sufritsishqa kayänan (16-25)

  • Diosta mantsayë, ama nunakunataqa (26-31)

  • Yamë këta apamoqtsu, sinöqa rakikëta (32-39)

  • Jesuspa qateqninkunata chaskeq (40-42)

10  Tsënam, chunka ishkë (12) qateqninkunata qayarqan y autoridänin qorqan mana alli* espïritukunata mandayänampaq y qarquyänampaq, y tukïläya nanatsikïyoqkunata y tukïläya qeshyayoqkunata kachakätsiyänampaq.  Chunka ishkë (12) apostolkunapa jutinkunaqa këkunam kayan: Simon, pëtam Pëdru nir reqiyan, y wawqin Andres; y Zebedeupa tsurin Santiäguwan wawqin Juan;  Felïpi y Bartolomë; Tomas y impuestukunata cobrakoq Mateu; Alfeupa tsurin Santiägu; Tadeu;  cananïta* niyanqan Simon, y Jüdas Iscariöti, pëmi tiempu pasariptin Jesusta rantikurqan.  Kë chunka ishkë (12) apostolninkunatam Jesusqa këkunata yacharatsir kacharqan: “Ama ëwayankitsu juk nacion nunakunamanqa, y ama Samariapa mëqan markankunamampis yëkuyankitsu;  tsëpa rantinqa, oqrakashqa üshakunanö këkaq Israel nacion kaqkunallaman ëwayë.  Ëwarnin, kënö nir willakuyanki: ‘Ciëluchö Gobiernuqa këllachönam këkan’.  Qeshyëkaqkunata kachakätsiyë, wanushqakunata kawaritsiyë, lepra qeshyayoqkunata kachakätsiyë, supëkunata qarquyë. Debaldillam chaskiyarqunki; debaldilla qoyë.  Ama qellë puritsina wachakëkikunachö öruta, ni plätata, ni cobrita apayëtsu, 10  ni viäjipaq mirkapata puritsina pikshata,* ni ishkë röpata,* ni juk par mas llanqita, ni juk mas tukruta apayëtsu; porqui peonqa mikïnin chaskinanmi. 11  Më markaman o caserïuman yëkurpis, alli chaskikoq kaqta tariyanqëkiyaq ashiyanki, y tsë sitiupita ëwakuyanqëkiyaq tsëchö quedakuyanki. 12  Wayiman yëkurirqa, tsëchö täraqkunata* saludakuyanki.* 13  Tsë wayichö chaskiyäshuptikiqa, yamë kayänanta munayanqëki pëkunachö katsun; peru mana chaskiyäshuptikiqa, yamë kayänanta munayanqëki qamkunaman kutimutsun. 14  Mëchöpis chäyanqëkichö pipis mana chaskiyäshuptiki ni wiyayäshuptikiqa, tsë wayipita o tsë markapita yarqurir chakikikunapita polvuta tapsikuriyë. 15  Rasuntam niyaq, Juiciu Junaqchöqa Sodömawan Gomörrapitapis tsë markaqa mas feyupa castigashqam kanqa. 16  ¡Rikäyë! Atoqkunapa* chowpinchö üshakunatanömi qamkunata kachëkäyaq; tsëmi culebranö mäkoq mäkoqlla,* peru palumanö manshu kayanqëkita rikätsikuyänëki. 17  Nunakunapita cuidakuyanki, porqui patsan kaq cortikunamanmi apayäshunki, y Diosta adorayänan wayinkunachömi astayäshunki. 18  ¡Jina gobernadorkunaman* y reykunamanmi noqarëkur apayäshunki, pëkunata y juk nacion nunakunata musyatsiyänëkipaq! 19  Tsënö kaptimpis, makinkunaman churayäshuptiki, ama yarpachakuyankitsu imata o imanö parlayänëkipaq kaqman, porqui tsë höram musyariyanki imata parlayänëkipaq kaqta; 20  porqui manam qamkunallatsu parlayanki, sinöqa Teytëkikunapa santu espïritunmi parlayänëkipaq yanapayäshunki. 21  Jinamampis, wawqinllam wawqinta wanïman chätsinqa, y teytanam wamranta, y wamrakunanam teytankunapa y mamankunapa contran sharkuyanqa y wanïman chätsiyanqa. 22  Y jutïrëkurmi qamkunataqa llapan nunakuna chikiyäshunki, peru ushananyaq alli tsarakushqa kaqmi salvakunqa. 23  Juk markachö chikir sufritsiyäshuptikiqa, juk markata ëwakuyanki, porqui rasuntam niyaq, Israel nacionpa llapan markankunachö willakur manaraq ushayaptikim, nunapa Tsurinqa chäramunqa. 24  Yachakïkaqqa manam yachatseqnimpa janampatsu këkan, ni manam sirwipakoqpis patronnimpa janampatsu këkan. 25  Yachakïkaqqa yachatseqninnö këman chanqanllawanmi kushikun, y sirwipakoqpis, patronninnö këman chanqanllawanmi kushikun. Wayiyoqtapis Satanas* nirnin jutikätsirqa, ¿manatsuraq wayinchö kaqkunatanäqa masraq tsënö jutitsiyanqa? 26  Tsëmi, pëkunata ama mantsayëtsu, porqui manam ni ima tsaparëkaqpis alëruman* mana yarqoqqa kantsu, ni ima pakarëkaqpis mana musyakaqqa kantsu. 27  Pakëllapa niyanqaqta, llapan nunakunata musyatsiyë, y rinrikikunallachö willayanqaqta, wayi janankunapita willakuyë. 28  Y cuerputa wanutsirpis kawëta* ushakätsita mana puëdeq kaqkunataqa ama mantsayëtsu; tsëpa rantinqa, cuerputawan kawëta* Gehënachö* ushakätsita puëdeq kaqta mantsayë. 29  ¿Manaku ishkë pichïsankataraq* juk mana alläpa väleq qellëllapaq* rantikuyan? Tsënö kaptimpis, Teytëkikuna mana musyëkaptinqa manam ni jukllëllapis patsaman ishkirintsu. 30  Peru qamkunapanäqa hasta peqëkikunachö* aqtsëkikunapis llapanmi yupashqa këkan. 31  Tsënö këkaptinqa, ama mantsakuyëtsu,* porqui qamkunaqa mëtsika pichïsankakunapitapis masmi väliyanki. 32  Pipis noqata reqimanqanta nunakunapa nöpanchö rikätsikuptinqa, noqapis ciëluchö këkaq Teytäpa nöpanchömi pëta reqinqäta rikätsikushaq. 33  Peru pipis nunakunapa nöpanchö negamaptinqa, noqapis ciëluchö këkaq Teytäpa nöpanchömi pëta negashaq. 34  Ama pensayëtsu patsaman yamë këta apamoq shamunqäta; manam yamë këta apamoqtsu shamurqö, sinöqa rakikëta* apamoqmi. 35  Awmi, rakikëta apamoqmi shamurqö, tsëmi tsuriqa teytampa contran kanqa, y warmi wamranam mamampa contran kanqa, y lumtsïnam suegrampa contran kanqa. 36  Rasumpa kaqchöqa, wayinchö täraqkunallam nunapa chikeqninkunaqa kayanqa. 37  Pipis teytanta o mamanta noqapitapis mas kuyaqqa, manam qatimaqnïpaqnötsu; y pipis ollqu wamranta o warmi wamranta noqapitapis mas kuyaqqa, manam qatimaqnïpaqnötsu. 38  Y pipis sufritsikoq qerunta* mana chaskikoq kaq y mana qatimaq kaqqa, manam qatimaqnïpaqnötsu. 39  Pipis kawëninta* tareq kaqqa, oqrarinqam, peru pipis kawëninta* noqarëkur oqraq kaqqa, tarinqam. 40  Qamkunata chaskiyäshoqnikikunaqa, noqatapis chaskimanmi, y noqata chaskimaq kaqqa, jina kachamaqnï Kaqtapis chaskinmi. 41  Pipis Diospa willakoqninta,* Diospa willakoqnin* kanqanrëkur chaskeqqa, Diospa willakoqninkuna* chaskiyanqan premiutam chaskinqa, y pipis alli kaqta ruraq nunata, alli kaqta ruraq kanqanrëkur chaskeqqa, alli kaqta ruraqkuna chaskiyanqan premiutam chaskinqa. 42  Y pishi* wamranö kaqkunapita mëqanllatapis qatimaqnï kanqanrëkur pipis juk väsu elaq* yakuta qarëkoq kaqqa, rasuntam niyaq, manam ni imanöpapis premiunta oqranqatsu”.

Päginapa ura kuchunchö willakïkuna

O: “melanëpaq”.
O: “imatapis shonqupita patsë y kushi kushilla ruraq”.
Kënöpis niyanmi: alporjata.
O: “trokakuyänëkipaq röpata”.
Kënöpis niyanmi: päraqkunata.
Judïukunaqa “yamë kë qamkunachö katsun” nirmi saludanakuyaq.
Griëgu idiömachöqa “löbukunapa” ninmi. Tsë animalkunaqa atoq niraqmi kayan, peru mas jatunmi.
Kënöpis niyanmi: mayaq mayaqlla.
Kënöpis niyanmi: gobernaqkunaman.
Griëgu idiömachöqa “Beelzebub” ninmi. Tsënöqa supëkunapa gobernaqnintam jutitsiyaq.
Kënöpis niyanmi: alayriman.
O: “yapë kawakï shuyäkïta ushakätsita mana puëdeq kaqkunata”.
O: “yapë kawakï shuyäkïta ushakätsita mana puëdeq kaqkunata”.
Rikäri “Käyitsikïkuna” nishqanta.
Kënöpis niyanmi: pichuychankataraq.
Griëgu idiömachöqa “juk asarionchö” ninmi. Tsë witsankunaqa, juk asarionqa chusku chunka pitsqa (45) minütu trabäjupita pägum kaq.
Kënöpis niyanmi: umaykikunachö.
Kënöpis niyanmi: mantsapakuyaytsu.
Griëgu idiömachöqa “espädata” ninmi.
Rikäri “Käyitsikïkuna” nishqanta.
O: “almanta”. Rikäri “Käyitsikïkuna” nishqanta.
O: “almanta”. Rikäri “Käyitsikïkuna” nishqanta.
Griëgu idiömachöqa “profëtata” ninmi. Rikäri “Käyitsikïkuna” nishqanta.
Griëgu idiömachöqa “profëta” ninmi. Rikäri “Käyitsikïkuna” nishqanta.
Griëgu idiömachöqa “profëtakuna” ninmi. Rikäri “Käyitsikïkuna” nishqanta.
Kënöpis niyanmi: ñushpi.
Kënöpis niyanmi: alaq.