Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Këchö Biblia | TRADUCCIÓN DEL NUEVO MUNDO DE LAS SANTAS ESCRITURAS

Marcus 5:1-43

IMAKUNA KANQAN

  • Mëtsika kuchikuna këkaqman mana alli espïritukunata Jesus kachan (1-20)

  • Jairupa warmi wamran; Jesuspa janan kaq röpanta juk warmi yatan (21-43)

5  Tsëpitanam, qochapa wak tsimpanman shayämurqan, Geräsa ëwë* nunakunapa markankunaman.  Y barcupita Jesus yarquriptinllam, juk mana alli espïritupa makinchö këkaq nuna sepultürakuna këkaqpita shamur pëwan toparirqan.*  Sepultürakuna këkaqchömi pëqa kakoq, y tsë witsanyaqqa, manam ni pipis alli watëta puëdeqtsu, ni cadënawampis.  Porqui mëtsika kutichömi makinta cadenayarqan y chakinkunaman grillëtikunata churayarqan, peru pëqa cadënakunatapis rachireqmi y chakinta tsaraq grillëtikunatapis witsikäratseqmi;* y manam pëta dominanampaq pipapis kallpan kaqtsu.  Y paqasta junaqtam imëpis sepultürakuna kaqchö y jirkakunachö qaparir qayarir y rumikunawan roqukur kakurqan.  Peru karupita Jesusta rikëkurninmi taripaqnin ëqipa* ëwarqan y puntanman qonqurikïkurqan.  Tsënam sinchipa kënö nirqan: “¿Imatataq noqapita munanki, Llapampa Janampa Këkaq Diospa Tsurin Jesus? Diospa jutinchö jurëkur mana sufritsimänëkipaqmi neq”.  Tsënöqa nirqan, Jesus kënö nikashqa kaptinmi: “Kë nunapita yarqï mana alli espïritu”.  Peru Jesusnam, “¿imataq jutiki?” nir tapurqan. Pënam kënö contestarqan: “Jutïqa Tröpam, porqui mëtsikaqmi kayä”. 10  Y kutin kutinmi Jesusta rogakurqan mana alli espïritukunata tsë markapita mana qarqurinampaq. 11  Tsë amänun jirkachönam, mëtsika kuchikuna mikïkäyarqan. 12  Tsënam tsë mana alli espïritukunaqa kënö nir rogakuyarqan: “Kuchikunaman kachëkayämë pëkunaman ulluyänäpaq”.* 13  Y pënam, tsëta rurayänanta jaqirirqan. Tsënam tsë mana alli espïritukunaqa yarquriyarqan y kuchikunaman ullukïkuyarqan, y llapan kuchikunam jirkampita qochaman jeqakurkuyarqan, ishkë waranqanö kuchikuna, y llapanmi qochachö shenqakar wanuriyarqan. 14  Peru kuchi mitseqkunaqa escaparmi* ëwakuyarqan, y tsë markachö y estanciakunachömi tsëta willakuyarqan, y nunakunanam pasakunqanta rikaq shayämurqan. 15  Tsënam Jesus kaqman chärayämurqan, y juk tröpa supëkunayoq kashqa nunatam vistishqatana y juiciunchöna tëkaqta rikäriyarqan, y alläpam mantsakäyarqan. 16  Jina supëyoq nunata y kuchikunata ima pasanqanta rikashqa kaqkunapis llapan pasakunqantam pëkunata willayarqan. 17  Tsëmi markankunapita ëwakunampaq Jesusta rogakur qallëkuyarqan. 18  Tsëpitanam barcuman lloqarkuptin,* supëyoq kashqa nuna rogakur qallëkurqan pëwan ëwananta jaqinampaq. 19  Peru pëqa manam qatinanta jaqirqantsu, sinöqa kënömi nirqan: “Wayikita ëwakï kastëkikuna kaqman, y qampaq Jehovä* imëkakunata ruramunqanta y alläpa ankupäshunqëkita* pëkunata willë”. 20  Tsënam tsë nunaqa ëwakurqan y pëpaq Jesus llapan ruranqankunata entëru Decäpolischö* willakur qallëkurqan, y llapan nunakunam espantakuyarqan. 21  Qochapa wak tsimpanman barcuwan yapë Jesus tsimpariptinnam, mëtsikaq nunakuna pë kaqman ëllukäriyarqan,* y pëqa qochapa kuchunchömi këkarqan. 22  Diosta adorayänan wayita rikaqkunapita Jairu jutiyoq nunam, shamurqan y rikëkurnin chakin kaqman qonqurikïkurqan. 23  Y kutin kutinmi kënö nir rogakurqan: “Warmi wamrallämi alläpa qeshyëkan.* Shamïkullë y makikita pëman churëkullë kachakärinampaq y kawar sïguinampaq”. 24  Tsënam Jesusqa pëwan ëwarqan, y mëtsikaq nunakunam pëta kichkir-raq qatiyarqan. 25  Tsëchömi chunka ishkë (12) watapana yawar ëwëwan qeshyaq warmi këkarqan. 26  Mëtsikaq doctorkunapa makinchömi pëqa alläpa sufrishqa karqan, y imëkantam ushashqa karqan, peru manam ni ichikllapis alliyashqatsu karqan, tsëpa rantinqa, masmi antsäkurkushqa karqan. 27  Tsënam Jesuspaq willakuyanqanta wiyarnin, qepampa ëwëkur mëtsikaq nunakunapa chowpimpa janan kaq röpanta yatëkurqan, 28  porqui kënömi neq: “Janan kaq röpanllatapis yatëkurninqa, kachakärishaqmi”. 29  Y jinan höram yawar ëwënin tsakirirqan, y alläpa sufritseq qeshyampita kachakärishqa kanqantam cuerpunchö mäkurirqan. 30  Tsë höram Jesuspis cuentata qokurirqan pëpita poder yarqushqa kanqanta, y mëtsikaq nunakunaman tumëkurmi kënö tapukurqan: “¿Pitaq janan kaq röpata yatamushqa?”. 31  Tsënam qateqninkunaqa kënö niyarqan: “¿Mëtsikaq nunakuna kichkikäyäshunqëkita rikëkarku, ‘¿pitaq yatamashqa?’ nirnin tapukunki?”. 32  Tsënö niyaptimpis, pëqa jiruroqnimpam* rikachakurqan tsëta rurashqa kaqta rikänampaq. 33  Tsënam tsë warmiqa ima pasashqa kanqanta musyarnin, alläpa mantsakashqa y karkaryëkar shamurqan, y puntanman qonqurikïkurmi rasumpa kaqta llapanta willarqan. 34  Pënam kënö nirqan: “¡Hïja! Markäkïnikim* kachakäratsishurqunki. Yamë ëwakï, y sufritsikoq qeshyëkipita kachakë”. 35  Manaraq parlar ushaptinmi Diosta adorayänan wayita rikaq nunapa wayimpita juk ishkë nunakuna shayämurqan y kënö niyarqan: “¡Warmi wamrëkiqa wanurishqanam! ¿Imapaqnataq Maestruta afanakatsinki?”. 36  Jesusnam tsënö parlayanqanta wiyarirqan y Diosta adorayänan wayita rikaq nunata kënö nirqan: “Ama mantsakëtsu, markäkïnikilla katsun”. 37  Y manam jaqirqantsu pipis qepanta ëwananta, sinöqa Pëdruta, Santiäguta, y Santiägupa wawqin Juanllatam. 38  Tsëllanam Diosta adorayänan wayita rikaq nunapa wayinman chäriyarqan, y büllayaqtam wiyarqan y qaparipa qayaripa waqaqkunatam rikärirqan. 39  Yëkurirnam kënö nirqan: “¿Imanirtaq waqayanki y büllata rurayanki? Shipashqa manam wanushqatsu, sinöqa punïkanmi”. 40  Tsënam nunakunaqa pëpita burlakurnin asikur qallëkuyarqan. Peru pëqa llapankunata waqtaman yarqaratsirmi, tsë shipashpa teytantawan mamäninta y pëwan këkaqkunata pusharkur, shipash këkanqanman yëkurirqan. 41  Tsëpitanam, shipashpa makinta tsarirkurnin, “Tal·i·tha cü·mi” nirqan, tsëqa, “shipash, noqam neq: ‘¡Sharkï!’” ninanmi. 42  Y jinan höram shipashqa sharkaramurqan y purir qallëkurqan. (Pëqa chunka ishkë (12) watayoqmi karqan.) Y tsë höram alläpa kushikurnin chipyëpa espantashqa quedariyarqan. 43  Peru pëqa kutin kutinmi tsë pasakunqanta pitapis mana willayänampaq pëkunata mandarqan,* y shipash mikurinampaq imallatapis qoyänampaqmi nirqan.

Päginapa ura kuchunchö willakïkuna

Kënöpis niyanmi: kinray.
Kënöpis niyanmi: tinkurirqan.
Kënöpis niyanmi: shikwakäratseqmi.
Kënöpis niyanmi: cörripa.
Kënöpis niyanmi: yaykuyänäpaq.
Kënöpis niyanmi: qeshpirmi; safarmi.
Kënöpis niyanmi: yarkurkuptin.
Rikäri “Käyitsikïkuna” nishqanta.
Kënöpis niyanmi: llakipäshunqaykita.
Rikäri “Käyitsikïkuna” nishqanta.
Kënöpis niyanmi: qorikäriyarqan.
O: “ushakärinampaqna këkan”.
Kënöpis niyanmi: entërupam.
Kënöpis niyanmi: yärakuynikim.
O: “alli buënu mandarqan”.