Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Këchö Biblia | TRADUCCIÓN DEL NUEVO MUNDO DE LAS SANTAS ESCRITURAS

Marcus 4:1-41

IMAKUNA KANQAN

  • DIOSPA GOBIERNUMPAQ IGUALATSIKÏKUNA (1-34)

    • Murukoq nuna (1-9)

    • Jesus imanir igualatsikïkunawan yachatsikunqan (10-12)

    • Murukoq nunapaq parlaq igualatsikï ima ninan kanqan (13-20)

    • Chiwchitaqa manam canastawantsu tsaparkuyan (21-23)

    • Inshinqëki tupu (24, 25)

    • Murukoq nuna punun (26-29)

    • Ñushta muru (30-32)

    • Igualatsikïkunawan yachatsikun (33, 34)

  • Yakuta alläpa laqcheqsätseq vientuta Jesus päratsin (35-41)

4  Yapëmi qocha kuchunchö yachatsikurnin qallëkurqan, y mëtsikaq nunakunam pë këkanqanman ëllukäriyarqan.* Tsëmi juk barcuman lloqarkur tsëman täkurirqan y qochapa ichik mas rurinman yëkurirqan, peru tsëchö këkaq mëtsika nunakunaqa llapanmi qochapa kuchunchö këkäyarqan.  Y imëkakunatam igualatsikïkunawan yachatsikur qallëkurqan, y yachatsikïkarninmi kënö nirqan:  “Wiyayë. ¡Rikäyë! Murukoq nunam muroq yarqurirqan.  Maqtsikaptinmi, wakin murukunaqa chakra kuchun näni kinrëman pintiyarqan,* tsënam pishqukuna shamïkur ushpakurkuyarqan.*  Wakinkunanam mana kaqlla allpayoq qaqa jananman shikwayarqan, y jananllachö karmi, raslla jeqarayämurqan.  Peru inti* yarqaramuptinmi ñukturiyarqan,* y watsinkuna* mana kaptinmi, tsakiriyarqan.  Y wakin murukunanam kashakunayoq allpaman shikwayarqan, y kashakuna winarkamurmi nitiriyarqan y winar sïguiyänanta jaqiyarqantsu, tsëmi wayuyarqantsu.  Peru wakinkunaqa alli allpamanmi shikwayarqan, y winayanqanmannö y poquyanqanmannömi wayur qallëkuyarqan, wakinmi kima* chunkapayan (30), wakinnam joqta chunkapayan (60), y wakinkunanam pachakpayan (100)”.  Tsëpitanam kënö nirqan: “Wiyanampaq rinriyoq kaqqa, wiyakutsun”. 10  Tsëpitanam, japallan këkaptin, chunka ishkë (12) apostolninkunawan lädunchö jiruroq* këkaqkuna tapupar qallëkuyarqan igualatsikïkunawan yachatsikunqampita. 11  Pënam kënö nirqan: “Qamkunataqa Diosmi permitiyäshunki Diospa Gobiernumpita pakarëkaq sagrädu willakïta käyiyänëkipaq,* peru wakinkunapaqqa igualatsikïkunallachömi llapampis quedarin. 12  Tsënöpa rikëkarpis, rikëkäyanqanta mana rikäyänampaq, y wiyëkarpis, wiyëkäyanqan ima ninan kanqanta mana käyiyänampaq; pëkunaqa manam ni imëpis mana alli rurëninkunata jaqiyanqatsu, ni perdonta chaskiyanqatsu”. 13  Jinamampis kënömi nirqan: “Qamkunaqa manam kë igualatsikï ima ninan kanqanta käyiyankitsu, tsëqa, ¿imanöraq wakin igualatsikïkuna ima ninan kanqanta käyiyanki? 14  Murukoq nunaqa, Diospa willakïnintam murun. 15  Këkunam kayan Diospa willakïnin murukanqan chakra kuchun näni kinrë; pëkuna wiyakuriyaptinmi, Satanas shamïkurnin pëkunapa shonqunkunachö murushqa këkaq Diospa willakïninta apakun. 16  Jina tsënöllam, muru shikwanqan mana kaqlla allpayoq qaqaqa kayan, Diospa willakïninta wiyakurir, kushishqa chaskikoqkuna. 17  Tsënö kaptimpis, watsinkuna* mana kaptinmi juk tiempulla kariyan; tsënam Diospa willakïninrëkur sufrimientukuna shamuptin o chikirnin imëkata rurar qallëkuyaptin, ishkiriyan. 18  Y wakinnam muru shikwanqan kashakunayoq allpa kayan. Pëkunam Diospa willakïninta wiyakoqkuna kayan, 19  peru kanan witsanchö* tukïpaq yarpachakïkuna, engañakoq imëkayoq këta munë y imëkakunata munë shonqunkunaman yëkurmi, wiyakuyanqanta nitirin, y wayuyantsu. 20  Y muru shikwanqan alli allpanam kayan, Diospa willakïninta shumaq wiyakoq, chaskikoq, y kima* chunkapayan (30), joqta chunkapayan (60), y pachakpayan (100) wayoqkuna”. 21  Jina kënöpis nirqanmi: “Chiwchitaqa manam canastawantsu* tsaparkuyan o cäma jawanmantsu churayan, ¿aw? ¿Manaku chiwchi churakunaman churayan? 22  Porqui manam ni ima pakarëkaqpis mana musyakaqqa kantsu; ni ima yachëllapa tsapashqapis alëruman* mana yarqoqqa kantsu. 23  Wiyanampaq rinriyoq kaqqa, wiyakutsun”. 24  Jina kënöpis nirqanmi: “Wiyëkäyanqëkita shumaq wiyakuyë. Tupuyanqëki tupuwanmi kikikikunapaqpis tupuyämunqa,* awmi, hasta mastapis. 25  Porqui imayoqpis kaqtaqa mastam qoyanqa, y mas atskam kapunqa, peru mana imayoqpis kaqtaqa, hasta kapunqantapis qochiriyanqam”.* 26  Y kënö nirmi sïguirqan: “Diospa Gobiernunqa juk nuna muruta patsaman maqtseqnömi. 27  Pëqa paqaspam punun y junaqpam shärikun, y murukunaqa jeqarayämunmi y jatunmi winayan, peru imanö pasakunqantaqa, pëqa manam musyantsu. 28  Patsaqa kikinllam winatsirnin wayutsin: puntatam tullunta, tsëpitanam espïganta, y nïkurnam, espïgachö gränunta juntaratsin. 29  Peru poquriptinqa, ösinwanmi segaramun, porqui cosëcha witsannam chärishqa”. 30  Y kënö nirmi sïguirqan: “¿Imatawanraq Diospa Gobiernunta igualatsishwan, o ima igualatsikïwanraq käyitsikushwan?* 31  Diospa Gobiernunqa ñushta* murunömi, patsaman muruyanqan höraqa, patsachö llapan murukunapitapis mas uchukllanllam. 32  Peru mururiyaptinqa, winaramunmi, y huertachö llapan plantakunapitapis mas jatunmi tikrarin, y jatun rämakunayoqmi tikrarin, tsëmi pishqukunapis tsëchö qeshunkuna rurayan y arwäkuyan”.* 33  Tsënö igualatsikïkunawanmi Diospa willakïninta nunakunata parlapaq, käyita puëdiyanqanmannölla. 34  Rasumpa kaqchöqa, mana igualatsikïkunawanqa manam yachatsikoqtsu, peru qateqninkunataqa llapan parlanqankunatam japallankuna këkäyaptin käyitseq. 35  Tsë junaqmi, ampïriptin* kënö nirqan: “Qochapa wak tsimpanman ëwashun”. 36  Tsëmi tsëchö këkaq mëtsika nunakunata witsiratsirnin, pëkunaqa këkanqantanölla barcuwan apayarqan, y juk barcukunapis lädunkunachöqa karqanmi. 37  Tsënam llutëpa y feyupa vientur qallëkurqan, tsëmi yaku laqcheqsar barcuman winakar sïguirqan, y ichikllanam pishirqan barcuman yaku juntarinampaq. 38  Peru pëqa barcupa sikin kaqchömi këkarqan, jawna jananchö punurnin. Tsëmi riyatsiyarqan* y kënö niyarqan: “Maestru, ¿manaku imapis qokushunki ushakärinantsikpaqna këkashqa?”. 39  Tsënam, sharkurqan y vientuta piñapëkurqan* y qochata kënö nirqan: “¡Upälla! ¡Ama büllëtsu!”. Y tsë höram vientu pärarirqan, y llapanmi kanqanman chipyëpa kutikärirqan. 40  Tsënam kënö nirqan: “¿Imanirtaq alläpa mantsakäyanki?* ¿Manaraqku ichikllapis markäkïnikikuna* kan?”. 41  Peru pëkunaqa chipyëpam mantsakäyarqan y kikinkunapuram kënö ninakuyarqan: “Rasumpa kaqchöqa, ¿pitaq kë nunaqa? Hasta vientuwan qochapis pë ninqantataq cäsuyan”.

Päginapa ura kuchunchö willakïkuna

Kënöpis niyanmi: qorikäriyarqan.
Kënöpis niyanmi: shikwayarqan.
Kënöpis niyanmi: upshakurkuyarqan; uchukurkuyarqan.
Kënöpis niyanmi: rupay.
Kënöpis niyanmi: wanukäriyarqan.
Kënöpis niyanmi: matsunkuna; sipinkuna; chapankuna.
Kënöpis niyanmi: kimsa.
Kënöpis niyanmi: jirurushtin.
Kënöpis niyanmi: entiendiyänaykipaq.
Kënöpis niyanmi: matsunkuna; sipinkuna; chapankuna.
O: “kanan imëkapis imanö këkanqanchö”. Rikäri “Käyitsikïkuna” nishqanta.
Kënöpis niyanmi: kimsa.
O: “tupukuna canastawantsu”.
Kënöpis niyanmi: alayriman.
Kënöpis niyanmi: “mediyanqëki medïdawanmi kikikikunapaqpis mediyämunqa”.
Kënöpis niyanmi: qechuriyanqam.
Kënöpis niyanmi: entienditsikushwan.
Kënöpis niyanmi: mostäza.
Kënöpis niyanmi: llantukuyan.
Kënöpis niyanmi: tutapäriptin.
Kënöpis niyanmi: rikchatsiyarqan; riwatsiyarqan.
Kënöpis niyanmi: ajäpaykurqan.
O: “¿Imanirtaq mantsallïshu kayanki?”.
Kënöpis niyanmi: yärakuynikikuna.