Llapan kanqanman ëwari

Qallananchö tïtulukunaman ëwë

Jehoväpa testïgunkuna

Idiömata akrë Quechua (Ancash)

Marcus 3:1-35

IMAKUNA KANQAN

  • Makin tsakishqa nuna kachakätsishqa kanqan (1-6)

  • Qocha kuchunchö mëtsikaq nunakuna (7-12)

  • Chunka ishkë (12) apostolkuna (13-19)

  • Santu espïritupa contran ofendipa parlë (20-30)

  • Jesuspa mamänin y wawqinkuna (31-35)

3  Jina juk kutichönam, Diosta adorayänan wayiman yapë yëkurqan, y tsëchömi makin tsakishqa* nuna këkarqan.  Tsëmi fariseukunaqa rikarëkäyarqan Säbadu këkaptin tsë nunata kachakätsinampaq kaqta o mana kachakätsinampaq kaqta rikäyänampaq, tsënöpa tsëpita acusayänampaq.  Jesusnam tsë makin tsakishqa* nunata kënö nirqan: “Sharkï y chowpiman shamï”.  Tsëpitanam pëkunata kënö nirqan: “¿Alli kaqta rurëku o mana alli kaqta rurëku Säbaduchöqa alli? ¿Pipa kawënintapis* salvëku o wanutsiku?”. Peru pëkunaqa manam ni imatapis niyarqantsu.  Tsënam jiruroqninchö* llapan këkaqkunata alläpa piñashqa* rikëkur, y rumi shonqu kayanqampita alläpa llakikurnin tsë nunata kënö nirqan: “Makikita kamämï”. Y kamäriptinnam, makin sänu tikrarirqan.*  Tsëta rikëkurnam fariseukunaqa tsëpita yarquyarqan y Herödispa qatiraqninkunawan tsë höra ëllukärir* wanutsiyänampaq yachatsinakuyarqan.  Peru Jesusqa qateqninkunawanmi qochaman ëwayarqan, y Galilëa provinciapita y Judëa provinciapitam mëtsikaq nunakuna qatiyarqan.  Hasta Jerusalenpita, Idumëa provinciapita, Jordan mayupa wak tsimpan kinrëpita, y Tïrupa y Sidonpa jiruroqninkunapitam* ruranqankunata wiyarnin mëtsikaq nunakuna pë kaqman shayämurqan.  Y qateqninkunatam nirqan ichikllan barcuta listuta katsiyänampaq, tsënöpa mëtsikaq karnin nunakuna kichkipäyaptin tsëman lloqanampaq. 10  Mëtsikaqta kachakätsishqa kaptinmi, alläpa nanatsikïkunayoq kaqkuna kichkinakur-raq llapankuna yatëta munayarqan. 11  Hasta mana alli espïritukunapis pëta rikëkurqa nöpanman qonqurikïkurmi sinchipa kënö niyaq: “Qamqa Diospa Tsurinmi kanki”. 12  Peru mëtsika kutim alli atikarqan* pëpita mana musyatsikuyänampaq. 13  Tsëpitanam juk jirkaman witsarqan y akranqan kaqkunata qayatsirqan, tsënam pë kaqman shayämurqan. 14  Y chunka ishkë (12) nunakunawanmi juk grüputa patsätsirqan, pëkunatam apostolkuna nir qayarqan y pëkunam yanaqar puriyarqan, y tiempuwanqa pëkunatam willakoq kacharqan 15  y supëkunata qarquyänampaq autoridäninkuna qorqan. 16  Y chunka ishkë (12) apostolkunata patsätsinqan grüpuchöqa këkunam kayarqan: Simon, pëtam Pëdru nir jutin churarqan,* 17  Zebedeupa tsurin Santiägu, y Santiägupa wawqin Juan (jina pëkunatam Boanerges nirnin jutitsirqan, tsëqa, “Räyupa* Tsurinkuna” ninanmi), 18  Andres, Felïpi, Bartolomë, Mateu, Tomas, Alfeupa tsurin Santiägu, Tadeu, cananïta* niyanqan Simon, 19  y Jüdas Iscariöti, pëmi tiempu pasariptin Jesusta rantikurqan.* Tsëpitanam, juk wayiman yëkurirqan, 20  y yapëmi mëtsikaq nunakuna ëllukäriyarqan,* tsëmi pëkunaqa mikurillatapis puëdiyarqantsu. 21  Peru kastankuna tsëta wiyarirqa, “juiciuntam oqrashqa” nirmi tsareqnin ëwayarqan. 22  Jina Jerusalenpita urämushqa Ley qellqaqkunapis kënömi niyaq: “Satanasmi* ullupushqa,* y supëkunata gobernaqpa yanapakïninwanmi supëkunata qarqun”. 23  Tsëmi pëkunata qayarirnin igualatsikïkunawan parlapar kënö nirqan: “¿Imanötaq Satanasqa Satanasta qarqunman? 24  Mëqan gobiernupis kikinkunapura rakikashqa karqa, tsë gobiernuqa manam tsarakunqatsu; 25  y juk wayichö kikinkunapura rakikashqa karqa, manam tsë wayichö tsarakuyanqatsu. 26  Jina tsënöllam Satanaspis kikimpa contranlla sharkushqa kar y rakikëman chashqa karqa, manam tsarakïta puëdinqatsu, sinöqa ushakëmanmi chanqa. 27  Rasumpa kaqchöqa, kallpayoq nunapa wayinman pipis yëkoqqa, manam imëkantapis suwëta puëdinqatsu tsë kallpayoq nunata manaraq pankarqa. Tsëta rurar-ran imëkantapis wayimpita apakïta puëdinqa. 28  Rasuntam niyaq, nunakunapa tsurinkunaqa llapan rurayanqampitam perdonashqa kayanqa, ima jutsata rurayanqampitapis y imatapis ofendikïpa parlayanqampitapis. 29  Peru pipis santu espïritupa contran ofendipa parlaqqa, manam ni imëpis perdonashqatsu kanqa, sinöqa imëyaqpis condenashqa këman chätsikoq jutsapitam culpayoq kanqa”. 30  Tsëtaqa nirqan “mana alli espïritum ullupushqa”* niyaptinmi. 31  Tsënam mamänin y wawqinkuna shayämurqan, y waqtachömi shëkäyarqan, tsëmi qayamunampaq juk nunata kachayarqan. 32  Mëtsikaq nunakunam pëpa lädunchö jiruroq* tëkäyarqan, tsëmi kënö niyarqan: “¡Rikë! Mamänikiwan wawqikikunam waqtachö këkäyan y qampaqmi tapukïkäyan”. 33  Pënam kënö contestarqan: “¿Pikunataq mamänï y wawqïkuna kayan?”. 34  Tsënam jiruroqninchö tëkaqkunata rikärirqan y kënö nirqan: “Rikäyë: ¡mamänï y wawqïkuna! 35  Pipis Diospa munëninta ruraq kaqmi wawqï, panï y mamänï”.

Päginapa ura kuchunchö willakïkuna

O: “makinta kuyutsita mana puëdeq”.
O: “makinta kuyutsita mana puëdeq”.
O: “almantapis”. Rikäri “Käyitsikïkuna” nishqanta.
Kënöpis niyanmi: entëru kuchunchö.
Kënöpis niyanmi: ajashqa.
O: “kutikärirqan”.
Kënöpis niyanmi: qorikärir.
Kënöpis niyanmi: entëru kuchunkunapitam.
Kënöpis niyanmi: alli buënu willarqan.
Kënöpis niyanmi: qayarqan.
Kënöpis niyanmi: tillaqupa.
O: “imatapis shonqupita patsë y kushi kushilla ruraq”.
Kënöpis niyanmi: traicionarqan.
Kënöpis niyanmi: qorikäriyarqan.
Griëgu idiömachöqa “Beelzebubmi” ninmi. Tsënöqa supëkunapa gobernaqnintam jutitsiyaq.
Kënöpis niyanmi: yaykapushqa.
Kënöpis niyanmi: yaykapushqa.
Kënöpis niyanmi: jirurushtin.