Llapan kanqanman ëwari

Qallananchö tïtulukunaman ëwë

Jehoväpa testïgunkuna

Idiömata akrë Quechua (Ancash)

Marcus 14:1-72

IMAKUNA KANQAN

  • Jesusta wanutsiyänampaq sacerdötikuna yachatsinakuyan (1, 2)

  • Jesuspa peqanman pukutaq aceitita juk warmi jichan (3-9)

  • Jesusta Jüdas rantikun (10, 11)

  • Ushanan kaq Pascua fiesta (12-21)

  • Señorpa Cënan patsakan (22-26)

  • Pëdru neganampaq kaq puntallapitana willakï (27-31)

  • Getsemanï sitiuchö Diosman Jesus mañakun (32-42)

  • Jesusta tsaririyan (43-52)

  • Judïukunapa Precisaq Cortinchö Jesusta juzgayan (53-65)

  • Jesusta Pëdru negan (66-72)

14  Tsëpita ishkë junaqllatanam Pascua fiesta y Levadürannaq Tantata Mikuyänan fiesta kanan karqan. Y precisaq sacerdötikuna y Ley qellqaqkunam* imëkata pensayarqan yachëllapa tsariyänampaq* y wanutsiyänampaq.  Porqui kutin kutinmi kënö niyarqan: “Ama fiestachöqa; itsapis nunakuna contrantsik büllar shärikurkuyanqa”.  Y Betaniachö lepra qeshyayoq niyanqan Simonpa wayinchö mikïkaptinnam,* juk warmi shamurqan alabastru rumipita rurashqa botëllachö alläpa chaniyoq y ni imawampis mana takushqa nardupita* rurashqa pukutaq* aceitin tsarashqa. Y tsë alabastru botëllapa kunkantam pakipa kicharirqan y pëpa peqanmanmi jichar* qallëkurqan.  Tsëta rikëkurnam wakinkunaqa piñar* kikinkunapura kënö ninakur qallëkuyarqan: “¿Imanirtaq tsë pukutaq aceitita perditsin?  ¡Tsë pukutaq aceitiqa kima pachak (300) denariupitapis* maschömi rantikushqa kanman karqan, y tsë qellëtaqa waktsakunatam qoshwan karqan!”. Tsëmi tsë warmiwan alläpa piñashqa këkäyarqan.*  Peru Jesusnam kënö nirqan: “Yamë kakunanta jaqiyë. ¿Imanirtaq pëpaq tsënö parlayanki? Pëqa alläpa allitam noqapaq rurashqa.  Porqui waktsakunataqa qamkunawanmi imëpis katsiyanki, y munayanqëki höram yanapëta puëdiyanki, peru noqataqa manam llapan tiemputsu katsiyämanki.  Pëqa llapan puëdinqantam rurashqa; pampakänäpaq alistamarnïmi puntallapitana pukutaq* aceitita cuerpüman jichamushqa.  Rasuntam niyaq, më tsëchöpis nunakuna kayanqanchö alli willakïkunata willakuyanqanchöqa, kë warmi yarpashqa kanampaqmi ruranqanta willakuyanqa”. 10  Y chunka ishkë (12) apostolninkunapita juk kaqmi, Jüdas Iscariöti, precisaq sacerdötikunaman ëwarqan Jesusta makinkunaman rantikïkunampaq.* 11  Tsëta wiyarirnam pëkunaqa alläpa kushikuyarqan, y pläta metal qellëta qoyänampaqmi äniyarqan.* Tsëmi pëqa rantikïkunampaq alli tiemputa ashir qallëkurqan. 12  Tsëpitanam, Levadürannaq Tantata Mikuyänan fiestapa qallanan junaqchö, costumbrinkunamannö Pascua fiestachö pishtashqa ofrendata qoyanqan junaq, qateqninkuna kënö niyarqan: “¿Mëta ëwayänätataq munanki y Pascua mikïta mikunëkipaq mëchö alistayämunätataq munanki?”. 13  Tsënam pëqa ishkë qateqninkunata kacharqan kënö nir: “Markaman ëwayë, tsëchömi yakupaq mitupita rurashqa kuntuta* apëkaq nunawan topariyanki.* Pëta qatir ëwayë, 14  y yëkunqanchö, wayiyoqta kënö niyanki: ‘Maestrum kënö nin: “¿Mëchötaq convidashqakunapaq cuartu këkan, qateqnïkunawan Pascua fiesta mikïta mikunäpaq?”’. 15  Y pëmi altuschö këkaq juk jatun y wananqantsikwan alistashqa cuartuta rikätsiyäshunki. Tsëchö Pascua fiesta mikïta noqantsikpaq alistapakuyë”. 16  Tsënam qateqninkunaqa yarquriyarqan y markaman yëkuriyarqan, y pë ninqantanöllam tariyarqan, y Pascua fiestapaqmi alistapakuyarqan. 17  Ampïrinqanchönam chunka ishkë (12) apostolninkunawan shamurqan. 18  Y tëkur* mësaman kinkishëkur mikïkäyaptinnam, Jesus kënö nirqan: “Rasuntam niyaq, noqawan mikur këkaqkunapitam juknikikuna rantikamanqa”.* 19  Pëkunanam alläpa llakikur qallëkuyarqan y juknin jukninmi kënö niyarqan: “¿Manam noqallätsu aw?”. 20  Pënam kënö nirqan: “Chunka ishkëkipita (12) juk kaqmi, noqawan juntu tsë tazonllaman tantanta tullpoqmi. 21  Awmi, nunapa Tsurinqa pëpaq qellqarëkanqannöllam ëwakunqa, peru ¡allaw, nunapa Tsurinta rantikoq nuna! Tsë nunapaqqa mas allim kanman karqan mana yurikunqan”. 22  Mikurëkäyaptinmi pëqa juk tantata tsarirkurqan, y Diosta mañakurir pakirirqan, nïkurmi pëkunata qorqan y kënö nirqan: “Kë tantata mikuyë. Këqa cuerpü cuentam”. 23  Y juk cöpata tsarirkurnam, Diosta agradecikurir pëkunata qorqan, y llapankunam tsë cöpapita upuyarqan. 24  Y kënömi nirqan: “Këqa ‘conträtupaq yawarnï’ cuentam, mëtsikaq nunakunarëkurmi ramashqa kanqa. 25  Rasuntam niyaq: manam ni imanöpapis vïnuta mas upushaqnatsu, hasta Diospa Gobiernunchö mushoq vïnuta yapë upunqä junaqyaq”. 26  Tsëpitanam, cantarnin Diosta alabarir,* Olïvus jirkaman ëwayarqan. 27  Y Jesusnam kënö nirqan: “Llapëkikunam ishkitsishqa kayanki, porqui kënömi qellqarëkan: ‘Mitseqtam wanuratsishaq, y üshakunam witsikar* ëwakuyanqa’. 28  Peru wanunqäpita sharkaramurqa, puntëkikunatam Galilëa provinciaman ëwashaq”. 29  Peru Pëdruqa kënömi nirqan: “Llapankunata ishkitsiyaptimpis, ¡noqataqa manam ishkitsiyämanqatsu!”. 30  Tsënam Jesusqa kënö nirqan: “Rasuntam neq, kananmi, awmi, kanan paqastämi, manaraq juk gällu ishkë kuti cantaptin, kima* kuti negamanki”. 31  Peru pëqa kënö nirmi sïguirqan: “Qamwan wanunä kaptimpis, manam ni imanöpapis negashqëkitsu”. Jina wakin kaq qateqninkunapis llapanmi tsënö nir qallëkuyarqan. 32  Tsënam Getsemanï jutiyoq sitiuman chäriyarqan, y pënam qateqninkunata kënö nirqan: “Këchö tëkäyë Diosman mañakunqäyaq”. 33  Y tsëta nirirnam Pëdruta, Santiäguta y Juanta pusharkur ëwakurqan. Tsënam alläpa llakikur y pasëpa yarpachakur qallëkurqan. 34  Tsëmi pëkunata kënö nirqan: “Alläpa llakishqam këkä*, hasta wanunanqäyaq. Këchö quedakuyë, y noqawan juntu mäkoq mäkoqlla* këkäyë”. 35  Y ichik mas washaman ëwarirmi, qonqurikïkur patsaman puktïkur* mañakur qallëkurqan puëdikaptinqa tsë hörapa mana pasanampaq. 36  Y kënömi neq: “Abba,* Teytallä, qampaqqa llapampis puëdikanmi; noqalläpita kë cöpata pasëkatsillë. Peru ama noqa munanqänöqa, sinöqa qam munanqëkinö”. 37  Kutirirnam punïkäyaqta taririrqan, y Pëdrutam kënö nirqan: “Simon, ¿punïkankiku? ¿Manaku juk hörallapis mäkoq mäkoqlla këkänëkipaq kallpëki kashqa? 38  Mäkoq mäkoqlla* y mañakur këkäyë, tsënöpa tentacionman mana ishkiyänëkipaq. Rasumpa kaqchöqa, nunaqa alli kaqtam rurëta munan, peru jutsasapa ëtsanqa dëbilmi”. 39  Y yapëmi ëwarqan y puntata mañakur ninqannöllam mañakurqan. 40  Y yapë kutiramurpis, jina yapëmi punukashqa këkäyaqta tarirqan, punï alläpa nitiptinmi punukashqa këkäyarqan, tsëmi ni ima nitapis musyayarqantsu. 41  Y kima kaq kutichö kutirirnam kënö nirqan: “¡Kë precisaq hörachöran qamkunaqa punïkäyanki y jamëkäyanki! ¡Ama punurnin sïguiyënatsu! ¡Höra chäramushqanam! ¡Rikäyë! Nunapa Tsurinmi jutsasapakunapa makinman rantikushqa* këkan. 42  Sharkuyë, aku ëwakushun. ¡Rikäyë! Rantikamaqnïqa këchönam këkan”. 43  Tsëllanam, parlar manaraq ushaptin, chunka ishkë (12) apostolninkunapita Jüdas jutiyoq kaq chäramurqan, y pëwanmi precisaq sacerdötikuna, Ley qellqaqkuna* y respetashqa nunakuna kachayanqan mëtsikaq nunakuna espädankunawan y garrutinkunawan këkäyarqan. 44  Y rantikoqnin kaqqa kënö nirmi pëkunata juk señalta qoshqa karqan: “Mutsanqä kaqmi kanqa, pëta tsariyanki, y escapananta* mana jaqishpa apakuyanki”. 45  Y defrenti shamurmi pëman witirirnin, “¡Maestru!”* nirqan, y nïkurmi kuyëllapa mutsëkurqan. 46  Tsënam pëkunaqa tsaririyarqan y prësuriyarqan. 47  Peru Jesuswan këkaqkunapita juk kaqmi espädanta sutaramurqan, y mandakoq kaq sacerdötipa sirweqnimpa rinrinta shikwaqpaq wallurapurqan.* 48  Tsënam Jesusqa kënö nirqan: “¿Imëka suwatanö tsariyämänëkipaqku espädëkikunawan y garrutikikunawan shayämurqunki? 49  Waran waranmi templuchö yachatsikurnin qamkunawan këkarqä, peru tsënö kaptimpis manam tsariyämarqëkitsu. Peru kë llapankunaqa pasakushqa Diospa Palabran cumplikänampaqmi”. 50  Y llapankunam pëta jaqirïkur escapar* ëwakuyarqan. 51  Tsënö kaptimpis, qaran jananllaman lïnupita rurashqa röpan vistishqam, juk jövin karu qepanllata qatir qallëkurqan, y pëtapis tsaritam munayarqan, 52  peru lïnupita rurashqa röpanta jaqirirmi qalapächu* escapar* ëwakurqan. 53  Tsënam mandakoq kaq sacerdötiman Jesusta apayarqan, y llapan precisaq sacerdötikuna, respetashqa nunakuna y Ley qellqaqkunam* ëllukäyarqan.* 54  Peru Pëdruqa karu qepantam qatir ëwarqan hasta mandakoq kaq sacerdötipa patiunyaq; y tsë wayichö sirwipakoqkunawan juntum tëkarqan y ninapa nöpanchömi qoñükïkarqan. 55  Tsëyaqnam, precisaq sacerdötikuna y Judïukunapa Precisaq Cortinchö këkaqkuna, wanutsiyänanrëkur Jesuspa contran parlaq willakïkunata ashiyarqan, peru manam tariyarqantsu. 56  Rasumpa kaqchöqa mëtsikaq testïgukunam contran parlayarqan, peru manam kaqllatatsu parlayaq. 57  Jina wakinkunanam sharkuyarqan y pëpa contran parlar kënö niyarqan: 58  “Noqakunam kënö neqta wiyayarqö: ‘Noqaqa nunakuna kë templuta makinkunawan rurayanqantam juchuratsishaq y kima junaqllachömi jukta sharkaratsishaq y tsëqa manam nunapa makinwan rurashqatsu kanqa’”. 59  Peru tsënö tumpaqkunapis, manam kaqllataqa* parlayarqantsu. 60  Tsënam mandakoq kaq sacerdötiqa chowpinkunaman sharkurnin Jesusta kënö tapurqan: “¿Manaku imatapis ninki? ¿Ima ninkitaq kë nunakuna contrëki parlayanqampaq?”. 61  Peru pëqa upällam kakurqan y manam imatapis nirqantsu. Tsëmi mandakoq kaq sacerdötiqa yapë kënö nir tapuparqan: “¿Qamku Santu Diospa Tsurin Cristu kanki?” 62  Jesusnam kënö nirqan: “Awmi, noqam kä; y qamkunam puëdeqpa derëcha kaq lädunchö tëkaqta y ciëlu pukutëwan shamïkaqta nunapa Tsurinta rikäyanki”. 63  Tsënam mandakoq kaq sacerdötiqa röpanta rachirirqan y kënö nirqan: “¿Imapaqnataq testïgukunatapis wanantsik?* 64  Qamkunaqa wiyayarqunkim Diosta ofendinqanta. ¿Ima niyankitaq?”.* Y llapankunam wanunampaq condenayarqan. 65  Y wakinnam toqapur y qaqllanta tsaparkur kutar qallëkuyarqan y kënömi niyarqan: “¡Diospa willakoqnin këkarqa, willayämë pï laqyashunqëkita!”. Y laqyakacharkurmi cortichö guardiakuna apakuyarqan. 66  Tsëyaqnam, patiuchö Pëdru këkaptin, mandakoq kaq sacerdötipa juk sirweqnin warmi pëman shamurqan. 67  Ninachö Pëdru qoñükïkaqta rikärirnam, defrenti rikëkurnin kënö nirqan: “Qampis Nazaretpita Jesuswanmi këkarqëki”. 68  Peru pëqa kënö nirmi negarqan: “Manam pëta reqïtsu, ni manam musyätsu imapaq parlëkanqëkita”, y sawan kaqmanmi yarqurirqan. 69  Tsëchönam tsë sirwipakoq warmi yapë rikärirqan y tsëkunachö shëkaqkunatam yapë kënö nirqan: “Pëpis qateqninkunapita jukninmi”. 70  Peru pëqa yapëmi negarirqan. Y rätunllatanam, tsëkunachö shëkaqkuna Pëdruta yapë kënö nir qallëkuyarqan: “Rasumpam qampis pëkunapita kanki, porqui Galilëa nuna kanqëkiqa clärum rikakun”. 71  Peru pënam kikinta maldecikur y jurarnin kënö nir qallëkurqan: “¡Manam parlëkäyanqëki nunataqa reqïtsu!”. 72  Tsëllanam ishkë kaq kutichö juk gällu cantarirqan, y Pëdruqa Jesus kënö ninqantam yarpärirqan: “Manaraq juk gällu ishkë kuti cantaptinmi, kima* kuti negamanki”. Y alläpa llakikurmi waqar qallëkurqan.

Päginapa ura kuchunchö willakïkuna

Rikäri “Käyitsikïkuna” nishqanta.
O: “prësuyänampaq”.
O: “tëkur mësaman kinkishärëkaptinnam”.
Tsë plantapaqa tullun y watsinmi shumaq pukutan.
Kënöpis niyanmi: mushkoq.
Kënöpis niyanmi: umanmanmi wiñar.
Kënöpis niyanmi: ajar.
Rikäri “Käyitsikïkuna” nishqanta.
O: “tsë warmipaq piñashqa parlayarqan; tsë warmita piñapäyarqan”.
Kënöpis niyanmi: mushkoq.
Kënöpis niyanmi: traicionanampaq.
Kënöpis niyanmi: awniyarqan.
Kënöpis niyanmi: uylluta.
Kënöpis niyanmi: tinkuriyanki.
Kënöpis niyanmi: jamaykur.
Kënöpis niyanmi: traicionamanqa.
O: “salmukunata cantarir”.
Kënöpis niyanmi: matsikar.
Kënöpis niyanmi: kimsa.
O: “almäqa alläpa llakishqam këkan”. Rikäri “Käyitsikïkuna” nishqanchö “Alma” neqta.
Kënöpis niyanmi: mayaq mayaqlla.
Kënöpis niyanmi: umpuykur.
Kë palabraqa arameu idiömachömi këkan, y tsëqa “¡Teytallä!” ninanmi.
Kënöpis niyanmi: mayaq mayaqlla.
Kënöpis niyanmi: traicionashqa.
Rikäri “Käyitsikïkuna” nishqanta.
Kënöpis niyanmi: qeshpinanta; safakunanta.
Griëgu idiömachöqa “¡Rabï!” ninmi.
Kënöpis niyanmi: ishkeqpaq roqurapurqan.
Kënöpis niyanmi: qeshpir; safar.
O: “rurin kaq röpanllawan”.
Kënöpis niyanmi: qeshpir; safar.
Rikäri “Käyitsikïkuna” nishqanta.
Kënöpis niyanmi: qorikäyarqan.
Kënöpis niyanmi: kanqanllataqa.
Kënöpis niyanmi: necesitantsik.
O: “¿Imatataq pensayanki?”.
Kënöpis niyanmi: kimsa.