Llapan kanqanman ëwari

Qallananchö tïtulukunaman ëwë

Jehoväpa testïgunkuna

Idiömata akrë Quechua (Ancash)

Marcus 1:1-45

  • Bautizaq Juan willakun (1-8)

  • Jesus bautizakun (9-11)

  • Jesusta Satanas tentëta tïran (12, 13)

  • Galilëa provinciachö Jesus willakur qallan (14, 15)

  • Punta qateqninkunata akran (16-20)

  • Mana alli espïrituta qarqun (21-28)

  • Capernaumchö mëtsikaqta Jesus kachakätsin (29-34)

  • Tsunyaq sitiuchö Diosta mañakun (35-39)

  • Lepra qeshyayoq nuna kachakätsishqa kanqan (40-45)

1  Diospa Tsurin Jesucristupita alli willakïkunapa qallanan:  Diospa willakoqnin* Isaïas kënö nir qellqanqannö: “(¡Rikë! Willakoqnïtam puntëkita kachëkä, pëmi nänikita alistamunqa.)  Juk nunam tsunyaqchö sinchipa kënö willakïkan: ‘¡Jehoväpa* näninta alistayë! Pë purinampaq kaq nänita pampatsayë’”.  Bautizaq Juanmi tsunyaqchö* këkarqan, jutsankunapita perdonta chaskiyänampaq arrepentikushqa kayanqanta rikätsikur bautizakuyänan precisanqanta willakurnin.  Y entëru Judëa provinciapita y Jerusalenchö llapan täraqkunam pë kaqman shayämurqan, y Jordan mayuchömi pëkunata bautizarqan,* y llapankunapa jananchömi pëkunaqa jutsasapa kayanqanta willakuyaq.  Y Juanqa camëllupa millwampita rurashqa röpatam vistikoq, y tseqllanchönam qarapita wachakan kapoq, y pinteq kurukunata* y tuna* abëjakunapa mishkintam mikoq.  Y kënö nirmi willakïkarqan: “Noqapitapis mas autoridäyoqmi qepäta shamun, y noqalläqa manam puktïkur* llanqimpa watunkunallatapis paskapïta puëdillätsu.  Noqaqa yakuchömi qamkunata bautizayarqoq, peru pëqa santu espïrituwanmi bautizayäshunki”.  Tsë junaqkunachömi Jesusqa Galilëa provinciachö këkaq Nazaretpita shamurqan, y Jordan mayuchömi Juan bautizarqan. 10  Y jinan höra yakupita yarqurirllam, ciëlu kichakäreqta y Diospa santu espïritun paluma niraq jananman urëkämoqta rikärirqan. 11  Y ciëlupitam kënö neq wiyakarqan: “Qammi Tsurï kanki, kuyë Tsurï; qampitam alläpa kushikü”. 12  Y jinan höram santu espïritu tsunyaqman* pusharqan. 13  Tsëmi pëqa chusku chunka (40) junaq tsunyaqchö karqan, y tsëchömi Satanas tentëta tïrarqan. Jina tsëchöqa chukaru animalkunapis karqanmi, peru angelkunam pëtaqa atiendiyaq. 14  Juk kutichönam, Juanta prësuratsiyanqanchö, Galilëa provinciaman Jesus yëkurqan Diospa alli willakïninkunata willakur, 15  y kënö nirnin: “Dispunishqa tiempuqa chäramushqanam, y Diospa Gobiernunqa këllachönam këkan. Arrepentikuyë y alli willakïkunaman markäkuyë”.* 16  Galilëa qocha* kuchumpa ëwarëkarnam, Simontawan wawqin Andresta qochaman mällankunata jitëkäyaqta rikärirqan, pëkunaqa pescadormi kayarqan. 17  Tsënam Jesusqa pëkunata kënö nirqan: “Qepäta shayämï, nunakunata pesquëtam yachatsiyashqëki”. 18  Y tsë höram mällankunata jaqirïkur qatiyarqan. 19  Tsëpita ichik mas pasarirnam, Zebedeupa tsurin Santiägutawan wawqin Juanta barcunkunachö mällankunata remendarnin këkäyaqta rikärirqan, 20  y jinan höram pëkunata qayarqan. Tsënam pëkunaqa teytankuna Zebedeutawan trabajapakoq nunakunata barcuchö jaqiriyarqan y qepanta ëwayarqan. 21  Y Capernaummanmi yëkuriyarqan. Säbadu qallarinqanllachömi, Diosta adorayänan wayiman yëkurqan y yachatsikurnin qallëkurqan. 22  Y imanö yachatsikunqampitam espantakur mantsakashqa këkäyarqan, porqui pëqa autoridäyoq nunanömi pëkunata yachatsirqan, y manam Ley qellqaqkunanötsu.* 23  Jina tsë höram pëkunapa Diosta adorayänan wayinkunachö këkarqan mana alli espïritupa makinchö këkaq nuna, y pëmi sinchipa kënö nirqan: 24  “¿Imatataq noqakunapita munanki Nazaret markapita Jesus? ¿Ushakätsiyämaqnïku shamurqunki? Alleqmi musyä pï kanqëkita, ¡qamqa Diospa Santu Tsurinmi kanki!”. 25  Peru Jesusqa sinchipa piñaparninmi* kënö nirqan: “¡Upälla kë, y pëpita yarqï!”. 26  Tsënam tsë mana alli espïrituqa nunata seqirir tapsikacharkurqan* y sinchipa qaparïkurmi* pëpita yarqurirqan. 27  Y llapan nunakunam mantsakashqa quedariyarqan y kikinkunapura parlarmi kënö ninakuyarqan: “¿Imanataq këqa? ¡Juk mushoq yachatsikï! Autoridäwantaq mana alli espïritukunatapis mandan, y ninqantapis cäsukuyantaq”. 28  Tsënam pëpaq willakuyanqanqa entëru Galilëa provinciaman më tsëpa raslla chärirqan. 29  Tsënam, Diosta adorayänan wayipita yarquyarqan, y Simonpawan Andrespa wayinmanmi Santiäguwan y Juanwan ëwayarqan. 30  Tsëchömi Simonpa suegran fiebriwan qeshyarnin cämarëkarqan, y jinan höram pëpaq willariyarqan. 31  Pë kaqman ëwëkurmi makipita tsarirkur sharkaratsimurqan. Tsënam, fiebrin jaqirirqan, y pënam, llapankunata atiendir qallëkurqan. 32  Patsa ampïriptinnam,* inti* jeqashqanchöna, llapan qeshyëkaqkunata y supëyoqkunata pëman apamur qallëkuyarqan; 33  y tsë markapita llapan nunakunam punkuchö ëllurëkäyarqan.* 34  Tsënam, tukïläya qeshyayoqkunata mëtsikaqta kachakätsirqan, y mëtsika supëkunatam qarqurqan, peru supëkunataqa manam parlayänanta jaqeqtsu, porqui pëkunaqa musyayaqmi pë Cristu kanqanta.* 35  Manaraq atsikyaptin qoya qoyalla* shärikurirmi, yarqurqan y tsunyaq sitiuman ëwarqan, y tsëchömi Diosman mañakur qallëkurqan. 36  Peru Simon, y pëwan këkaqkunaqa asheqninmi ëwayarqan, 37  y taririrmi, kënö niyarqan: “Llapankunam ashiyäshunki”. 38  Peru pëqa kënömi nirqan: “Juk läduta ëwashun, amänuchö këkaq markakunaman, tsëchöpis willakunäpaq, porqui tsëta ruraqmi shamurqö”. 39  Y entëru Galilëa provinciapam purirqan Diosta adorayänan wayinkunachö willakurnin y supëkunata qarqurnin. 40  Jina lepra qeshyayoq nunapis pëman shamïkurmi qonqurikïkur kënö nir rogakurqan: “Qam munarninqa kachakäratsimankimanmi”.* 41  Tsënam pëqa alläpa ankuparqan,* y yatëkurmi kënö nirqan: “¡Munämi kachakänëkita!”. 42  Jinan höram lepranqa chipyëpa ushakärirqan, y limpium quedarirqan. 43  Tsënam, alli buënu willapëkur* despacharirqan, 44  kënö nirnin: “Paqtataq pitapis imatapis willankiman, tsëpa rantinqa, sacerdöti kaqta ëwë, y Moises qellqanqan Ley ninqannö limpiu kanëkipaq ofrendëki qoy, tsënöpa kachakanqëkita pëkuna musyayänampaq”. 45  Peru tsëpita yarqurirqa pï mëtam willarqan, y tsë pasakunqantam musyatsikurqan, tsëmi rikëkäyaptinqa mëqan markamampis Jesusqa yëkïta puëdirqannatsu, sinöqa tsunyaq sitiukunallachönam quedakurqan. Tsënö kaptimpis, më tsëpitam pëman shamurnin sïguiyarqan.

Päginapa ura kuchunchö willakïkuna

Griëgu idiömachöqa “profëta” ninmi. Rikäri “Käyitsikïkuna” nishqanta.
Diospa jutin Jehoväqa ishkë pachak kima chunka qanchis (237) kutim kë Bibliapa versïculunkunachö yurin, y këmi juk kaq. Rikäri “Käyitsikïkuna” nishqanta.
Kënöpis niyanmi: tsutsinchö.
O: “tullpurqan; hunditsirqan”.
Kënöpis niyanmi: chukllushkunata; pinteqshakunata; chichigällukunata; wallpakurukunata.
Kënöpis niyanmi: jirka.
Kënöpis niyanmi: umpuykur; kukïkur.
Kënöpis niyanmi: tsutsinman.
Kënöpis niyanmi: yärakuyay.
Wakin Bibliakunachöqa Galilëa lamar ninmi, peru mishki yakuyoq kaptin y lamarnö jatun mana kaptinmi kë Bibliachöqa Galilëa qocha nin.
Rikäri “Käyitsikïkuna” nishqanta.
Kënöpis niyanmi: qayaparninmi.
Kënöpis niyanmi: majakäratsir tsuktsukyäratsirqan.
Kënöpis niyanmi: qayaraykurmi.
Kënöpis niyanmi: tutapäriptinnam.
Kënöpis niyanmi: rupay.
Kënöpis niyanmi: qoriraykäyarqan.
O, itsapis: “pëkunaqa musyayaqmi pï kanqanta”.
Kënöpis niyanmi: wäray wäraylla.
Griëgu idiömachöqa “limpiaramankimanmi” ninmi.
Kënöpis niyanmi: llakiparqan.
Kënöpis niyanmi: yätsirir.