Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Këchö Biblia | TRADUCCIÓN DEL NUEVO MUNDO DE LAS SANTAS ESCRITURAS

Juan 9:1-41

IMAKUNA KANQAN

  • Yurikunqampita patsë wisku nunata Jesus kachakätsin (1-12)

  • Kachakätsishqa wisku nunata fariseukuna tapupäyan (13-34)

  • Fariseukuna wisku kayanqan (35-41)

9  Pasarëkarmi, yurikunqampita patsë wisku nunata rikärirqan.  Tsënam qateqninkunaqa kënö tapuyarqan: “Maestru, ¿pitaq jutsallakurqan kë nuna wisku yurinampaq, kikinku o teytankunaku?”.  Jesusnam kënö contestarqan: “Manam ni kë nunatsu ni teytankunatsu jutsallakushqa, sinöqa Diospa rurëninkuna pëchö rikakänampaqmi kënö kashqa.  Junaqllaraq këkaptinmi kachamaqnïpa rurëninkunata ruranantsik; paqasqa chëkämunnam, y paqaspaqa manam ni pipis trabajëta puëdintsu.  Nunakunallachöraq këkanqäyaqqa, nunakunapa aktsinmi kä”.  Tsëkunata nirirmi, patsaman toqarir, toqaninwan mituta rurarqan, nïkurmi tsë nunapa nawinta mituwan llushirqan,  y kënömi nirqan: “Siloam kitaman paqakoq* ëwë” (Siloamqa “Pashtamoq” ninanmi). Tsënam pëqa ëwarqan y paqakurqan, y rikëkarnam kutiramurqan.  Tsënam, tsë ëwë* vecïnukuna y limushnata mañakur kanqanta rikashqa kaqkuna kënö nir qallëkuyarqan: “¿Këmi limushnata mañakur täraq nuna aw?”.  Wakinkunam, “pëmi” niyaq. Wakinkunanam, “manam pëtsu, peru pë niraqmi” niyaq. Tsë nunanam, “noqam kä” nir sïguirqan. 10  Tsënam kënö tapuyarqan: “Tsëqa, ¿imanöpataq kananqa rikankina?”. 11  Pënam kënö contestarqan: “Jesus jutiyoq nunam mituta rurarir nawïta llushimurqan, y kënö nimarqan: ‘Siloamta ëwë y paqakï’.* Tsëmi ëwarqä y paqakurqä, y tsënöpam kananqa rikäna”. 12  Tsënam kënö niyarqan: “¿Mëchötaq tsë nuna këkan?”. Pënam, “manam musyätsu” nirqan. 13  Tsënam, tsë wisku kashqa nunata fariseukunaman* pushayarqan. 14  Y mituta rurarir tsë nunapa nawinta Jesus kachakätsinqan junaqqa Säbadum karqan. 15  Tsënam këkaq kutichöqa fariseukunapis* nawin imanö kachakashqa kanqanta tapur qallëkuyarqan. Pënam kënö nirqan: “Mituwanmi nawïta llushimurqan, y paqakurirqämi, y tsënöpam kananqa rikäna”. 16  Tsënam fariseukunapita* wakin kaqkuna kënö nir qallëkuyarqan: “Këqa manam Dios kachamunqan nunatsu, porqui manam Säbadupaq ley ninqanta cäsukuntsu”. Wakinkunanam kënö niyarqan: “¿Imanötaq juk jutsasapa nunaqa tsënö señalkunata ruranman?”. Tsënömi kikinkunapura rakikäriyarqan. 17  Yapëmi tsë wisku nunata kënö niyarqan: “Y qamqa, ¿ima ninkitaq pëpaq, nawikita kachakätsimushqa këkaptinqa?”. Tsë nunanam, “pëqa Diospa willakoqninmi”* nirqan. 18  Tsënö kaptimpis, judïukunaqa manam creiyarqantsu wisku kashqa kanqanta y nawin kachakashqa kanqanta, tsëmi, rikëta puëdeqna nunapa teytantawan mamanta qayatsiyarqan. 19  Y kënömi tapuyarqan: “¿Këku wamrëkikuna? ¿Wiskuku yurikurqan? ¿Imanöpataq kananqa rikanna?”. 20  Teytankunanam kënö contestayarqan: “Musyayämi pë wamräkuna kanqanta, y wisku yurikunqantaqa. 21  Peru kanan imanöpa rikanqantaqa, manam musyayätsu; o nawinta pï kachakätsishqa kanqantaqa, manam musyayätsu. Kikinta tapuyë. Poqu* nunanam. Pëqa kikimpitanam parlanan”. 22  Judïukunata mantsarmi teytankunaqa tsënö niyarqan, porqui judïukunaqa patsätsishqanam kayarqan pipis Jesuspaq Cristu kanqanta niptinqa, Diosta adorayänan wayipita tsë nunata qarquyänampaq. 23  Tsëmi teytankunaqa kënö niyarqan: “Poqu nunanam. Kikinta tapuyë”. 24  Tsëmi pëkunaqa wisku kanqampita kachakashqa nunata yapë qayatsiyarqan, y kënö niyarqan: “Diospa rikëninchö rasumpa kaqta niyämë; noqakunaqa musyayämi tsë nuna jutsasapa kanqanta”. 25  Pënam kënö contestarqan: “Jutsasapa kanqantaqa manam musyätsu, peru këtam sïqa musyä: noqaqa wiskum karqä, peru kananqa rikänam”. 26  Tsënam kënö niyarqan: “¿Imanäshurqunkitaq? ¿Imanötaq nawikita kachakätsimushqa?”. 27  Pënam kënö contestarqan: “Tsëtaqa qamkunata willayarqoqnataq, peru qamkunaqa manam wiyayarqunkitsu. ¿Imanirtaq yapëraq wiyëta munayanki? ¿Manachi qamkunapis qateqnin këtatsu munëkäyanki aw?”. 28  Tsënam pëkunaqa despreciëpa kënö niyarqan: “Qamchi tsë nunapa qateqninqa kanki, peru noqakunaqa Moisespa qateqninmi kayä. 29  Noqakunaqa musyayämi Diosqa Moisesta parlapanqanta, peru kë nuna mëpita kanqantaqa manam musyayätsu”. 30  Tsë nunanam kënö contestarqan: “Tsëmi sïqa espantakïpaq, qamkunaqa manam musyayankitsu mëpita kanqanta, peru pëqa nawïtam kachakäratsimushqa. 31  Musyantsikmi jutsasapakunataqa Dios mana wiyanqanta, peru pipis Diosta mantsaqta y munëninta ruraqtaqa, Diosqa wiyanmi. 32  Unë witsampitanam ni imëpis ni pï wiyashqatsu kashqa wisku yurikushqa nunapa nawinta pipis kachakätsishqa kanqantaqa. 33  Kë nunata Dios mana kachamushqa kaptinqa, manam ni imatapis rurëta puëdinmantsu”. 34  Tsëta contestarnam kënö niyarqan: “Qamqa chipyëpa jutsachömi yurirqëki, ¿tsënö këkarku noqakunata yachatsiyämanki?”. ¡Y waqtamanmi qarquriyarqan! 35  Jesusnam waqtaman qarquyashqa kayanqanta wiyarirqan, y pëwan toparirmi* kënö nirqan: “¿Markäkunkiku* nunapa Tsurinman?”. 36  Pënam kënö contestarqan: “¿Y pitaq pëqa teytë, pëman markäkunäpaq?”. 37  Jesusnam kënö nirqan: “Rikarqunkim, y rasumpa kaqchöqa, pëmi qamwan parlëkan”. 38  Pënam kënö nirqan: “Noqaqa pëman markäkümi teytë”. Y tsënö nirirmi, respetarnin puntanman qonqurikïkurqan. 39  Tsënam Jesusqa kënö nirqan: “Nunakuna juzgashqa kayänampaqmi noqaqa nunakunaman shamurqö, mana rikaq kaqkuna, rikäyänampaq, y rikaq kaqkunana, wisku tikrayänampaq”. 40  Tsënam, tsë ninqankunata wiyëkaq fariseukuna* kënö niyarqan: “¿Manachi noqakunapis wiskutsu kayä aw?”. 41  Jesusnam kënö nirqan: “Wisku karninqa, manam jutsayoqtsu kayankiman. Peru qamkunaqa ‘rikäyämi’ niyankim. Tsëmi jutsëkikunaqa perdonashqatsu kanqa”.

Päginapa ura kuchunchö willakïkuna

Kënöpis niyanmi: pösuman awikoq.
Kënöpis niyanmi: kinray.
Kënöpis niyanmi: awikuy.
Rikäri “Käyitsikïkuna” nishqanta.
Rikäri “Käyitsikïkuna” nishqanta.
Rikäri “Käyitsikïkuna” nishqanta.
Griëgu idiömachöqa “profëtam” ninmi. Rikäri “Käyitsikïkuna” nishqanta.
Kënöpis niyanmi: yäkoq.
Kënöpis niyanmi: tinkurirmi.
Kënöpis niyanmi: yärakunkiku.
Rikäri “Käyitsikïkuna” nishqanta.