Llapan kanqanman ëwari

Qallananchö tïtulukunaman ëwë

Jehoväpa testïgunkuna

Idiömata akrë Quechua (Ancash)

Juan 6:1-71

IMAKUNA KANQAN

  • Pitsqa waranqa (5.000) nunakunata Jesus pachan qaran (1-15)

  • Yaku janampa Jesus purin (16-21)

  • Jesus “kawatsikoq tanta” (22-59)

  • Jesus yachatsikur parlanqampita mëtsikaq ishkiyan (60-71)

6  Tsëpitanam Jesusqa Galilëa o Tiberiädis nir reqiyanqan qochapa* wak tsimpanta ëwarqan.  Y mëtsikaq nunakunam pëta qatir sïguiyarqan, porqui qeshyëkaqkunata kachakätsir milagrukunata ruranqantam rikäyaq.  Tsënam Jesusqa juk jirkaman witsarqan, y tsëchömi qateqninkunawan täkurirqan.  Y judïukunapa Pascua fiestankunam ichikllachöna kanan karqan.  Peqanta* pallarkur mëtsikaq nunakuna shamïkäyaqta rikärirmi Jesusqa Felïpita kënö nirqan: “¿Mëpitaraq tantata rantishun kë nunakuna mikuyänampaq?”.  Tsënö kaptimpis, pruëbaman churëta munarmi tsëtaqa nirqan, porqui pëqa musyarqannam imata ruranampaq kaqta.  Felïpinam kënö contestarqan: “Ishkë pachak (200) denariupa* tantata rantishqapis manachi tinkunmantsu ichikllatapis mikuriyänampaq”.  Qateqninkunapita juk kaqmi, Simon Pëdrupa wawqin Andres, kënö nirqan:  “Këchömi juk wamrapa kapun pitsqa cebäda tantan y ishkë taksha pescädun. Peru ¿imatam tsëtsikaqpaqqa tinkunqa?”. 10  Jesusnam kënö nirqan: “Ollqukunata tätsiyë”. Y tsë sitiuchö mëtsika qora kaptinmi, nunakunaqa tsëman täkuriyarqan, y pitsqa waranqanömi kayarqan. 11  Tsënam Jesusqa tantata tsarirkur y Diosta agradecikurir, tsëchö tëkaqkunata rakirqan;* jina tsënöllam taksha pescädukunawampis rurarqan, y nunakunaqa pachankuna juntanqanyaqmi mikuyarqan. 12  Peru pachankuna juntariptinnam, qateqninkunata kënö nirqan: “Llapan katuyanqanta ëlluyë,* ichikllapis mana perdinampaq”. 13  Tsëmi chunka ishkë (12) canastakuna juntata ëlluyarqan, tsë mikuyanqan pitsqa cebäda tantakunapita katuyanqanta. 14  Tsë ruranqan señalkunata rikarmi nunakunaqa kënö nir qallëkuyarqan: “Rasumpam pëqa nunakunaman shamunampaq kaq Diospa willakoqnin”.* 15  Tsënam Jesusqa shamïkurnin reyninkuna kanampaq mälas* churëta munayanqanta cuentata qokurir, jirkaman japallan ëwakurqan. 16  Ampïriptinnam,* qateqninkuna qochaman uräyarqan, 17  y barcuman lloqarkurmi, Capernaumman chäyänampaq qochata tsimpar qallëkuyarqan. Tsë hörapaqqa, ampïrishqanam karqan, y Jesusqa manam pëkuna kaqman shamushqaraqtsu karqan. 18  Jina qocham sinchipa vientuptin alläpa laqcheqsar qallëkurqan. 19  Tsënö këkaptinmi, barcuta pitsqa o joqta kilömetrutanö* avanzatsishqa këkarna, yaku janampa purir barcu kaqman Jesus shamïkaqta rikäriyarqan, y alläpam mantsakäyarqan. 20  Peru pëqa kënömi nirqan: “¡Noqam kä, ama mantsakäyëtsu!”. 21  Tsënam barcuman kushishqa chaskiriyarqan, y tsëllanam barcuqa tsë ëwëkäyanqan sitiuman chärirqan. 22  Waränin junaqnam, qochapa wak tsimpanchö quedashqa mëtsikaq nunakuna, qanyannin junaq këkaq takshalla barcu manana këkanqanta rikäriyarqan, y qateqninkuna lloqayanqan barcuman Jesus mana lloqashqa kanqanta, sinöqa pëninnaqlla qateqninkuna ëwayashqa kayanqantam yarpäriyarqan. 23  Tsënö kaptimpis, Diosta Señor agradecikuriptin tantata mikuyanqan sitiupa amänunmanmi Tiberiädispita barcukuna chäriyarqan. 24  Tsëmi tsëchö këkaq mëtsika nunakunaqa ni Jesus ni qateqninkuna tsëchö mana këkäyanqanta rikärir, barcunkunaman lloqarkur Jesusta asheq Capernaumman ëwayarqan. 25  Qochapa wak tsimpanchö taririrnam, kënö niyarqan: “Maestru, ¿imëtaq këman chämurqunki?”. 26  Jesusnam kënö nir contestarqan: “Rasumpa kaqllatam qamkunata niyaq: qamkunaqa manam señalkunata rikashqa kartsu ashiyämanki, sinöqa teqñayanqëkiyaq* tantata mikushqa karmi. 27  Trabajayë, peru ama ushakäreqlla mikïpaqqa, sinöqa nunapa Tsurin qoyäshunëkipaq kaq imëyaqpis kawëman chätsikoq mana ushakaq mikïpaq, porqui kikin Teyta Diosmi pëta alli nawinwan rikanqanta rikätsikur, pëman sëllunta churashqa”. 28  Tsënam kënö niyarqan: “Tsëqa, ¿imatataq rurayänä Diospa rikëninchö alli kayänäpaq?”. 29  Tsëta contestarnam Jesusqa kënö nirqan: “Këmi Diospa rikënimpaqqa alli: pë kachamunqanman markäkuyanqëkita* rikätsikuyänëki”. 30  Tsënam pëkunaqa kënö niyarqan: “¿Ima señaltataq qamqa ruranki tsëta rikarnin creiyänaqpaq? ¿Ima rurëtataq ruramunki? 31  Unë kastantsikkunaqa tsunyaqchömi* manäta mikuyarqan, kënö qellqarëkanqannö: ‘Ciëlupitam tantata mikuyänampaq qorqan’”. 32  Tsënam Jesusqa kënö nirqan: “Rasumpa kaqllatam qamkunata niyaq: Moisesqa manam ciëlupita rasumpa tantatatsu pëkunata qorqan, peru Teytäqa rasumpa kaq tantatam ciëlupita qoyäshunki. 33  Porqui Diospa tantanqa ciëlupita urämoq kaq, y nunakunata kawënin qoq kaqmi”. 34  Tsëmi kënö niyarqan: “Teytë, tsë tantata imëpis qolläyämë”. 35  Jesusnam kënö nirqan: “Noqam kawatsikoq tanta kä. Noqaman shamoq kaqqa, manam ni imanöpapis mallaqanqatsu, y noqaman markäkunqanta* rikätsikoq kaqqa manam ni imëpis yakunanqatsu. 36  Peru noqa niyanqaqnöpis: qamkunaqa hasta rikäyämarqunkim, peru tsënö kaptimpis manam creiyankitsu. 37  Teyta llapan qomanqan kaqkunaqa noqamanmi shayämunqa, y noqaman shamoq kaqtaqa manam ni imëpis qarqushaqtsu, 38  porqui noqaqa ciëlupita urämurqö, manam kikïpa munënïta ruraqtsu, sinöqa kachamaqnïpa munëninta ruraqmi. 39  Kachamaqnïqa munan, qomanqan kaqkunapita ni mëqantapis mana oqranätam, tsëpa rantinqa ushanan junaqchö pëkunata sharkatsimunätam. 40  Porqui Teytäqa këtam munan: Tsurita llapan reqeq kaqkuna, y pëman markäkuyanqanta rikätsikoqkuna imëyaqpis kawëta tariyänanta, y ushanan junaqkunachö pëkunata noqa kawaritsimunäta”. 41  Tsënam judïukunaqa pëpaq rimar qallëkuyarqan, porqui kënömi nishqa karqan: “Noqam ciëlupita urämushqa kaq tanta kä”. 42  Y kënö nirmi qallëkuyarqan: “¿Manaku këqa Josëpa tsurin Jesus, y manaku teytantawan mamanta reqintsik? Tsëqa, ¿imanirtaq ‘noqaqa ciëlupitam urämurqö nin’?”. 43  Tsëta contestarnam Jesusqa kënö nirqan: “Ama kikikikunapura rimar kayënatsu. 44  Manam pipis noqaman shamïta puëdintsu kachamaqnï Teyta noqaman mana apamuptinqa, y noqam ushanan kaq junaqchö kawaritsishaq. 45  Diospa Willakoqninkuna Qellqayanqanchömi kënö qellqarëkan: ‘Pëkunataqa llapankunatam Jehovä yachatsinqa’. Teytata llapan wiyashqa kaqkuna, y yachakushqa kaqkunam noqaman shayämun. 46  Manam ni pï nunapis Teytataqa rikashqatsu, sinöqa Diospita shamushqa kaqllam, pëllam Teytata rikashqa. 47  Rasumpa kaqllatam niyaq: creeq kaqqa imëyaqpis kawëyoqmi kanqa. 48  Noqam kawatsikoq tanta kä. 49  Qamkunapa unë kastëkikunaqa tsunyaqchömi* manäta mikuyarqan, tsënö kaptimpis wanuyarqanmi. 50  Këmi ciëlupita urämoq kaq tantaqa, tsënöpa pipis tsëpita mikïta puëdinampaq y mana wanunampaq. 51  Noqam ciëlupita urämushqa kawëkaq tanta kä. Pipis kë tantapita mikoq kaqqa imëyaqpis kawanqam; y rasumpa kaqchöqa, noqa qoyänaqpaq kaq tantaqa nunakunapa kawëninrëkur qonäpaq kaq ëtsämi”. 52  Tsënam judïukunaqa kikinkunapura discutir qallëkuyarqan, y kënömi niyarqan: “¿Imanötaq kë nunaqa ëtsanta mikunapaq qomashwan?”. 53  Tsënam Jesusqa kënö nirqan: “Rasumpa kaqllatam qamkunata niyaq: nunapa Tsurimpa ëtsanta mana mikur, y yawarninta mana upurqa, manam kawëta* tariyankitsu. 54  Ëtsäta mikoq kaq y yawarnïta upoq kaqqa imëyaqpis kawëyoqmi kanqa, y noqam ushanan junaqchö kawaritsimushaq, 55  porqui ëtsämi rasumpa kaq mikïqa, y yawarnïmi rasumpa kaq upunaqa. 56  Ëtsäta mikoq kaq y yawarnïta upoq kaqqa, juknöllam noqawan imëpis këkan, y noqam pëwan juknölla këkä. 57  Imanöllam kawëkaq Teyta kachamashqa, y noqa kawä Teytarëkur, tsënöllam noqapa ëtsäta mikoq kaqqa noqarëkur kawanqa. 58  Këmi ciëlupita urämoq kaq tantaqa. Këqa manam unë kastëkikuna mikuyanqannötsu, porqui pëkunaqa tsëta mikïkarpis wanuyarqanmi. Kë tantapita mikoq kaqqa imëyaqpis kawanqam”. 59  Pëqa tsëkunata nirqan Capernaumchö Diosta adorayänan wayichö yachatsikïkarmi. 60  Tsëta wiyëkurnam atskaq qateqninkuna kënö niyarqan: “Kë yachatsikïqa mana wiyëpaqnömi; ¿piraq tsëta wiyanman?”. 61  Peru Jesusqa tsë asuntupaq qateqninkuna pakallapa parlëkäyanqanta musyarmi, kënö nirqan: “¿Tsëku ishkitsiyäshunki? 62  Tsëqa, ¿imanöraq kariyankiman nunapa Tsurinta unë kanqanman witsëkaqta rikarnäqa? 63  Santu espïritum kawëta qokoqqa; nunakuna logrëta puëdiyanqanqa manam imapaqpis sirwintsu. Noqa parlapäyarniki niyanqaqqa santu espïritupitam shamun y kawëtam qokun. 64  Peru qamkunapita wakinnikikunaqa manam creiyankitsu”. Porqui Jesusqa qallananllapitanam musyarqan pikuna mana creiyanqanta, y pï rantikunampaq* kaqta. 65  Jina kënömi nirqan: “Tsëmi kënö niyarqoq: manam pipis noqaman shamïta puëdintsu Teyta mana permitiptinqa”. 66  Tsëkunarëkurmi mëtsikaq qateqninkuna qepachö jaqiyanqan cösaskunaman kutikuyarqan, y mananam qatiräyarqannatsu. 67  Tsëmi Jesusqa chunka ishkë (12) apostolninkunata kënö nirqan: “¿Qamkunapis manaku ëwakïta munayanki?”. 68  Simon Pëdrunam kënö contestarqan: “Teytë, ¿pimanraq ëwayäshaq? Qamtaq imëyaqpis kawëta qokoq palabrakunataqa katsinki. 69  Noqakunaqa creiyarqömi y Diospa Santu Tsurin kanqëkitam alleq musyayarqö”. 70  Jesusnam contestarnin kënö nirqan: “¿Manaku qamkunata, chunka ishkëkikunata (12) noqa akrayarqoq? Tsënö kaptimpis qamkunapita juknikikunam chikikur tumpakoq”. 71  Tsënö nirqa Simon Iscariötipa tsurin Jüdaspaqmi parlëkarqan, porqui pëmi chunka ishkë (12) apostolninkunapita këkarpis, rantikunan* karqan.

Päginapa ura kuchunchö willakïkuna

Wakin Bibliakunachöqa Galilëa lamar ninmi, peru mishki yakuyoq kaptin y lamarnö jatun mana kaptinmi kë Bibliachöqa Galilëa qocha nin.
Kënöpis niyanmi: umanta.
Rikäri “Käyitsikïkuna” nishqanta.
Kënöpis niyanmi: rakipurqan.
Kënöpis niyanmi: qoriyay.
Griëgu idiömachöqa “profëta” ninmi. Rikäri “Käyitsikïkuna” nishqanta.
Kënöpis niyanmi: amälas.
Kënöpis niyanmi: tsakäriptinnam; tutapäriptinnam.
Griëgu idiömachöqa “ishkë chunka pitsqa (25) o kima chunka (30) estadiukunanömi” ninmi. Juk estadiuqa pachak puwaq chunka pitsqa (185) metrum kaq.
Kënöpis niyanmi: jimayanqaykiyaq.
Kënöpis niyanmi: yärakuyanqaykita.
Kënöpis niyanmi: tsutsinchömi.
Kënöpis niyanmi: yärakunqanta.
Kënöpis niyanmi: tsutsinchömi.
Griëgu idiömachöqa “manam kikikikunachö kawëyoqtsu kayanki” ninmi.
Kënöpis niyanmi: traicionanampaq.
Kënöpis niyanmi: traicionanan.