Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Këchö Biblia | TRADUCCIÓN DEL NUEVO MUNDO DE LAS SANTAS ESCRITURAS

Juan 21:1-25

IMAKUNA KANQAN

  • Qateqninkunata Jesus yuripun (1-14)

  • Jesusta kuyanqanta Pëdru nin (15-19)

    • “Üshalläkunata mitsi” (17)

  • Jesuspa kuyë qateqnin imanö kanampaq kaq (20-23)

  • Ushanan (24, 25)

21  Tsëpitanam Jesusqa qateqninkunata yapë yuripurqan Tiberiädis Qocha kuchunchö. Kënömi yuripunqan pasakurqan.  Simon Pëdru y Millish niyanqan Tomas, Galilëa provinciachö këkaq Canäpita Natanael, Zebedeupa tsurinkuna, y ishkaq mas qateqninkunam juntu këkäyarqan.  Simon Pëdrum pëkunata kënö nirqan: “Pescaqmi ëwä”. Pëkunanam kënö niyarqan: “Aku noqakunawampis”. Y yarqurirmi, barcuman lloqariyarqan, peru tsë paqasqa manam ni imatapis tsariyarqantsu.  Peru patsa warëkaptinnam, qocha kuchunchö Jesus shëkarqan, peru qateqninkunaqa manam cuentata qokuyarqantsu Jesus kanqanta.  Tsënam Jesusqa pëkunata kënö nirqan: “Wamralläkuna, manam ni imapis* mikuyänëkipaq kayäpushunkitsu,* ¿aw?”. Pëkunanam, “¡manam!” nir contestayarqan.  Pënam kënö nirqan: “Barcupa derëcha kaq lädunman mällata jitayë, y tsëchömi tariyanki”. Tsëmi jitarkuyarqan, peru mëtsika pescädukuna kaptinmi sutamïta puëdiyarqantsu.  Tsënam Jesus kuyanqan kaq qateqninqa, Pëdruta kënö nirqan: “¡Señortaq!”. Tsënam Simon Pëdruqa Señor kanqanta wiyarir, janan kaq röpanta vistikurirqan,* porqui qalapächum* këkarqan, y qochamanmi pintïkurqan.*  Peru wakin kaq qateqninkunaqa mälla junta pescäduta qaracharkurmi ichikllan barcuwan shayämurqan, porqui manam karunatsu karqan qocha kuchunman chäyänampaq, sinöqa, isqun chunka (90) metruchönöllanam këkarqan.  Qocha kuchunman chärirqa, nina shanshëkaq* jananchö pescädu churarëkaqta, y tantatam rikäriyarqan. 10  Jesusnam kënö nirqan: “Tsariyanqëki pescädukunapita apayämi”. 11  Tsënam Simon Pëdruqa barcuman lloqarkurqan, y qocha kuchunmanmi mälla junta jatusaq pescädukunata sutaramurqan, y pachak pitsqa chunka kimam (153) karqan. Y mëtsika kaptimpis, mällaqa manam rachirirqantsu. 12  Jesusnam pëkunata kënö nirqan: “Shayämï, desayunariyë”.* Y manam ni mëqan qateqnimpis valurarqantsu “¿qamqa pitaq kanki?” nir tapïta,* porqui musyayarqanmi Señor kanqanta. 13  Jesusnam witirirqan y tantata tsarirkur pëkunata qorqan, jina tsënöllam pescäduwampis rurarqan. 14  Këwanqa kima* kutinam qateqninkunata Jesus yuripurqan wanushqakunapita sharkatsimushqa kanqampita patsë. 15  Desayunar ushariyaptinmi Jesusqa Simon Pëdruta kënö tapurqan: “Juanpa tsurin Simon, ¿tsëkunata kuyanqëkipitapis masku kuyamanki?”. Pënam kënö contestarqan: “Awmi Teytë, qamqa musyankim llapan shonqüwan kuyanqaqta”. Pënam kënö nirqan: “Achkasnïkunata* mitsi”. 16  Yapëmi ishkë kaq kutichö kënö nirqan: “Juanpa tsurin Simon, ¿kuyamankiku?”. Pënam kënö contestarqan: “Awmi Teytë, qamqa musyankim llapan shonqüwan kuyanqaqta”. Pënam kënö nirqan: “Üshalläkunata mitsi”. 17  Jina kima* kaq kutichöpis kënömi nirqan: “Juanpa tsurin Simon, ¿llapan shonqïkiwanku kuyamanki?”. Pëdruqa alläpam llakikurqan kima kutipana “¿llapan shonqïkiwanku kuyamanki?” nir tapunqampita. Tsëmi kënö nirqan: “Teytë, qamqa llapantam alleq musyanki; qamqa alleqmi musyanki llapan shonqüwan kuyanqaqta”. Jesusnam kënö nirqan: “Üshalläkunata mitsi. 18  Rasumpa kaqllatam qamta neq: mas jövin karninqa kikikim vistikoq kanki, y munanqëkipam pureq kanki. Peru awkinyäriptikiqa, makikikunatam pallarinki y jukmi vistitsishunki, y mana munanqëkimanmi aparirkur apashunki”. 19  Tsënöqa nirqan, imanö wanunqanwan Diosta alläpa precisaqpaq churanampaq kaqta rikätsikurmi. Tsënö nirirmi, pëta kënö nirqan: “Qatimarnï sïgui”. 20  Pëdrunam tumëkur Jesuspa mas kuyënin kaq qateqninta rikärirqan, pëqa qepankunatam shamïkarqan y pëmi cenayanqan höra Jesuspa qasqunman* kinkishashqa karqan, y kënö nishqa karqan: “Teytë, ¿pitaq rantikushoqniki kaq?”. 21  Tsëmi pëta rikärir, Pëdruqa Jesusta kënö tapurqan: “Teytë, ¿y pëqa imanötaq kanqa?”. 22  Jesusnam kënö nirqan: “Noqa kutimunqäyaq pë këkänampaq munënï kaptinqa, ¿imataq qamta qokushunki? Qamqa qatimarnï sïgui”. 23  Tsëmi wawqikunaqa parlayarqan tsë qateqnin mana wanunampaq kaqta. Peru Jesusqa manam mana wanunampaq kaqtatsu nikarqan, sinöqa kënömi nirqan: “Noqa kutimunqäyaq pë këkänampaq munënï kaptinqa, ¿imataq qamta qokushunki?”. 24  Tsë qateqninmi kë cösaskunata musyatsikun, y pëmi tsëkunata qellqashqa, y musyantsikmi pë musyatsikunqankunaqa rasumpa kanqanta. 25  Jina rasumpa kaqchöqa, imëka maskunatam Jesusqa rurarqan, tsë llapankuna imanö pasakunqan imëllapis qellqakaptinqa, manachi sitiu tinkunmantsu tsë röllukunata churayänampaq.

Päginapa ura kuchunchö willakïkuna

O: “ni juk pescädïkikunallapis”.
Kënöpis niyanmi: kapuyäshunki.
O: “watakurirqan”.
O: “ichik röpayoqllam”.
Kënöpis niyanmi: saltaykurqan.
Kënöpis niyanmi: shankaykaq; rawrëkaq.
Kënöpis niyanmi: yawakuriyay.
Kënöpis niyanmi: tapuyta.
Kënöpis niyanmi: kimsa.
Kënöpis niyanmi: ashkashnëkunata.
Kënöpis niyanmi: kimsa.
Kënöpis niyanmi: pëchunman.