Llapan kanqanman ëwari

Qallananchö tïtulukunaman ëwë

Jehoväpa testïgunkuna

Idiömata akrë Quechua (Ancash)

Juan 20:1-31

  • Sepultürachö imapis kantsu (1-10)

  • Marïa Magdalënata Jesus yuripun (11-18)

  • Qateqninkunata Jesus yuripun (19-23)

  • Tomas creintsu, peru tsëpitaqa creirin (24-29)

  • Imarëkur kë röllu qellqakanqan (30, 31)

20  Semäna qallanan junaqmi,* qoya qoyalla,* asqu asqullaraq* këkaptin Marïa Magdalëna sepultüraman shamurqan, y sepultürata tsaparaq rumi kuyutsishqa kanqantam rikärirqan.  Tsëmi Simon Pëdruman y Jesuspa mas kuyënin kaq qateqninman ëqipa* shamurqan, y kënö nirqan: “Señor Jesustam sepultürapita jorqariyashqa, y manam musyayätsu mëman churashqa kayanqanta”.  Tsënam Pëdruwan Jesuspa juknin kaq qateqninqa sepultüra kaqman ëwayarqan.  Ishkanmi juntu ëqiyarqan, peru juknin kaq qateqninqa Pëdrupitapis mas rasmi ëqirqan, y puntatam sepultüraman chärirqan.  Y qawëkurmi, lïnu ratashkunata tsëchö churarëkaqta rikärirqan, peru manam yëkurqantsu.  Tsënam qepanta ëwaq Simon Pëdrupis chärirqan y sepultüraman yëkurirqan, y lïnu ratashkunatam tsëchö churarëkaqta rikärirqan.  Peqanta* wankuraq ratashqa manam wakin kaq ratashkunawantsu churarëkarqan, sinöqa juk läduchömi aparti qoturëkarqan.  Tsënam puntata chaq kaq qateqnimpis, sepultüraman yëkurirqan, y rikärirmi, creirirqan.  Porqui pëkunaqa manam alleqllaqa käyiyashqaraqtsu* kayarqan, qellqarëkanqannö wanushqakunapita sharkamunampaq kaqta. 10  Tsëmi qateqninkunaqa wayinkunata kutikuyarqan. 11  Tsënö kaptimpis, Marïaqa waqtachömi shëkar quedakurqan, sepultürapa lädunchö waqarnin. Y waqar këkarmi, sepultüra rurinman qawëkurqan, 12  y Jesuspa ayan churaranqanchömi yulaq röpawan vistishqa ishkaq angelkunata rikëkurqan, juktam peqan churaranqanchö, y juknintanam, chakin churaranqanchö. 13  Y kënömi niyarqan: “Warmi, ¿imanirtaq waqanki?”. Pënam kënö nirqan: “Señornï Jesustam jorqariyashqa, y manam musyätsu mëman churashqa kayanqanta”. 14  Tsëkunata nirirmi pëqa tumarirqan, y Jesustam tsëchö shëkaqta rikärirqan, peru manam cuentata qokurqantsu Jesus kanqantaqa. 15  Jesusnam kënö nirqan: “Warmi, ¿imanirtaq waqanki? ¿Pitataq ashinki?”. Pënam huerta rikaq kanqanta pensar, kënö nirqan: “Teytë, qam apakushqa karqa, willëkallämë mëman churanqëkita, y kikïmi jorqarilläshaq”. 16  Jesusnam kënö nirqan: “¡Marïa!”. Tumëkurnam pëqa hebreu idiömachö “¡Rabboni!” nirqan (tsëqa “¡Maestru!” ninanmi). 17  Jesusnam kënö nirqan: “Amana noqaman warkukar sïguinatsu, porqui manaran Teyta kaqman witsäraqtsu. Peru wawqïkuna kaqta ëwë y kënö nï: ‘Teytäman y qamkunapa Teytëkikunaman y Diosnïman y qamkunapa Diosnikikunamanmi witsä’”. 18  Y Marïa Magdalëna ëwarmi qateqninkunata kënö willarqan: “¡Señor Jesustam rikëkurqö!”. Y Jesus ninqantam pëkunata willarqan. 19  Tsë junaq tardiyäriptinmi, semänapa qallanan junaqchö, judïukunata mantsar Jesuspa qateqninkuna wayipa punkunkunata alli segurarkur këkäyaptin, yurirkur pëkunapa chowpinkunachö Jesus shëkarqan, y pëkunata kënö nirqan: “Yamëlla këkäyë”. 20  Tsënö nirirmi, makinkunata y costillanta pëkunata rikätsirqan. Tsënam qateqninkunaqa Señor Jesusta rikëkurnin alläpa kushikuyarqan. 21  Jesusnam yapë kënö nirqan: “Yamëlla këkäyë. Imanömi Teyta noqata kachamashqa, tsënöllam noqapis qamkunata kachayaq”. 22  Tsënö nirirmi, pëkunaman pükarqan, y kënö nirqan: “Santu espïrituta chaskiyë. 23  Sitsun qamkuna pipa jutsankunatapis perdonayanki, tsëqa perdonashqam kayanqa; peru sitsun pitapis perdonayankitsu, tsëqa manam perdonashqatsu kayanqa”. 24  Peru chunka ishkë (12) apostolninkunapita Millish nir reqiyanqan Tomasqa, manam pëkunawantsu këkarqan Jesus pëkunapa chowpinkunachö yurirkunqan höra. 25  Tsëmi Jesuspa wakin qateqninkunaqa pëta kënö nikäyarqan: “¡Señor Jesustam rikäyarqö!”. Peru pëqa kënömi nirqan: “Makinkunata clävu uchkunqanta mana rikar, clävu uchkunqanman dëdüta mana yakar,* y costillanman makïta mana yakarqa, manam ni imëpis creishaqtsu”. 26  Tsëpitanam, puwaq junaqkuna pasarishqanchö, qateqninkuna wayi rurinchö yapë këkäyarqan, y Tomaspis pëkunawanmi këkarqan. Tsënam, wayipa punkunkuna alli segurashqa këkaptimpis, Jesus pëkunaman yurirkurqan, y pëkunapa chowpinkunachömi shëkarqan, y kënömi nirqan: “Yamëlla këkäyë”. 27  Tsëpitanam Tomasta kënö nirqan: “Dëdïkita këman churë, y makïkunata rikë, y makikita costilläman yakë, y amana mana creeqqa* kënatsu, sinöqa creina”. 28  Tsëta contestarnam Tomasqa kënö nirqan: “¡Señorllä, y Diosllä!”. 29  Jesusnam kënö nirqan: “¿Rikämashqa karku creinki? Kushishqam kayan mana rikashqa këkarpis, creeq kaqkuna”. 30  Jina Jesusqa mëtsika mas señalkunatam qateqninkunapa nöpanchö rurarqan, y tsëkunaqa manam kë rölluchö qellqarëkantsu. 31  Peru këkunaqa qellqakashqa Diospa Tsurin Jesus, Cristu kanqanta creiyänëkipaqmi, y tsëman creikuyanqëkirëkur, jutinchö kawëyoq kayänëkipaqmi.

Päginapa ura kuchunchö willakïkuna

Tsënö nirqa, domingu nirnin reqinqantsik junaqpaqmi parlëkan, judïukunapaqqa tsë junaqmi semäna qallaq.
Kënöpis niyanmi: wäray wäraylla.
Kënöpis niyanmi: tsaka tsakallaraq.
Kënöpis niyanmi: cörripa.
Kënöpis niyanmi: umanta.
Kënöpis niyanmi: entiendiyashqaraqtsu.
Kënöpis niyanmi: jatir.
O: “mana següruqa”.