Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Këchö Biblia | TRADUCCIÓN DEL NUEVO MUNDO DE LAS SANTAS ESCRITURAS

Juan 18:1-40

IMAKUNA KANQAN

  • Jüdas Jesusta rantikun (1-9)

  • Pëdru espädata tsarin (10, 11)

  • Anasman Jesusta apayan (12-14)

  • Punta kaq kuti Pëdru neganqan (15-18)

  • Jesus Anaspa puntanchö (19-24)

  • Ishkë kaq y kima kaq kuti Pëdru neganqan (25-27)

  • Jesus Pilätupa puntanchö (28-40)

    • “Gobiernüqa manam kë mundupitatsu” (36)

18  Tsëkunata mañakïta usharirmi Jesusqa qateqninkunawan yarqurirqan Cedron Urampa wak tsimpanchö këkaq juk huertaman, y pëwan qateqninkunam tsëman yëkuriyarqan.  Rantikoqnin* Jüdaspis tsë sitiutaqa reqirqanmi, porqui Jesusqa atska kutikunachömi qateqninkunawan tsëchö ëllukashqa* karqan.  Tsëmi Jüdasqa juk tröpa soldädukunata y precisaq sacerdötikunapa y fariseukunapa* guardiankunata pusharqan, y antorchankunawan, chiwchinkunawan y armankunawanmi chäriyarqan.  Tsënam Jesusqa pëta llapan pasanampaq kaqkunata musyar, mas puntaman witirir pëkunata kënö nirqan: “¿Pitataq ashiyanki?”.  Pëkunanam, “Nazaretpita Jesustam” nir contestayarqan. Pënam, “noqam kä” nirqan. Y rantikoqnin Jüdaspis pëkunawanmi shëkarqan.  Tsënö kaptimpis, “noqam kä” nishpa Jesus niptinqa, qepapa kutirmi patsaman ishkiriyarqan.  Tsënam pëkunata yapë kënö tapurqan: “¿Pitataq ashiyanki?”. Pëkunanam, “Nazaretpita Jesustam” niyarqan.  Jesusnam kënö contestarqan: “Noqam kä niyarqoqtaq, tsëqa, noqata ashiyämarnïqa kë nunakuna ëwakuyänanta jaqiriyë”.  Tsënöqa karqan kikin kënö ninqan cumplikänampaqmi: “Qomanqëki kaqkunapitaqa, manam ni jukllëllatapis oqrarqötsu”. 10  Tsënam Simon Pëdruqa, katsinqan espädanta sutaramur, mandakoq kaq sacerdötipa sirweqnimpa derëcha kaq rinrinta wallurapurqan.* Tsë sirwipakoqpa jutinqa Malcum karqan. 11  Tsënö kaptimpis, Jesusqa kënömi Pëdruta nirqan: “Espädata yakaränanman* kutitsi. ¿Manaku Teyta qomanqan cöpapita* upüman?”. 12  Tsënam soldädukuna, soldädukunapa comandantin y judïukunapa guardiankuna, Jesusta tsaririyarqan y makinta watarkuyarqan. 13  Pëkunaqa Anasmanmi puntata apayarqan, porqui pëqa Caifaspa suegrunmi karqan, y pëmi tsë wataqa mandakoq kaq sacerdöti karqan. 14  Rasumpa kaqchöqa, Caifasmi judïukunata nishqa karqan pëkunapaqqa llapan nunakunarëkur juk nunalla wanunan mas alli kanqanta. 15  Tsënam, Simon Pëdruwan juk mas qateqnin Jesuspa qepanta ëwayarqan. Tsë qateqninqa mandakoq kaq sacerdötiwanmi reqinakoq, tsëmi Jesuswan ëwarqan mandakoq kaq sacerdötipa patiunyaq, 16  peru Pëdruqa waqtallachömi* shëkar quedakurqan. Tsëmi mandakoq kaq sacerdötiwan reqinakoq kaq Jesuspa qateqnin yarqurir, sawanta täpaq warmiwan parlarqan y Pëdruta yëkaratsirqan. 17  Tsënam, sawanta täpaq sirwipakoq warmi Pëdruta kënö nirqan: “¿Manaku qampis tsë nunapa qateqnin kanki?”. Pënam, “noqaqa manam” nirqan. 18  Sirwipakoqkuna y guardiakunam tsaritsiyanqan ninapa jiruroqninchö* shëkäyarqan, porqui alläpam alalaq, tsëmi qoñükïkäyarqan. Pëdrupis pëkunawanmi qoñükur shëkarqan. 19  Tsënam precisaq sacerdötiqa Jesusta tapurqan qateqninkunapaq y yachatsikunqankunapaq. 20  Jesusnam kënö nir contestarqan: “Noqaqa nunakunapa jananchömi parlarqö. Judïukuna ëwaräyänan Diosta adorayänan wayikunachö y templuchömi imëpis yachatsikurqö, y manam ni imatapis pakëllapaqa parlarqötsu. 21  ¿Imanirtaq tapupämanki? Parlanqäkunata wiyashqa kaqkunata tapupë. ¡Rikë! Pëkunam musyayan imata parlanqäta”. 22  Tsëkunata nir ushariptinmi, tsëchö shëkaq juk guardia Jesusta laqyëkurqan, y kënö nirqan: “¿Tsënöku precisaq sacerdötita contestanki?”. 23  Jesusnam kënö contestarqan: “Imatapis mana allita nishqa kaptïqa, nimë imachö mana alli kashqa kanqanta, peru ninqä alli kashqa kaptinqa, ¿imanirtaq maqamanki?”. 24  Tsënam Anasqa mandakoq kaq sacerdöti Caifasman makin watashqata despacharqan. 25  Simon Pëdrunam qoñükur tsëchö shëkarqan. Tsënam kënö niyarqan: “¿Manaku qampis pëpa juknin qateqnin kanki?”. Negarmi “noqaqa manam” nirqan. 26  Mandakoq kaq sacerdötipa juk sirweqninnam, rinrinta Pëdru wallupunqan* sirwipakoqpa kastan, kënö nirqan: “Noqaqa qamtam huertachö pëwan këkaqta rikarqaq, ¿awku manaku?”. 27  Tsënö kaptimpis, Pëdruqa yapëmi negarqan, y tsëllanam, juk gällu cantarirqan. 28  Tsënam, Caifaspa wayimpita gobernadorpa wayinyaq Jesusta apayarqan. Tsë hörapaqqa qoya qoyallaran* karqan, peru kikinkunaqa manam gobernadorpa wayinman yëkuyarqantsu, tsënöpa Pascua fiesta mikïta mikuyänanrëkur mana rakchatäkuyänampaq.* 29  Tsënam Pilätuqa pëkuna këkäyanqanman yarqurir kënö nirqan: “¿Imapitataq kë nunata acusayanki?”. 30  Pëkunanam kënö contestayarqan: “Mana allita ruraq nuna mana kaptinqa, manachi qamman apayämümantsu karqan”. 31  Tsënam Pilätuqa kënö nirqan: “Waqtaman apayë y leynikikuna ninqanmannö kikikikuna juzgayë”. Judïukunanam kënö niyarqan: “Noqakunapaqa manam autoridänïkuna kantsu pitapis wanutsiyänäpaq”. 32  Tsëqa pasakurqan ichikllachöna imanö wanunampaq kaqta kikin Jesus parlanqannölla cumplikänampaqmi. 33  Tsënam Pilätuqa gobernadorpa wayinman yapë yëkurirqan, y Jesusta qayarirmi kënö nirqan: “¿Qamku judïukunapa reynin kanki?”. 34  Jesusnam kënö contestarqan: “¿Kikikillapitaku tsënö tapumanki, o jukkunaku noqapita parlapäyäshurqunki?”. 35  Pilätunam kënö contestarqan: “Noqaqa manam judïutsu kä, ¿aw? Kikikipa nacionnikim y precisaq sacerdötikunam noqaman entregayämushurqunki. ¿Imatataq rurarqunki?”. 36  Jesusnam kënö contestarqan: “Gobiernüqa manam kë mundupitatsu.* Sitsun kë mundupita* Gobiernü kanman karqan, tsëqa sirwimaqnïkunam judïukunapa makinman mana entregashqa kanäpaq pelyayanman karqan. Peru ninqaqnöpis, Gobiernüqa manam kë mundupitatsu”.* 37  Tsënam Pilätuqa kënö nirqan: “Tsëqa, ¿reyku kanki?”. Jesusnam kënö contestarqan: “Kikikim rey kanqäta nikanki. Noqaqa tsëpaqmi yurikushqa kä, y tsëpaqmi nunakunaman shamushqa kä, rasumpa kaqpita musyatsikunäpaq. Pipis rasumpa kaqta cäsukoq kaqqa, ninqäkunatam wiyakun”. 38  Pilätunam kënö nirqan: “¿Imataq rasumpa kaqqa?”. Tsënö nirirmi, judïukuna kaqman yapë yarqurqan y kënö nirqan: “Manam pëchö ni ima jutsatapis tarïtsu. 39  Jinamampis, Pascua fiestachöqa costumbrikikunamannömi juk nunata libri jaqinäpaq mañayämanki. Tsëqa, ¿judïukunapa reyninta libri jaqirinätaku munayanki?”. 40  Tsënam pëkunaqa sinchipa yapë kënö niyarqan: “¡Ama kë nunataqa, sinöqa Barrabasta!”. Y Barrabasqa suwakoq nunam karqan.

Päginapa ura kuchunchö willakïkuna

Kënöpis niyanmi: traicionaqnin.
Kënöpis niyanmi: qorikashqa.
Rikäri “Käyitsikïkuna” nishqanta.
Kënöpis niyanmi: roqurapurqan.
Kënöpis niyanmi: churaränanman.
Cöpaqa Diospa munënin cuentam, y munëninqa karqan Diosta ofendinqanta tumparnin Jesusta wanutsiyänanta jaqim.
O: “yaykunallachömi”.
Kënöpis niyanmi: entëru kuchunchö.
Kënöpis niyanmi: roqupunqan.
Kënöpis niyanmi: wäray wärayllaran.
Kënöpis niyanmi: qanratäkuyänampaq.
Rikäri “Käyitsikïkuna” nishqanta.
Rikäri “Käyitsikïkuna” nishqanta.
Rikäri “Käyitsikïkuna” nishqanta.