Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Këchö Biblia | TRADUCCIÓN DEL NUEVO MUNDO DE LAS SANTAS ESCRITURAS

Juan 15:1-27

IMAKUNA KANQAN

  • Rasumpa kaq üvas plantapaq parlaq igualatsikï (1-10)

  • Cristu kuyakunqannö kuyakïpaq mandakï (11-17)

    • Manam ‘këpita mas kuyakïqa kantsu’ (13)

  • Jesuspa qateqninkunata mana cäsukoq nunakuna chikiyan (18-27)

15  Noqam rasumpa kaq üvas planta kä, y Teytämi üvas plantata cuidaq.  Pëqa noqachö këkaq mana wayoq rämataqa llapantam wallurin, y wayoq kaq rämataqa, mas wayunampaqmi llümapar* limpian.  Qamkunaqa parlapäyanqaq yachatsikïkunawanmi limpiuna këkäyanki.  Noqawan juknölla imëpis kayë, y juknöllam noqapis qamkunawan imëpis kashaq. Imanömi juk rämapis üvas plantachö mana këkarqa kikinllapita wayïta puëdintsu, tsënöllam noqawan juknölla imëpis mana karqa qamkunapis wayïta puëdiyankitsu.*  Noqam üvas planta kä; qamkunam rämakuna kayanki. Noqawan imëpis juknölla kaq, y noqa pëwan juknölla kaptïqa, pëqa mëtsikatam wayunqa; porqui noqapita rakikarqa, manam ni imatapis rurëta puëdiyankitsu.  Pipis noqawan juknölla imëpis mana karqa, rämanömi wallurir jitashqa kanqa, y tsakirinqam. Y tsë rämakunataqa ëllurirmi* ninaman jitëkuyan, y tsëchömi kayakäriyan.  Sitsun noqawan juknölla imëpis kayanki, y ninqäkuna shonqïkikunachö imëpis këkanqa, tsëqa munayanqëkita mañakuyë, y mañakuyanqëkinömi rurakanqa.  Këta rurayaptikim Teytätaqa alläpa precisaqpaq churayan: mëtsikata imëpis wayuyaptiki y qateqnïkuna kayanqëkita rikätsikuyaptiki.  Imanömi Teyta noqata kuyaman, tsënöllam noqapis qamkunata kuyayaq; kuyakïnïchö imëpis kayë. 10  Mandakunqäkunata wiyakurqa, kuyakïnïchömi imëpis kayanki, noqapis Teyta mandakushqankunata wiyakushqa kar, kuyakïninchö imëpis kanqänö. 11  Tsëkunataqa qamkunata parlapäyarqoq, noqanö kushishqa kayänëkipaqmi, tsënöpa, kushishqa kënikikuna chipyëpa kanampaq. 12  Këmi mandakïnï: qamkunata noqa kuyayanqaqnöllam, qamkunapis jukniki juknikikuna kuyanakuyänëki. 13  Manam ni pipis këpita mas kuyakoqqa kantsu: pipis amïgunkunarëkur kawëninta* qoqpitaqa. 14  Sitsun mandayanqaqkunata rurayanki, tsëqa amïgükunam kayanki. 15  Mananam sirwipakoqkuna nir qayayaqnatsu, porqui juk sirwipakoqqa manam musyantsu patronnin imata ruranqanta, peru qamkunataqa amïgükuna nirmi qayayarqoq, porqui Teytäpita llapan wiyanqätam qamkunataqa musyatsiyarqoq. 16  Manam qamkunatsu noqata akrayämarqunki, sinöqa noqam qamkunata akrayarqoq, y wayur sïguiyänëkipaqmi noqaqa qamkunata churayarqoq, y wayuyanqëki mana ushakänampaq, tsënöpa, Teytäta imatapis jutïchö mañakuyaptiki, qoyäshunëkipaq. 17  Këkunataqa mandayaq, jukniki juknikikuna kuyanakuyänëkipaqmi. 18  Mana cäsukoq nunakuna chikiyäshuptikiqa, musyayankinam qamkunapita mas puntata noqata chikiyämashqa kayanqanta. 19  Sitsun qamkuna mana cäsukoq nunakunanö kayankiman, tsëqa pëkunapa kayaptikim mana cäsukoq nunakunaqa kuyayäshunkiman. Peru qamkunaqa manam mana cäsukoq nunakunanötsu kayanki, sinöqa, mana cäsukoq nunakunapitam qamkunataqa noqa akrayarqoq, tsëmi mana cäsukoq nunakunaqa chikiyäshunki. 20  Imëpis yarpäyë kënö niyanqaqta: sirwipakoqqa manam patronnimpita mas precisaqtsu. Noqata chikimar sufritsiyämashqa këkarqa, qamkunatapis chikiyäshurnikim sufritsiyäshunki; noqa parlanqäkunata wiyakushqa karqa, qamkuna parlayanqëkikunatapis wiyakuyanqam. 21  Peru tsë llapankunataqa jutïrëkurmi contrëkikuna rurayanqa, porqui pëkunaqa manam kachamashqa Kaqta reqiyantsu. 22  Sitsun shamushqatsu käman karqan y pëkunata parlapashqatsu käman karqan, tsëqa manam jutsankuna kanmantsu karqan. Peru kananqa manam jutsankunapita tsapäkïta puëdiyantsu. 23  Noqata chikimaq kaqqa, Teytätapis chikinmi. 24  Sitsun pipis mana ruranqan rurëkunata pëkunapa rikëninkunachö rurashqatsu käman karqan, tsëqa manam jutsankuna kanmantsu karqan; peru kananqa rikäyämashqam y chikiyämashqam, y Teytätapis chikiyashqam. 25  Peru tsëqa pasakushqa pëkunapa Leyninkunachö* kënö qellqarëkaq palabrakuna cumplikänampaqmi: ‘Mana imarëkurmi chikiyämashqa’. 26  Teytapita qamkunaman kachamunäpaq kaq yanapakoq shamurmi, Teytapita shamoq rasumpa kaqta rikätsikoq santu espïritu, tsëmi noqapita musyatsikunqa; 27  jina tsënöllam qamkunapis noqapita musyatsikuyanki, porqui yachatsikur qallanqäpitam noqawan kayarqunki.

Päginapa ura kuchunchö willakïkuna

Kënöpis niyanmi: llawmipar; rawmapar.
Clärum këkan tsënö nirqa alli kaqkunata rurëpaq parlëkanqan.
Kënöpis niyanmi: qoririrmi.
O: “almanta”. Rikäri “Käyitsikïkuna” nishqanta.
Tsënö nirqa, hebreu idiömachö qellqayanqan Bibliapa llapan librunkunapaqmi parlëkan.