Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Këchö Biblia | TRADUCCIÓN DEL NUEVO MUNDO DE LAS SANTAS ESCRITURAS

Juan 14:1-31

IMAKUNA KANQAN

  • Teytaman witinapaq Jesuslla näni kanqan (1-14)

    • “Noqam näni, rasumpa kaq y kawë kä” (6)

  • Santu espïrituta Jesus änikun (15-31)

    • “Teytaqa noqapita mas puëdeqmi” (28)

14  “Ama shonqïkikuna mantsakätsuntsu. Diosman markäkuyanqëkita* rikätsikuyë; jina noqaman markäkuyanqëkitapis rikätsikuyë.  Teytäpa wayinchöqa atska täräna sitiukunam kan. Mana tsënö kaptinqa, qamkunata willayaqmanmi karqan, porqui noqaqa qamkunapaq juk sitiuta alistaqmi nänipa ëwëkä.  Jinamampis, ëwëkanqä nänipa ëwar sïguirqa, y qamkunapaq juk sitiuta alistamurqa, yapëmi kutimushaq y kikïmi wayichö chaskiyashqëki, tsënöpa qamkunapis noqa këkanqächö kayänëkipaq.  Y noqa ëwanqä sitiuman chätsikoq nänitaqa, reqiyankim”.  Tomasnam kënö nirqan: “Teytë, manataq musyayätsu mëta ëwanëkipaq kaqta, tsëqa, ¿imanöpataq tsë nänita reqiyäman?”.  Jesusnam pëta kënö nirqan: “Noqam näni, rasumpa kaq y kawë kä. Mana noqawanqa, manam ni pipis Teytaman shamïta puëdintsu.  Noqata reqimashqa karqa, Teytätapis reqiyankimanmi karqan; kanampita patsëmi reqiyanki. Rasumpa kaqchöqa, rikashqanam kayanki”.  Felïpinam kënö nirqan: “Teytë, Teytata rikëkatsiyämë, y tsëllapaqmi kayäshaq”.  Jesusnam kënö nirqan: “Felïpi, qamkunawan tsëtsika tiempu këkaptïpis, ¿manaraqku reqimarqunki? Noqata rikämashqa kaqqa, Teytatapis rikashqam. ¿Imanirtaq ‘Teytata rikëkatsiyämë’ ninki? 10  ¿Manaku creinki noqa Teytawan juknölla kanqäta, y Teyta noqawan juknölla kanqanta? Qamkunata niyanqaqkunataqa manam kikïllapitatsu parlä, sinöqa, noqawan juknölla këkaq Teytam imëka rurëninkunata noqawan rurëkan. 11  Creiyämë noqa Teytawan juknölla kanqäta y Teyta noqawan juknölla kanqanta; mana tsënö karqa, ruranqäkunata rikar creiyë. 12  Rasumpa kaqllatam qamkunata niyaq: pipis noqaman markäkunqanta* rikätsikoq kaqqa, noqa ruranqäkunatam ruranqa, y noqa ruranqäpitapis mas jatun rurëkunatam ruranqa, porqui noqaqa Teytaman ëwaq nänipam ëwëkä. 13  Jinamampis, jutïchö qamkuna mañakuyaptikiqa, tsëtam rurashaq, tsënöpa Tsurirëkur Teyta alläpa precisaqpaq churashqa kanampaq. 14  Noqapa jutïchö imatapis mañakuyaptikiqa, rurashaqmi. 15  Noqata kuyamarnïqa, mandakunqäkunatam wiyakuyanki. 16  Y noqam Teytata mañakushaq, y pëqa qamkunawan imëpis kanampaqmi juk mas yanapakoqta* qoyäshunki, 17  rasumpa kaqta musyatsikoq santu espïrituta, tsëtaqa manam mana cäsukoq nunakuna chaskita puëdiyantsu, porqui manam rikäyantsu ni reqiyantsu. Qamkunaqa reqiyankim, porqui qamkunawanmi y qamkunachömi këkan. 18  Manam llakishqata* jaqiriyashqëkitsu. Noqaqa qamkunaman kutimushaqmi. 19  Ichikllachönam mana cäsukoq nunakunaqa rikäyämanqanatsu, peru qamkunaqa rikäyämankim, porqui noqa kawar sïguiptïmi, qamkunapis kawayanki. 20  Tsë junaqmi qamkunaqa musyariyanki noqaqa Teytawan juknölla kanqäta, qamkuna noqawan juknölla kayanqëkita, y noqa qamkunawan juknölla kanqäta. 21  Mandakunqäkunata chaskikoq kaq y wiyakoq kaqmi, kuyamaq kaqqa. Y kuyamaq kaqtaqa Teytäpis kuyanqam, y noqapis kuyashaqmi, y alleq reqimänantam jaqishaq”. 22  Tsënam, mana Iscariöti kaq Jüdas kënö nirqan: “Teytë, ¿imanirtaq noqakuna alleq reqiyänaqta jaqinki, peru mana cäsukoq nunakunataqa mana jaqinkitsu?”. 23  Pëta contestarnam Jesusqa kënö nirqan: “Pipis noqata kuyamarqa, ninqäkunatam wiyakunqa, y Teytämi pëta kuyanqa, y ishkäkuna pëman shamïkurmi, pëwan juntu täräyäshaq. 24  Noqata mana kuyamaq kaqqa, manam parlanqäkunata wiyakuntsu. Wiyayanqëki parlanqäkunaqa, manam noqapatsu, sinöqa kachamaqnï Teytapam. 25  Qamkunallawanraq kanqäyaqmi këkunataqa qamkunata parlapäyarqoq. 26  Peru noqapa jutïchö Teyta kachamunampaq kaq yanapakoq santu espïritum, llapanta yachatsiyäshunki, y llapan ninqäkunata yarpätsiyäshunki. 27  Yamë këtam qamkunata jaqipuyaq; yamë kënïtam qamkunata qoyaq. Manam mana cäsukoq nunakuna qokuyanqannötsu noqaqa qamkunata qoyaq. Ama shonqïkikuna yarpachakutsuntsu ni mantsakätsuntsu. 28  Wiyayashqankim kënö niyanqaqta: ‘Ëwakümi y yapëmi qamkuna kaqman kutimushaq.’ Kuyayämarnïqa Teyta kaqta ëwakunqäpita kushikuyankimanchi, porqui Teytaqa noqapita mas puëdeqmi. 29  Tsëmi kananqa manaraq tsëkuna pasakuptin qamkunata willayarqoq, tsënöpa, tsëkuna pasakuptin, parlanqäkunata qamkuna creiyänëkipaq. 30  Manam mastaqa qamkunawan parlashaqnatsu, porqui mana cäsukoq nunakunapa gobernaqninmi shamun, y pëqa manam noqata dominamëta puëdintsu.* 31  Tsënö kaptimpis, Teytata kuyanqäta nunakuna musyayänampaqmi, ruranäpaq mandamanqantanölla llapantapis rurëkä. Sharkuyë, këpita ëwakushun.

Päginapa ura kuchunchö willakïkuna

Kënöpis niyanmi: yärakuyanqaykita.
Kënöpis niyanmi: yärakunqanta.
O: “shoqakoqta”.
O: “teytannaq o mamannaq wamratanö”.
O: “mandamänampaq podernin kantsu”.