Llapan kanqanman ëwari

Qallananchö tïtulukunaman ëwë

Jehoväpa testïgunkuna

Idiömata akrë Quechua (Ancash)

Juan 10:1-42

IMAKUNA KANQAN

  • Mitsikoq y üsha corralkuna (1-21)

    • Jesusmi alläpa alli kaq mitsikoqqa (11-15)

    • “Juk üshäkunapis kapamanmi” (16)

  • Templu Ushatsi fiestachö judïukuna Jesusta tariyan (22-39)

    • Mëtsikaq judïukuna creita munayantsu (24-26)

    • “Üshäkunaqa qayanqätam wiyayan” (27)

    • Tsuriwan Teytaqa juknöllam kayan (30, 38)

  • Jordan mayupa wak tsimpanchö mëtsikaq creikuyan (40-42)

10  “Rasumpa kaqllatam qamkunata niyaq: üsha corralman punkupa mana yëkoq kaq, sinöqa juk lädupa lloqaq kaqqa, suwam y jukkunapa imantapis mälas* apakoqmi.  Peru punkupa yëkoq kaqqa, üshakunapa mitseqninmi.  Pëtaqa täpakoqpis punkuta kichapunmi, y qayanqantam üshakunaqa wiyayan. Pëqa jutimpam üshankunata qayan y waqtaman jorqan.  Llapan üshankunata waqtaman jorqarirqa, puntankunatam ëwan, y üshakunaqa qepantam ëwayan, porqui imanö qayanqantam reqiyan.  Pëkunaqa manam ni imanöpapis mana reqiyanqan nunataqa qatiyanqatsu, antis pëpitaqa escaparmi* ëwakuyanqa, porqui mana reqishqa nunakuna qayanqantaqa manam reqiyantsu”.  Jesusqa kë igualatsikïwanmi pëkunata yachatsirqan, peru pëkunaqa manam käyiyarqantsu* ima nita munanqanta.  Tsëmi Jesusqa yapë kënö nirqan: “Rasumpa kaqllatam qamkunata niyaq: noqaqa üshakunapaq punkum kä.  Noqa tukur shamushqa kaqkunaqa, llapampis suwa y jukkunapa imantapis mälas apakoqmi kayan; peru üshakunaqa pëkunata manam wiyayashqatsu.  Noqam punku kä; pipis noqapa yëkoq kaqqa, salvashqam kanqa, y pëqa yëkunqam y yarqunqam, y pastutam* tarinqa. 10  Suwaqa üshakunata suwaq, wanutseq y ushakätseqmi shamun. Peru noqaqa kawëyoq kayänampaqmi shamurqö, imëyaqpis kawëyoq kayänampaq. 11  Noqaqa alläpa alli kaq mitsikoqmi kä; alläpa alli kaq mitsikoqqa, üshakunarëkurmi kawëninta* qon. 12  Qellëpaq mitsipakoq kaqqa, manam rasumpa mitsikoqtsu, y üshakuna pëpa mana kaptinmi atoq* shamoqta rikëkurqa, üshakunata jaqirïkur escapar* ëwakun. Tsënam atoqqa wakin kaqta apakun, y wakin kaqtaqa ramakäratsin.* 13  Qellëllapaq mitsipakoq karmi, üshakunapaqqa ni imapis qokuntsu. 14  Noqaqa alläpa alli kaq mitsikoqmi kä. Noqaqa üshäkunata reqïmi, y üshäkunapis reqiyämanmi, 15  Teyta reqimanqannö, y noqapis Teytata reqinqänö; y noqaqa üshakunarëkurmi kawënïta* qö. 16  Y juk üshäkunapis kapamanmi, pëkunaqa manam kë kanchapitatsu* kayan; pëkunatapis kë kanchamanmi pushamushaq, y qayanqätam wiyayanqa, y juk grüpulla y juk mitseqyoqllam kayanqa. 17  Tsëmi Teytaqa kuyaman, porqui kawënïtam* qö, tsënöpa yapë chaskinäpaq. 18  Manam ni pipis qochimantsu,* sinöqa kikïpa munënïpitam qö. Autoridäyoqmi kä qonäpaq, y yapë chaskinäpaqpis autoridäyoqmi kä. Tsënö kanampaq mandakïtaqa Teytäpitam chaskirqö”. 19  Tsënö ninqampitam judïukunaqa kikinkunapura yapë rakikäkuriyarqan. 20  Atskaqmi kënö niyarqan: “Pëqa supëyoqmi, y löcuyashqam. ¿Imanirtaq pëta wiyayanki?”. 21  Wakinkunanam kënö niyarqan: “Kë ninqankunaqa manam supëyoq nunapitanötsu shamun. ¿Manachi supëqa wiskupa nawinta kachakätsita puëdinmantsu aw?”. 22  Tsë witsanmi Templu Ushatsi fiestata Jerusalenchö celebrëkäyarqan. Tamya witsanmi karqan, 23  y Jesusqa templuchömi purikarqan, Salomonpa columnakunayoq pasadïzunchö. 24  Tsënam judïukunaqa jiruroqninman* juntakärir kënö nir qallëkuyarqan: “¿Imëyaqtaq yarpakachätsiyämar** katsiyämanki? Qam Cristu karqa, cläru willëkayämë”. 25  Jesusnam kënö contestarqan: “Qamkunataqa willayarqoqnam, peru qamkunaqa manam creiyankitsu. Teytäpa jutinchö ruranqä rurëkunam, noqa pï kanqäta musyatsikun. 26  Peru qamkunaqa manam creiyankitsu, porqui qamkunaqa manam üshäkunatsu kayanki. 27  Üshäkunaqa qayanqätam wiyayan, y noqaqa pëkunata reqïmi, y pëkunaqa qatiräyämanmi. 28  Noqaqa imëyaqpis kawakïtam pëkunata qö, y manam ni imëpis ushakätsishqatsu kayanqa, y manam ni pipis makïpita qochimanqatsu.* 29  Teytä qomanqanqa wakin kaq cösaskunapitapis mas precisaqmi, y manam ni pipis Teytapa makimpitaqa qochita puëdinqatsu. 30  Noqawan Teytaqa juknöllam* kayä”. 31  Tsënam judïukunaqa rumiwan tsampiyänampaq* rumikunata yapë tsariyarqan. 32  Jesusnam kënö nirqan: “Teytä mandamaptinmi mëtsika alli rurëkunata qamkunata rikätsiyarqoq. ¿Mëqan kaq rurëpitataq rumiwan tsampiyämanki?”. 33  Judïukunanam kënö contestayarqan: “Manam allikunata ruranqëkipitatsu rumiwan tsampiyaq, sinöqa Diosta ofendipa parlanqëkipitam; porqui qamqa nunalla këkarmi dios tukunki”. 34  Jesusnam kënö contestarqan: “¿Manaku Leynikikunachö* kënö qellqarëkan: ‘Noqam nirqö: “Qamkunaqa dioskunam* kayanki”’ nir? 35  Diosqa, parlar condenanqan kaqkunapaqpis ‘dioskuna’ ninmi, y Diospa Palabranqa manam ni imëpis pantantsu, 36  tsëqa, ¿imanirtaq noqataqa Teyta akramashqa këkaptin y nunakunaman kachamashqa këkaptin, ‘Diospa Tsurinmi kä’ ninqäpita ‘Diosta ofendipam parlanki’ niyämanki? 37  Teytäpa rurëninkunata mana ruraptïqa, ama creiyämëtsu. 38  Peru pëpa kaqta ruraptïqa, noqata mana creimarpis, ruranqäkunam creiyë, tsënöpa Teyta noqawan juknölla kanqanta, y noqa Teytawan juknölla kanqäta musyayänëkipaq, y musyar sïguiyänëkipaq”. 39  Tsëmi yapë tsarita munayarqan, peru makinkunapitam escapar* ëwakurqan. 40  Y yapëmi Jordan mayupa wak tsimpanman ëwakurqan, nunakunata Juan bautizar qallanqan sitiuman, y tsëchömi quedakurqan. 41  Y mëtsikaqmi pë kaqman shayämurqan, y kënö nirmi qallëkuyarqan: “Juanqa manam ni juk señal-llatapis rurarqantsu, peru kë nunapaq Juan ninqankunaqa rasumpa kaqllam llapampis kashqa”. 42  Y mëtsikaqmi tsëchö pëman markäkur* qallëkuyarqan.

Päginapa ura kuchunchö willakïkuna

Kënöpis niyanmi: amälas.
Kënöpis niyanmi: qeshpirmi; safarmi.
Kënöpis niyanmi: entiendiyarqantsu.
Kënöpis niyanmi: qewatam.
O: “almanta”. Rikäri “Käyitsikïkuna” nishqanta.
Griëgu idiömachöqa “löbu” ninmi. Tsë animalqa atoq niraqmi, peru mas jatunmi.
Kënöpis niyanmi: qeshpir; safar.
Kënöpis niyanmi: witsikäratsin.
O: “almäta”. Rikäri “Käyitsikïkuna” nishqanta.
Kënöpis niyanmi: qenchapitatsu.
O: “almätam”. Rikäri “Käyitsikïkuna” nishqanta.
Kënöpis niyanmi: qechumantsu.
Kënöpis niyanmi: entëru kuchunman.
Kënöpis niyanmi: yarpachakatsiyämar.
O: “almäkunata yarpakachätsir”. Rikäri “Käyitsikïkuna” nishqanchö “Alma” neqta.
Kënöpis niyanmi: qechumanqatsu.
O: “jukllëllam”.
Kënöpis niyanmi: saqmayänampaq.
Tsënö nirqa, hebreu idiömachö qellqayanqan Bibliapa llapan librunkunapaqmi parlëkan.
O: “dioskunanömi”.
Kënöpis niyanmi: qeshpir, safar.
Kënöpis niyanmi: yärakur.