Llapan kanqanman ëwari

Qallananchö tïtulukunaman ëwë

Jehoväpa testïgunkuna

Idiömata akrë Quechua (Ancash)

Filipensis 2:1-30

IMAKUNA KANQAN

  • Cristiänu karnin qollmi shonqu kë (1-4)

  • Cristu qollmi shonqu kanqan y precisaq carguman churashqa kanqan (5-11)

  • Trabajar sïguiyë salvacionta lograyänëkipaq (12-18)

    • Aktsi cuenta atsikyë (15)

  • Timoteutawan Epafrodïtuta kachayanqan (19-30)

2  Cristurëkur jukniki juknikikuna kallpata qonakïta puëdirqa, kuyanakur shoqanakïta puëdirqa, jukpa biennin ashita puëdirqa, shonqupita patsë kuyanakïta y ankupänakïta* puëdirqa,  tsëqa chipyëpa kushitsiyämë tsë pensëyoqlla y tsë kuyakïyoqlla karnin, chipyëpa juknölla* kar y tsë yarpëyoqlla karnin.  Ama contrakïta munar ni alläpa precisaq tukur imatapis rurayëtsu, tsëpa rantinqa qollmi shonqïkikunawan wakinkunata qamkunapita mas precisaqtanö rikäyë,  ama kikikikunapa biennikikunallataqa ashiyëtsu, sinöqa wakinkunapa bienninkunatapis.  Tsënö pensëyoq imëpis kayë, Cristu Jesus pensanqannö,  pëqa Dios niraq këkarpis, manam Diosllapa kaqta qochitaqa* ni ichikllapis pensarqantsu, juk parlakïchöqa, Dioswan igual këtaqa.  Manam; tsëpa rantinqa, llapan kanqantam jaqirirqan, sirwipakoqnömi tikrarqan y nuna këmanmi charqan.*  Tsëpitapis masqa, nunanö shamurmi* qollmi shonqu karqan y wanunqanyaq wiyakoq karqan, awmi, sufritsikoq qeruchö* wanunqanyaq.  Tsërëkurmi Diosqa, juk precisaq carguman churarqan y kuyarmi wakin jutikunapa janampa këkaq jutita qorqan. 10  Tsënöpa Jesuspa jutinchö llapankuna qonqurikuyänampaq, —ciëluchö këkaqkuna, patsachö këkaqkuna y patsa rurinchö këkaqkuna— 11  y Jesucristu Señor kanqanta llapankuna rikätsikuyänampaq, tsënöpa Teyta Dios alabashqa kanampaq. 12  Kuyashqa wawqikuna y panikuna, qamkunaqa imëpis wiyakoqmi kayarqunki qamkunawan këkaptï, y kanan mana këkaptïpis qamkunaqa masran wiyakoq kayanki. Jina tsënölla respetakur y mantsakur llapëkikuna trabajar sïguiyë salvacionta lograyänëkipaq. 13  Porqui Diosmi allita rikanqanmannö valuratsiyäshunki, rurëta munatsiyäshurniki y rurayänëkipaq kallpata qoyäshurniki. 14  Wasata mana rimarlla y mana pleyturlla imëkatapis rurarnin sïguiyë, 15  tsënöpa culpannaq y jutsannaq kayänëkipaq, kanan witsan mana alli y llutan ruraq nunakunachö Diospa limpiu shonquyoq tsurinkuna kayänëkipaq, tsënö nunakunachömi qamkunaqa imëka aktsi cuenta atsikyäyanki, 16  Diospa kawatsikoq palabrampita alli tsaripukurnin. Tsëqa, ni ëqinqä* ni sinchi trabajanqä envänu mana kanqanta musyarmi Cristupa junaqninchö alläpa kushikushaq. 17  Tsënö kaptimpis, sagrädu rurëchö yanapakurnin imëka pishtashqa ofrenda jananman jichayanqan vïnu ofrendanö këkarpis, llapëkikunawan juntum alläpa kushikü, porqui markäkïninkunam qamkunatapis tsëta rurëman chätsiyäshurqunki. 18  Jina tsënölla qamkunapis kushikuyë y noqawan juntu alläpa kushikuyë. 19  Señor Jesuspa munënin kaptinqa, Timoteuta ichikllachöna qamkunaman kachamïtam shuyä, tsënöpa qamkunapita noticiakunata wiyar kallpata tsarinäpaq. 20  Porqui pënö yanapakïta munaqqa manam pipis kantsu, pëqa shonqupita patsëmi qamkunapa biennikikunapaq yarpachakun. 21  Porqui wakinkunaqa llapampis kikinkunapa bienninkunallatam ashiyan, y manam Jesucristupa kaqtatsu. 22  Peru qamkunaqa alleqmi musyayanki imanö kanqanta rikätsikunqanta, pëqa imëka teytanwan juntu sirwipakoq wamranömi, alli willakïkuna më tsëman chänampaq noqawan juntu imëka sirwipakoqnö yanapakushqa. 23  Tsëmi, noqawan imapis pasakunampaq kaqta musyarirlla, pëta qamkunaman kachamïta shuyä. 24  Rasumpa kaqchöqa, Señorpa munënin kaptinqa noqapis ichikllachöna qamkunaman shamïtam shuyarä. 25  Peru tsëyaqqa alläpa precisaqtanömi rikä, wawqï, yanapamaqnï, Cristuta soldädunö sirweq mayï, kachayämunqëki y wananqächö sirwimaqnï Epafrodïtuta qamkunaman kachamïta, 26  porqui llapëkikunatam rikäyäshïnikita alläpa munan, y alläpam llakikun qeshyashqa kanqanta qamkuna wiyashqa kayanqëkipita. 27  Rasumpam qeshyashqa y ichikllapam wanushqatsu, peru Diosmi ankupashqa* y rasumpa kaqchöqa manam pëllatatsu, sinöqa noqatawanmi, tsënöpa qatinallaman alläpa llakikï mana nitiramänampaq. 28  Tsëmi qamkunaman jinallachö kachëkämü, tsënöpa yapë rikärirnin kushikuyänëkipaq y noqapis alläpaqa manana yarpachakunäpaq. 29  Tsëmi, Señorta sirweqkunata imëpis chaskiyanqëkinölla alläpa kushishqa chaskïkuyë, y tsënö nunakunataqa alläpa kuyarnin sïguiyë. 30  Porqui Cristupa* rurëninchö yanapakunqanchömi ichikllapa wanushqatsu, qamkunapa rantikikuna këchö sirwimar yanapamanqanchö kawënintapis peligruman churar.

Päginapa ura kuchunchö willakïkuna

Kënöpis niyanmi: llakipänakuyta.
O: “kawëchö juknölla”.
Kënöpis niyanmi: qechuytaqa.
Griëgu idiömachöqa “nunakunawan igual këmanmi charqan” ninmi.
Griëgu idiömachöqa “nuna niraq këkarmi” ninmi.
Rikäri “Käyitsikïkuna” nishqanta.
Kënöpis niyanmi: cörrinqä.
Kënöpis niyanmi: llakipashqa.
O, itsapis: “Señorpa”.