Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Këchö Biblia | TRADUCCIÓN DEL NUEVO MUNDO DE LAS SANTAS ESCRITURAS

Efesius 4:1-32

IMAKUNA KANQAN

  • Cristupa cuerpunchö juknölla kë (1-16)

    • Qarënö nunakuna (8)

  • Unë imanöpis kë y mushoq imanöpis kë (17-32)

4  Tsëmi noqa, Señor-rëkur prësurëkaq, qamkunata rogayaq qayashqa kayanqëkimannö shumaq portakuyänëkipaq,  chipyëpa qollmi shonqïkikunawan, yachanëpaq kënikikunawan y pacienciayoq kënikikunawan, kuyanakuyanqëkirëkur jukniki juknikikuna aguantanakur,  juknöllata katsikoq santu espïritupa yanapakïninwan juk shonqulla këman chätsikoq yamë kë qamkunachö imëpis kanampaq llapan puëdiyanqëkimannö kallpachakurnin.  Juk cuerpullam kan, y juk santu espïritullam kan, qamkuna juk shuyäkïllaman qayashqa kayanqëkinö;  juk Señorlla, juk creikïlla, juk bautizakïlla;  juk Dioslla y llapankunapa Teytan, pëqa llapankunapa janampam këkan, llapankunawanmi y llapankunachömi.  Noqantsikqa cada ünum Diospa alläpa alli këninta rikarquntsik. Tsëtaqa rikarquntsik debaldi qarëta Cristu imanö rakipamanqantsikchömi.  Porqui kënömi nin: “Rarata* ëwakurmi wakin nunakunata prësu apakurqan; creikoqkunatam tsë nunakunata qarëtanö qorqan”.  Peru, ¿imatataq rikätsikun “rarata ëwakurmi” nirqa? Tsëqa rikätsikun jina urämushqa kanqantam, juk parlakïchöqa, patsaman urämushqa kanqanta. 10  Urämoq kaqllam jina ciëlupitapis mas rarata ëwarqan, tsënöpa llapan imëkakunata cumplikätsinampaq. 11  Wakinkunatam apostol kayänampaq churarqan, wakinkunatanam Diospa willakoqnin* kayänampaq, wakinkunatanam alli willakïkunata yachatsikoq kayänampaq, wakinkunatanam mitseq y yachatsikoq kayänampaq, 12  santu nunakunata alli kaqman kutikätsiyänampaq,* Diospa kaqchö rurëkunata rurayänampaq, Cristupa cuerpun kaqkunata sinchiyätsiyänampaq, 13  llapantsik creikïchö juknölla këta y Diospa Tsurinta alli reqita logranqantsikyaq, poqushqa nuna kanqantsikyaq, Cristu chipyëpa poqu kanqannö noqantsikpis poqu këman chanqantsikyaq. 14  Tsëqa amana pishi wamrakuna kashunnatsu, ni yachëllapa engañakoq nunakunapa yachatsikïninkunata cäsushuntsu; pëkunata cäsurqa imëka laqcheqsaq yaku wakman këman jitanqan y vientu wakman këman apanqan barcunömi kashun. 15  Tsëpa rantinqa, rasumpa kaqta parlarnin, y kuyanakunqantsikta rikätsikurnin, llapanchö poqu këman chäshun Cristunö kanapaq, pëmi dirigimaqnintsik.* 16  Përëkurmi cuerpuchö llapan këkaqkuna juknölla këkäyan, y llapan moqukunapa yanapakïninwanmi kikinkunapura wanayanqankunachö* yanapanakuyan. Cuerpuchö llapan këkaqkuna rurayänampaq kaqta cada ünu rurarqa, cuerpu winanampaqmi yanapakuyan, tsënöpa entëru cuerpu kuyakïchö sinchiyätsishqa kanampaq. 17  Tsëmi këta nï, y Señorpa jutinchömi këta musyatsikü, juk nacion nunakuna ni imapaqpis mana sirweqkunata* pensëninkunachö katsirnin kawayanqanmannö manana kawayänëkipaq. 18  Pëkunaqa ampeqchönömi* pensëninkunachö këkäyan, y Diospita shamoq kawëpitam karuchö këkäyan, tsënöqa këkäyan mana musyarmi, shonqunkuna chukru kaptin. 19  Ima alli kanqanta o ima mana alli kanqanta manana cuentapaq churarmi pëkunaqa mana penqakur mana allikunata rurar* kakuyarqan, tsënöpam ërayarnin tukïläya melanëpaq rurëkunata rurayarqan. 20  Peru qamkunaqa manam Cristu tsënö kanqantatsu yachakuyarqëki, 21  pëta rasumpa wiyashqa kar y pëpita rasumpa yachakushqa karqa, Jesuschö rasumpa kaq këkanqanmannö. 22  Qamkunaqa unë imanöpis kayanqëkita jaqiyänëkipaqmi yachatsishqa kayarqëki, tsë imanöpis kayanqëkiqa, unë portakuyanqëkimannömi, y engañakoq munëkunawanmi mas mana alliyäkïkan. 23  Y pushayäshoqniki pensënikikunachömi* mushoq tikrarnin sïguiyänëki, 24  y mushoq imanöpis këtam imëka röpatanö vistikuyänëki, porqui tsë imanöpis këqa Diospa munëninmannömi kamashqa karqan, y tsëqa alli kaqta rurë y mana jaqikoq këmi. 25  Tsëmi kananqa, engañakïta jaqishqana këkarqa, cada ünu nuna mayikikunawan rasumpa kaqta parlayë, porqui llapantsikmi juk cuerpullachö këkantsik y juknintsikpa juknintsikpam kantsik. 26  Piñashqapis* kayë, peru ama jutsataqa rurayëtsu; ama piñashqallaraq këkäyaptikiqa inti* jeqatsuntsu;* 27  ni ama Diabluta lugarnin qoyëtsu. 28  Suwakoqqa amana suwakutsunnatsu, tsëpa rantinqa sinchi trabajatsun makinwan alli rurëkunata rurar, tsënöpa pipis faltapakoqta rakipänampaq.* 29  Ama shimikikunapita yarqutsuntsu ni ima rakcha* parlëkuna, sinöqa alli kaqlla, precisanqanmannö kallpata qokoq kaqlla, tsënöpa wiyayäshoqnikikunata bienninkunapaq kaqta qoyänëkipaq. 30  Jina ama Diospa santu espïritunta llakikätsiyëtsu, porqui tsëwanmi sellashqa kayarqunki chaninta pagakushqa kaptin juk junaq librashqa kayänëkipaq. 31  Qamkunaqa jaqiyë piñakur* chikikïta, cölerakïta, piñakïta, qayapäkïpa parlëta y ashakïpa* parlëta, jina llapan mana allikunatapis. 32  Tsëpa rantinqa jukniki juknikikunapaq alli kayë, shonqupita patsë ankupänakuyë,* y jukniki juknikikuna imëkapitapis perdonanakuyë, qamkunatapis Cristurëkur Dios imëkapita perdonayäshunqëkinölla.

Päginapa ura kuchunchö willakïkuna

Kënöpis niyanmi: janaman.
Griëgu idiömachöqa “profëtakuna” ninmi. Rikäri “Käyitsikïkuna” nishqanta.
O: “yachatsiyänampaq”.
Griëgu idiömachöqa “peqantsik” ninmi.
Kënöpis niyanmi: necesitäyanqankunachö.
O: “mana kaqkunata”.
Kënöpis niyanmi: tsakaychönömi; tutapëchönömi.
Griëgu idiömachö: a·sel·guei·a. Rikäri “Käyitsikïkuna” nishqanta.
O: “pensënikikunata dominaq kallpachömi”. Griëgu idiömachöqa “pensënikikunapa espïritunchö” ninmi.
Kënöpis niyanmi: ajashqapis.
Kënöpis niyanmi: rupay.
Kënöpis niyanmi: ullutsuntsu.
Kënöpis niyanmi: rakipunampaq.
Kënöpis niyanmi: qanra.
Kënöpis niyanmi: ajar.
Kënöpis niyanmi: insultakuypa.
Kënöpis niyanmi: llakipänakuyay.