Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Këchö Biblia | TRADUCCIÓN DEL NUEVO MUNDO DE LAS SANTAS ESCRITURAS

Efesius 2:1-22

IMAKUNA KANQAN

  • Kawënintsik qomarqantsik y Cristutawan juknöllata tikraratsimarqantsik (1-10)

  • Rakikoq perqa ushakätsishqa kanqan (11-22)

2  Jinamampis, Diosmi qamkunataqa kawëta qoyäshurqunki, mana allikunata rurar y jutsasapa karnin wanushqa cuenta këkäyaptikipis,  tsënömi qamkunaqa juk tiempuchö kawayarqëki mana cäsukoq nunakunata makinchö katseq imëkapis imanö këkanqanmannö,* nunakunata autoridäninchö këkätseq vientupa gobernaqnimpa munëninmannö, tsë vientuqa, kanan witsan mana wiyakoq nunakunata imëkata ruratseq pensëmi.  Awmi, juk tiempuchöqa pëkunachömi llapantsikpis jutsasapa ëtsantsikpa mana alli munëninkunata rurar kawarqantsik, jutsasapa ëtsantsikpa munëninmannö y pensënintsikkunamannö rurar, y yurikunqantsikpita patsëmi wakinkunanö Diospa piñakïninta* chaskeqpaq karqantsik.  Peru Diosqa alläpa ankupäkoq* karmi, jatun kuyakïninwan kuyamarnintsik,  kawënintsik qomarqantsik y Cristutawan juknöllata tikraratsimarqantsik, mana alli rurënintsikrëkur wanushqa këkashqapis —alläpa alli kënimpitam qamkunaqa salvashqa kayarqunki—.  Jinamampis juntutam sharkatsimarqantsik y Cristu Jesuswan juknölla këchömi ciëluchö juntuta tätsimarqantsik,  tsënöpa shamoq kaq imëkapis imanö këkanqan witsanchö,* noqantsikta, Cristu Jesuswan juknölla këkaqkunata kuyamarnintsik,* alläpa alli kënimpita imawampis mana igualaq allikunata rikätsimänapaq.  Kë alläpa alli kënimpitam qamkunaqa markäkïnikikunarëkur* salvashqa kayarqunki, y tsëqa manam qamkunarëkurtsu,* tsëpa rantinqa Diospa qarëninmi.  Tsë salvacionqa manam rurëkunapitatsu, tsënöpa pipis ni imanöpapis mana alabakunampaq. 10  Noqantsikqa Diospa rurëninmi* kantsik y alli rurëkunata ruranapaqmi Cristu Jesuswan juknölla këchö kamashqa karquntsik, tsëkunataqa puntallapitanam Dios dispunirqan tsëkunamannö kawanapaq. 11  Tsëmi, yarpäyë juk tiempuchöqa yurikïnikikunapita patsë juk nacion nunakuna kayanqëkita, “penqëninkunachö señalashqakuna”* nir reqishqa kaqkunam “penqëninkunachö mana señalashqakuna” nir reqiyäshurqëki, tsë señalqa nunakunapa makimpam qarankunachö rurashqa këkan. 12  Tsë witsankunaqa Cristunnaqmi kayarqëki, Israel nacionpita rakikashqa, Diospa änikïninrëkur* patsakaq conträtukunachö mana këkaqkuna; manam shuyäkïnikikuna karqantsu y Diosninnaqmi mana cäsukoq nunakunachö këkäyarqëki. 13  Peru kananqa, juknöllam Cristu Jesuswan këkäyanki, qamkuna, juk tiempuchö Diospita karuchö kashqakuna, Cristupa yawarninrëkurmi Diosman wititsimushqa kayarqunki. 14  Porqui Cristum yamë kënintsik, pëmi ishkë grüputa jukllëllaman rurashqa y ishkëman rakeqnin perqata ushakätsishqa. 15  Cuerpunta ofrendatanö qormi chikinakïta apamoqta ushakätsishqa, Moises qellqanqan Leychö këkaq mandakïkunata y leykunata, tsënöpa pëwan juknölla këkaq ishkan grüpukunata, juk mushoq grüpuman* tikratsinampaq y amishtatsinampaq, 16  y sufritsikoq qeruchö* wanutsishqa kanqanrëkur ishkan markakunata Dioswan chipyëpa amishtatsinampaq, tsënöpa ishkan grüpu juk cuerpulla kayänampaq, porqui wanunqanwanmi chikinakuyanqanta ushakätsirqan. 17  Y shamurmi qamkunata, Diospita karuchö këkaqkunata y amänuchö këkaqkunata yamë këpita alli willakïkunata musyatsiyäshurqëki, 18  porqui përëkurmi* noqantsik, ishkan markakuna, juk santu espïritullata chaskirnin Diosman libri witita puëdintsik. 19  Tsëmi, qamkunaqa manam mana reqishqanatsu ni forastërunatsu kayanki, sinöqa santu nunakunapa marka mayinkuna y Diospa wayimpita kaqkunam kayanki, 20  y apostolkunapa y Diospa willakoqninkunapa* cimientunchömi sharkatsishqa kayarqunki, kikin Cristu Jesusmi tsë cimientuchöqa maestra rumi. 21  Cristuwan juknölla këchömi, shumaq perqashqa këkaq entëru wayi, Jehoväpa* santu templun kanampaq shärikan. 22  Cristuwan juknölla këchömi qamkunapis llapëkikuna juntu shäritsishqa këkäyanki, santu espïritumpa* Dios täranqan* sitiu kayänëkipaq.

Päginapa ura kuchunchö willakïkuna

O: “mana cäsukoq nunakuna kawayanqanmannö”.
Kënöpis niyanmi: ajanayninta.
Kënöpis niyanmi: llakipäkoq.
O: “shamoq tiempukunachö”.
O: “këkaqkunapaq biennintsikta ashir”.
Kënöpis niyanmi: yärakuyanqaykipitam.
Kënöpis niyanmi: qamkunapitatsu.
O: “rurënimpita yarqoqmi”.
Rikäri “Käyitsikïkuna” nishqanta.
Kënöpis niyanmi: awnikuynimpita.
Griëgu idiömachöqa “juk mushoq nunaman” ninmi.
Rikäri “Käyitsikïkuna” nishqanta.
Kënöpis niyanmi: pay jananmi.
Griëgu idiömachöqa “profëtakunapa” ninmi. Rikäri “Käyitsikïkuna” nishqanta.
Diospa jutin Jehoväqa ishkë pachak kima chunka qanchis (237) kutim kë Bibliapa versïculunkunachö yurin, y këmi juk kaq. Rikäri “Käyitsikïkuna” nishqanta.
Kënöpis niyanmi: santu espïritunwan.
Kënöpis niyanmi: päranqan.