Llapan kanqanman ëwari

Qallananchö tïtulukunaman ëwë

Jehoväpa testïgunkuna

Idiömata akrë Quechua (Ancash)

Santiägu 4:1-17

IMAKUNA KANQAN

  • Diosta mana cäsukoq nunakunawanqa manam amïgu kashwantsu (1-12)

    • Diablupa contran churakäyë (7)

    • Diosman witiyë (8)

  • Precisaq tukur alabakïpaq atikakï (13-17)

    • “Jehovä munaptinqa” (15)

4  ¿Imapitataq qamkunachö guërrakuna y pelyakuna kan? ¿Manaku tsëkunaqa qamkunawan* tsaränakur këkaq jutsasapa ëtsëkikunapa munëninkunapita?  Qamkunaqa munayankim, peru tsënö kaptimpis manam kayäpushunkitsu.* Wanutsikurnin y imatapis ërayëpa munaparninmi sïguiyanki, peru tsënö kaptimpis manam tarita puëdiyankitsu. Pelyarnin y guërrata rurarninmi sïguiyanki. Mana mañakuyaptikim kayäpushunkitsu.  Mañakurpis, manam chaskiyankitsu, porqui mana allipaqmi mañakuyanki, jutsasapa ëtsëkikunapa munëninkunapaq.  Diosta jaqireqkuna, ¿manaku musyayanki Diosta mana cäsukoq nunakunawan amïgu këqa, Diospa chikeqnin kë kanqanta? Tsëmi pipis mana cäsukoq nunakunapa amïgun këta munaqqa, Diospa chikeqnin tikrëkan.  O, ¿“noqantsikchö këkaq pensëmi* imëkatapis envidiakïpa munapar sïguikan” nir qellqarëkaq ardëlla kanqantaku pensayanki?  Tsënö kaptimpis, pë qomanqantsik alläpa alli këninqa tsëpitapis mas sinchim. Tsëmi kënö nin: “Diosqa precisaq tukoqkunapa contranmi churakan, peru qollmi shonqu kaqkunataqa, alläpa alli kënintam rikätsin”.  Tsënö këkaptinqa, Diospa makinman churakäyë; peru Diablupa contran churakäyë, y pëqa escaparmi* qamkunapita ëwakunqa.  Diosman witiyë, y pëqa qamkunamanmi witimunqa. Mana alli rurënikikunapita limpiakuyë jutsasapakuna, y shonqïkikunata limpiuyätsiyë, mana churapakaqkuna.  Llakikur kayë, y pësakuyë, y waqayë. Asikïnikikuna pësakïman tikratsun, y kushikïnikikuna llakishqa këman. 10  Jehoväpa* rikëninchö qollmi shonqu kayë, y pëqa precisaqpaqmi churayäshunki. 11  Wawqikuna y panikuna, amana juknikikuna juknikikunapa contrëkikuna parlar kayënatsu. Pipis juk creikoq mayimpa* contran parlaqqa o creikoq mayinta* juzgaqqa, leypa contranmi parlëkan y leytam juzguëkan. Y leyta juzgarqa, manam leyta wiyakoqtsu kanki, sinöqa juezmi. 12  Jukllëllam Leyta Patsätseq y Juezqa, pitapis salvëta o ushakätsita puëdeq kaq. Peru qamqa, ¿pitaq kanki nuna mayikita juzgar këkänëkipaq? 13  Kananqa wiyayë, qamkuna, kënö neq kaqkuna: “Kanan o warëmi tal markata ëwashun, y tsëchömi juk wata kashun, y negociutam rurashun y qellëtam ganashun”, 14  peru rasumpa kaqchöqa manam musyayankitsu kawënikikuna warë imanö kanampaq kaqta. Porqui juk rätulla yurirkoq y tsëpita ushakäreq pukutënöllam kayanki. 15  Tsëpa rantinqa, kënömi niyankiman: “Jehovä* munaptinqa kawëkäshunmi, y këtapis o waktapis rurashunmi”. 16  Peru kananqa precisaq tukur alabakuyanqëkipitam qamkunaqa kushikuyanki. Tsënö alabakuyanqëkiqa alläpa mana allim. 17  Tsëmi, sitsun pipis alli kaq rurë ima kanqanta musyanqa, y tsënö kaptimpis mana ruranqatsu, tsëqa jutsallakïkanmi.

Päginapa ura kuchunchö willakïkuna

Griëgu idiömachöqa “imëkëkikunachö” ninmi.
Kënöpis niyanmi: kapuyäshunkitsu.
Rikäri “Käyitsikïkuna” nishqanchö “Espïritu” neqta.
Kënöpis niyanmi: qeshpirmi; safarmi.
Rikäri “Käyitsikïkuna” nishqanta.
Griëgu idiömachöqa “wawqipa” ninmi.
Griëgu idiömachöqa “wawqinta” ninmi.
Rikäri “Käyitsikïkuna” nishqanta.