Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Këchö Biblia | TRADUCCIÓN DEL NUEVO MUNDO DE LAS SANTAS ESCRITURAS

Santiägu 2:1-26

IMAKUNA KANQAN

  • Wakinkunallata mas precisaqpaq churëqa jutsan (1-13)

    • Kuyakïqa, Reypa qellqarëkaq alläpa precisaq leyninmi (8)

  • Markäkïqa, alli rurëkunayoq mana karqa wanushqa cuentam këkan (14-26)

    • Supëkunapis creiyanmi, y alläpam mantsakäyan (19)

    • Abrahanqa Jehoväpa amïgun nirmi reqishqa karqan (23)

2  Wawqilläkuna y panilläkuna, wakinkunallata mas precisaqpaq churarqa, qamkunaqa manam precisaqpaq churashqa Señornintsik Jesucristuman markäkïyoqtsu* kayanki, ¿aw?  Porqui sitsun qamkuna ëllukäyanqëkiman* dëdunkunachö örupita sortijarishqa y alli röpakunawan vistishqa nuna yëkaramun, peru jina rakcha* röpawan vistishqa waktsalla nuna yëkaramun,  tsëqa, ¿alli röpakunawan vistishqa kaqtaku allipa rikäyanki y “këman, mas alli kaq sitiuman täkamï” niyanki, y waktsa kaqtaqa, “qamqa tsëllachö shäkamï” o, “qamqa chakï jamatsinä bancu jawanman täkamï” niyanki?  Tsënö rurarqa, ¿manaku wakin kaqta wakin kaqkunapita mas precisaqtanö rikëkäyanki, y alläpa mana allipa juzgaq juezkuna këman chäyarqunki?  Wiyayë kuyashqa wawqilläkuna y panilläkuna. ¿Manaku Diosqa nunakunapa rikënimpaq waktsa kaqkunata akrashqa alläpa markäkïyoq kayänampaq, y kuyaqninkunata Pë äninqan Gobiernuta chaskiyänampaq?  Peru qamkunaqa waktsa kaqtam allqutsäyarqunki.* ¿Manaku kapoqyoq kaqkuna pasëpa nitipakashqata katsiyäshunki y cortikunaman chätsiyäshunki?  ¿Manaku pëkunaqa chaskiyanqëki alläpa alli jutita ofendiyan?  Tsëmi sitsun, “nuna mayikitam kikikitanö kuyanëki” nir Reypa qellqarëkaq alläpa precisaq leyninta wiyakuyanki, tsëqa alläpa allitam rurëkäyanki.  Peru sitsun wakinkunata mas precisaqpaq churar sïguikäyanki, tsëqa jutsallakïkäyankim, y leyta mana wiyakoqtanömi ley condenayäshunki.* 10  Porqui pipis llapan Leyta wiyakoq këkar, juk asuntullachöpis mana alliman ishkireqqa, llapan Leypa contranmi jutsallakushqa. 11  Porqui “mana majëkiwanqa manam oqllanakunëkitsu” neqllam, jina “manam pitapis wanutsinëkitsu” nirqan. Tsëmi sitsun mana majëkiwan oqllanakïman ishkinkitsu, peru pitapis wanutsinki, tsëqa llapan Leypa contranmi mana allita rurarqunki. 12  Qamkunaqa libri nunakunam kayanki, y qamkunapaq këkaq ley* ninqanmannömi juzgashqa kayanki, tsënö këkaptinqa, tsëmannö parlar y portakur sïguiyë. 13  Porqui mana ankupäkoq* kaqqa, mana ankupashpam juzgashqa kanqa. Ankupäkïqa juzguëpitapis mas precisaqmi. 14  Wawqilläkuna y panilläkuna, ¿imapaqtaq sirwin pipis markäkoq* kanqanta ninqan, peru alli rurëninkuna mana kaptinqa? Tsënö markäkïqa manam pëta salvëta puëdintsu, ¿aw? 15  Sitsun mëqan wawqipapis o panipapis röpan kanqatsu,* o cada junaqpaq mikïnin tinkunqatsu, 16  peru tsënö këkaptimpis, mëqëkipis “yamëlla ëwakuyë; qoñu qoñulla y pacha junta kayë” niyanki, peru cuerpunkunapaq wanayanqantaqa mana qoyankitsu, tsëqa, ¿imachötaq yanapakun? 17  Jina tsënöllam markäkïpis alli rurëkunayoq mana karqa, japallanllaqa wanushqa cuenta këkan. 18  Tsënö kaptimpis, itsa pipis kënö ninqa: “Qampam markäkïniki kapushunki, y noqapanam rurënïkuna kapaman. Markäkïnikita alli rurëninnaqta rikätsimë, y noqanam alli rurënïkunawan markäkïnïta rikätsishqëki”. 19  Qamqa juk Dioslla kanqantam creinki, ¿aw? Tsëqa alläpa allitam ruranki. Peru tsënö kaptimpis, supëkunapis creiyanmi, y alläpam mantsakäyan. 20  Peru imatapis mana musyaq nuna, ¿musyëta munankiku rurëninnaq markäkïqa* imapaqpis mana sirwinqanta? 21  ¿Manaku teytantsik Abrahanqa tsurin Isaacta ofrendatanö qonampaq altarman churanqanrëkur rurënimpita alli kaqta ruraqnö rikashqa karqan? 22  Rikanqëkinöpis pëpa markäkïninqa rurëninkunawan juntum rikakurqan, y markäkïninqa rurëninkunawanmi chipyëpa alliyätsishqa karqan, 23  y kënö nir qellqarëkaqmi cumplikarqan: “Abrahanqa Jehovämanmi* markäkurqan, tsëmi alli kaqta ruraqnö rikashqa karqan”, y Jehoväpa* amïgun nirmi reqishqa karqan. 24  Qamkunaqa rikäyankim nunaqa rurëninkunarëkur alli kaqta ruraqnö rikashqa kanampaq kaqta, y manam markäkïninrëkurllatsu. 25  Jina, ¿manaku qellëpaqrëkur jukwan jukwan kakoq Rahabpis, musyapakoqkunata shumaq chaskirir juk nänipa kachanqanrëkur rurënimpita alli kaqta ruraqnö rikashqa karqan? 26  Rasumpa kaqchöqa, imanömi juk cuerpu kawatsikoq kallpannaq* karqa wanushqa këkan, jina tsënöllam markäkïpis alli rurëkunayoq mana karqa wanushqa cuenta këkan.

Päginapa ura kuchunchö willakïkuna

Kënöpis niyanmi: yärakuyyoqtsu.
Kënöpis niyanmi: qorikäyanqaykiman.
Kënöpis niyanmi: iska.
Kënöpis niyanmi: mana allipa tratayarqunki.
O: “leyta mana wiyakoq kayanqëkitam leyqa rikätsikun”.
Griëgu idiömachöqa “libri këpa leynin” ninmi.
Kënöpis niyanmi: llakipäkoq.
Kënöpis niyanmi: yärakoq.
Griëgu idiömachöqa “qalapächu këkanqa” ninmi.
Kënöpis niyanmi: yärakuyqa.
Rikäri “Käyitsikïkuna” nishqanta.
Rikäri “Käyitsikïkuna” nishqanta.
O: “jamaninnaq”. Griëgu idiömachöqa “espïritunnaq” ninmi.