Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Këchö Biblia | TRADUCCIÓN DEL NUEVO MUNDO DE LAS SANTAS ESCRITURAS

Santiägu 1:1-27

IMAKUNA KANQAN

  • Salüdukuna (1)

  • Alli tsarakï kushikïta apamunqan (2-15)

    • Pruëbaman churashqa alli markäkï (3)

    • Markäkurnin Diosman mañakur sïguiyë (5-8)

    • Munëqa, jutsa rurëman y wanïmanmi chätsikun (14, 15)

  • Llapan alli qarëkunaqa rarapitam shamun (16-18)

  • Palabrata wiyë y cäsukoq kë (19-25)

    • Juk espëjuchö qaqllanta rikaq nuna (23, 24)

  • Limpiu y mana rakchatashqa kaq adoracion (26, 27)

1  Santiägupita, Diospa y Señor Jesucristupa sirweqnimpita, më tsëchö ramakashqa* këkaq chunka ishkë (12) kastakunapaq: ¡Salüdüta chaskiyë!  Wawqilläkuna y panilläkuna, tukïläya pruëbakunachö karqa, alläpa kushishqa kayë,  porqui qamkunaqa musyayankim markäkïnikikuna* pruëbaman churashqa kaptin, tsarakïta yachakuyänëkipaq kaqta.  Peru alli tsarakïqa logranampaq kaqta logratsun, tsënöpa llapanchö complëtu y sänu kayänëkipaq, imachöpis mana pishipashpa.*  Tsëmi sitsun qamkunachö pipapis yachënin pishinqa, tsëqa Diosta mañakurnin sïguitsun, porqui pëqa llapankunatam shonqupita patsë mëtsikata qon, y manam qokunqampita imatapis nikuntsu,* y tsënö mañakurqa chaskinqam.  Peru markäkurnin Diosman mañakur sïguitsun, y ama ichikllapis mana següruqa katsuntsu, porqui mana següru kaqqa, imëka vientuwan laqcheqsätsishqa y wakman këman apashqa lamar yakunömi.  Rasumpa kaqchöqa, tsë nunaqa manam shuyanmantsu Jehoväpita* imallatapis chaskita;  imatapis mana churapakaq nunam, imëkachöpis cambiarëkaq.  Peru waktsa wawqiqa o paniqa precisaqpaq churashqa kanqampita alläpa kushikutsun,* 10  y kapoqyoq* kaqqa qollmi shonqu këta yachakushqa kanqampita alläpa kushikutsun, porqui kapoqyoq nunaqa imëka chakra wëtanömi ushakärinqa. 11  Porqui imanömi inti* achachämur yarqamun y plantata ñukturatsin,* y wëtan shikwarin y shumaq kënin ushakärin, tsënöllam kapoqyoq nunapis rurëninkunawan juntu ushakärinqa. 12  Kushishqam pruëbachö tsarakurnin sïgueq nunaqa, porqui Diospa rikëninchö alli karmi, kawëta premiutanö* chaskinqa, kuyar sïgueqninkunata Jehovä* äninqanta.* 13  Pipis pruëbachö karqa, ama nitsuntsu: “Diosmi pruëbaman churaman”. Porqui mana allikunawanqa manam pipis Diosta pruëbaman churëta puëdintsu, ni pëpis manam pitapis mana allikunawanqa pruëbaman churantsu. 14  Tsëpa rantinqa, cada ünum pruëbaman churakan munënin inkitaptin y shonqunchö patsakäriptin.* 15  Tsënam tsë munë winarirqa, jutsata rurëman chätsikun; y jutsata rurënam, wanïman chätsikun. 16  Cuidakuyë pantatsishqa këpita, kuyashqa wawqilläkuna y panilläkuna. 17  Llapan alli qarëkuna y chaskinqantsik chipyëpa allikunaqa rarapitam* shamun, ciëluchö aktsikunapa* Teytampitam urämun, pëqa manam tumarëkaq wäninötsu* cambian ni jukläya tikran. 18  Pëqa kikimpa munënimpitam rasumpa kaq palabrawan ruramarqantsik, tsënöpa kamashqankunapita mas punta kaqkuna këman chänapaq. 19  Këta musyayë kuyashqa wawqilläkuna y panilläkuna: pï nunapis shumaq wiyanampaq listu, raslla mana parlaq, raslla mana piñakoqmi* kanan, 20  porqui nunapa piñakoq këninqa, manam Diospa rikëninchö alli kaqta rurëmantsu apakun. 21  Tsëqa, llapan rakcha* kaqta y imallapis mana alli kaqta* qamkunapita ushakätsiyë, y salvayäshïnikita* puëdeq palabrata qollmi shonqïkikunawan qamkunachö Dios patsakätsimunanta jaqiyë. 22  Tsënö kaptimpis, palabrata wiyakur cäsukoq kayë, y ama wiyaqllaqa kayëtsu, mana allita pensarnin kikikikunata engañakur. 23  Porqui sitsun pipis palabrata wiyaqlla, peru mana cäsukoq kanqa, tsëqa juk espëjuchö kikimpa qaqllanta rikaq nunanömi. 24  Awmi, rikäkurinmi, y tsëpitanam ëwakun, y rasllam qonqarin imanö nuna kanqanta. 25  Peru libri këta qokoq chipyëpa alli leyta alleq rikaq, y imëpis tsënö rurar sïgueqqa, manam wiyarir qonqareqtsu tikrashqa, sinöqa, palabrata wiyakur cäsukoqmi; y tsëta ruranqampitam kushishqa kanqa. 26  Sitsun pï nunapis Diosta adoraq* kanqanta pensanqa, peru qallunta alleq tsarëta* yachanqatsu, tsëqa kikimpa shonquntam engañar sïguikan, y Diosta adoranqampis manam imapaq sirwintsu. 27  Diosnintsikpa y Teytantsikpa rikëninchö limpiu y mana rakchatashqa* adoracionqa* këmi: teytannaq mamannaq kaqkunata y viudakunata sufrimientukunapa pasayaptin cuidë, y mana cäsukoq nunakuna imanöpis kawakuyanqanwan mana rakchatäkïmi.

Päginapa ura kuchunchö willakïkuna

Kënöpis niyanmi: witsikashqa.
Kënöpis niyanmi: yärakuynikikuna.
Kënöpis niyanmi: imapis qamkunachö mana pisheq.
O: “culpata ashintsu”.
Diospa jutin Jehoväqa ishkë pachak kima chunka qanchis (237) kutim kë Bibliapa versïculunkunachö yurin, y këmi juk kaq. Rikäri “Käyitsikïkuna” nishqanta.
Griëgu idiömachöqa “alabakutsun” ninmi.
Kënöpis niyanmi: rïcu.
Kënöpis niyanmi: rupay.
Kënöpis niyanmi: tsakiratsin.
Griëgu idiömachöqa “kawë corönata” ninmi.
Rikäri “Käyitsikïkuna” nishqanta.
Kënöpis niyanmi: awninqanta.
O: “trampaman imatapis churayanqanwannö tsaririptin”.
Kënöpis niyanmi: junishpitam.
Këchöqa parlëkan, Intipaq, Killapaq y qoyllurkunapaqmi.
Kënöpis niyanmi: llantunötsu.
Kënöpis niyanmi: ajanaqmi.
Kënöpis niyanmi: qanra.
O, itsapis: “mëtsika mana alli rurëkunata”.
O: “almëkikunata salvëta”. Rikäri “Käyitsikïkuna” nishqanchö “Alma” neqta.
O: “religiösu”.
O: “sujetëta”.
Kënöpis niyanmi: qanratashqa.
O: “religionqa”.