Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Këchö Biblia | TRADUCCIÓN DEL NUEVO MUNDO DE LAS SANTAS ESCRITURAS

Romänus 7:1-25

IMAKUNA KANQAN

  • Leypita imanö librashqa këpaq igualatsikï (1-6)

  • Leyrëkurmi jutsa ima kanqan musyakan (7-12)

  • Jutsawan tsaränakï (13-25)

7  ¿Itsatsuraq musyayankitsu wawqikuna y panikuna (porqui leyta reqeq kaqkunatam parlapëkä), nuna kawanqanyaqqa Ley patronnin kanqanta?  Këman yarpäriyë, casakushqa warmiqa ley ninqannömi qowan* kawanqanyaqqa pëwan juknölla kayan; peru qowan wanuriptinqa, librinam qowampa leynimpita quedarin.  Tsëmi qowan kawanqanyaqqa, juk nunawan casakurninqa mana majanwan oqllanakoqnö reqishqa kanqa. Peru qowan wanuriptinqa, librinam pëpa leynimpita quedarin, tsëmi juk nunawan casakurnimpis mana majanwan oqllanakï jutsatanatsu rurëkan.  Tsëmi, wawqilläkuna y panilläkuna, Cristupa cuerpunrëkurmi qamkunaqa Leypaq wanuyarqunkina, tsënöpa jukpana këman chäyänëkipaq, wanushqakunapita sharkatsimushqa kaqpa kayänëkipaq, tsënöpa Diosta kushitsinqan kaqkunata ruranapaq.  Porqui jutsasapa ëtsapa munëninmannö kawanqantsikyaqqa, Ley musyatsikunqan mana alli munëkunam cuerpuntsikta* dominaq, tsënöpa wanïman chätsikoq kaqkunata ruranapaq.  Peru kananqa Leypita librashqanam karquntsik, porqui tsë michämaqnintsik kaqpaqmi wanurquntsik, tsënöpa santu espïritu pushamanqantsikmannö juknöpana sirwipakoq kanapaq, y mana unënönatsu, qellqashqa leykuna mandakunqannönatsu.  Tsëqa, ¿ima nishuntaq? ¿Jutsaku Ley? ¡Tsëqa manam ni imanöpapis kanmantsu! Rasumpa kaqchöqa, Ley mana kaptinqa, manam jutsata reqïmantsu karqan. Këllata niriyashqëki, noqaqa manam musyämantsu karqan imatapis ërayëpa munapë ima kanqanta, Leychö, “manam imatapis ërayëpa munapänëkitsu” nishqa mana kaptinqa.  Peru jutsaqa Leypa mandakïnimpita tsaripukïkurmi imëkatapis ërayëpa munëta noqachö yuritsimurqan, porqui ley mana kaptinqa, jutsaqa wanushqam këkarqan.  Rasumpa kaqchöqa, noqaqa manaraq Ley kaptinqa kawëkarqämi. Peru Ley chäramuptinqa, jutsaqa kawariramurqanmi, y noqanam wanurirqä. 10  Y kawëman chätsikoq Leyqa wanïman chätsikoq kanqantam rikärirqä. 11  Porqui jutsaqa Leypita tsaripukïkurmi engañaramarqan, y tsëwanmi wanuratsimarqan. 12  Tsëmi Leyqa santu, y Leychö këkaq mandakïkunapis santum, alli kaqta ruraqmi y allim. 13  Tsëqa, ¿alli kaqku wanïman chätsiman? ¡Tsëqa manam ni imanöpapis kanmantsu! Peru jutsam sïqa wanuratsimarqan. Jutsaqa alli kaqwanmi wanuratsimarqan, tsënöpa jutsa ima kanqan rikakänampaq. Y Leyqa jutsa alläpa mana alli kanqantam rikätsikun. 14  Porqui musyantsikmi Leyqa Diospita shamunqanta; peru noqaqa ëtsallam kä, jutsapa makinman rantikushqa. 15  Porqui manam käyïtsu* imanir imatapis rurëkanqäta. Porqui munanqätaqa manam rurätsu; sinöqa chikinqä kaqtam rurä. 16  Tsënö kaptimpis, mana munanqä kaqta rurarqa, Ley alläpa alli kanqantam rikä. 17  Tsëqa manam noqanatsu tsëta rurëkä, sinöqa noqachö këkaq jutsam. 18  Porqui musyämi noqachöqa, juk parlakïchöqa jutsasapa ëtsächöqa, ni ima allipis mana kanqanta; porqui alli kaqta rurëta munëmi noqachö këkan, peru tsëta ruranäpaq kallpaqa manam kantsu. 19  Porqui alli kaqta rurëta munanqätaqa manam rurätsu, peru mana munanqä mana alli rurëtam sïqa rurä. 20  Tsëqa, mana munanqä kaqta rurarqa, manam noqanatsu tsëta rurëkä, sinöqa noqachö këkaq jutsam. 21  Kë leytam noqachö tarï: alli kaqta rurëta munaptïmi, mana alli kaq noqachö këkan. 22  Rasumpa kaqchöqa, ruripa imanö nuna kanqämannömi Diospa leynimpita kushikü, 23  peru cuerpüchöqa* rikä, pensënïchö këkaq leywan tsaränakoq juk leytam, y cuerpüchö* këkaq jutsapa leyninmanmi prësu apaman. 24  ¡Alläpa ankupëpaq* nunam kä! ¿Piraq libramanqa tsënö wanïman apëkämaq cuerpupita? 25  ¡Diostam agradecikü! ¡Pëmi Señornintsik Jesucristurëkur libramanqa! Tsëmi pensënïwanqa Diospa leynimpa sirweqnin kä, peru cuerpüwanqa, jutsapa leynimpa sirweqninmi kä.

Päginapa ura kuchunchö willakïkuna

Kënöpis niyanmi: runan.
Griëgu idiömachöqa “llapan partintsikkunata” ninmi.
Kënöpis niyanmi: entiendïtsu.
Griëgu idiömachöqa “partïkunachöqa” ninmi.
Griëgu idiömachöqa “partïkunachö” ninmi.
Kënöpis niyanmi: llakipaypaq.