Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Këchö Biblia | TRADUCCIÓN DEL NUEVO MUNDO DE LAS SANTAS ESCRITURAS

Romänus 6:1-23

IMAKUNA KANQAN

  • Cristuchö bautizashqa këpita mushoq kawë (1-11)

  • Cuerpïkikunachö jutsa gobernar sïguinanta ama jaqiyëtsu (12-14)

  • Jutsapa esclävun këpita Diospa esclävun këman chë (15-23)

    • Jutsa qokunqan päguqa wanïmi; Dios qokunqan qarëqa kawëmi (23)

6  Tsëqa, ¿ima nishuntaq? ¿Diospa alläpa alli kënin mas miranampaqtsuraq jutsachö sïguishun?  ¡Tsëqa manam ni imanöpapis kanmantsu! Jutsapaq wanushqana këkarqa, ¿imanötaq jutsachö kawar sïguishwan?  ¿O manaku musyayanki Cristu Jesuschö llapan bautizakushqa kaqkunaqa wanïninchö bautizashqa kanqantsikta?  Tsëmi, pëpa wanïninchö bautizakurnin pëwan juntu pampashqa karquntsik, tsënöpa Diospa poderninwan wanushqakunapita Cristu sharkatsimushqa kanqannölla, jina noqantsikpis juk mushoq kawëchöna purinapaq.  Porqui noqantsikqa pë wanunqannö wanurmi pëwan juknölla tikrarquntsik, jina tsënöllam pë kawarinqannö kawarimurpis pëwan juknölla kashun.  Porqui musyantsikmi unë imanö kanqantsikqa pëwan juntu qeruman clavashqa kanqanta, tsënöpa jutsasapa cuerpuntsik imëka kallpannaqnö quedanampaq, y tsënöpa jutsapa esclävun manana kanapaq.  Porqui wanushqa kaqqa, jutsankunapita perdonashqanam* quedarin.  Jinamampis, Cristuwan wanushqa karqa, jina pëwan kawanapaq kaqmanmi creintsik.  Porqui musyantsikmi Cristuqa wanushqakunapita sharkatsimushqa kanqampita patsëqa, manana wanunampaq kaqta; wanïqa mananam pëpa patronninnatsu. 10  Porqui pë wanunqan wanïqa, jutsata ushakätsinampaqmi juk kutilla imëyaqpis kanampaq kashqa; peru kawëkanqan kawëtaqa, Diospaqmi kawëkan. 11  Jina tsënölla qamkunapis: jutsapaq wanushqa këkaqnö, peru Cristu Jesusrëkur Diospaq kawëkaqnö rikäkuyë. 12  Tsëmi, ama jaqiyëtsu wanoq cuerpïkikunachö jutsa gobernar sïguinanta, tsënöpa munëninkunata rurar mana kayänëkipaq. 13  Jina mana alli kaqta rurayänëkipaq ama cuerpïkikunata* armatanöqa jutsata entregayëtsu, tsëpa rantinqa Diospa makinman churakäyë imëka wanushqakunapita kawëman kutimushqanö; jina alli kaqta rurayänëkipaq Diospa makinman cuerpïkikunata* armatanö churayë. 14  Porqui jutsaqa manam qamkunapa patronnikikunatsu kanan, porqui manam leypa makinchötsu këkäyanki, sinöqa Diospa alläpa alli këninchömi. 15  ¿Ima nishwantaq tsëqa? ¿Leypa makinchö mana karnin, sinöqa Diospa alläpa alli këninchö kartsuraq jutsata rurashun? ¡Tsëqa manam ni imanöpapis kanmantsu! 16  ¿Manaku musyayanki pipapis wiyakoq esclävun kayänëkipaq churakarqa, tsë wiyakuyanqëki kaqpa esclävun kayanqëkita, wanïman chätsikoq jutsapa kar, o alli kaqta rurëman chätsikoq wiyakïpa karpis? 17  Peru Diostam agradecikü juk tiempu jutsapa esclävun kashqa karpis, tsë chaskiyanqëki kaq yachatsikïkunata shonqupita patsë wiyakuyanqëkipita. 18  Awmi, jutsapita librashqa karirmi, alli kaq rurëkunapa sirweqnin tikrayarqunki. 19  Jutsasapa karnin pishipäyaptikim** nunakuna parlayanqannö qamkunata parlapëkäyaq; porqui imanömi cuerpïkikunachö këkaqkunata melanëpaq rurëkunapa y mana alliman chätsikoq mana alli rurëkunapa esclävun këman entregayarqëki, tsënölla kananqa cuerpïkikunachö këkaqkunata santu nuna këman chätsikoq alli kaq rurëkunapa sirweqnin këman entregayë. 20  Porqui jutsapa esclävun karqa, alli kaq rurëkunapitam libri kayarqëki. 21  Tsëqa, ¿imamantaq chätsiyäshurqëki tsë witsan rurayanqëkikuna? Tsëkunata rurayanqëkipita kanan witsan penqakïmanmi. Porqui tsëkunaqa wanïmanmi chätsikun. 22  Tsënö kaptimpis, kananqa jutsapita librashqa kayanqëkichö y Diospa sirweqnin këman chäyanqëkichöqa, santu nuna këman chätsikoq rurëkunatam rurëkäyanki, y tsëqa imëyaqpis kawëmanmi chätsikun. 23  Porqui jutsa qokunqan päguqa wanïmi, peru Dios qokunqan qarëqa Señornintsik Cristu Jesusrëkur imëyaqpis kawëmi.

Päginapa ura kuchunchö willakïkuna

O: “librashqanam”.
Griëgu idiömachöqa “partikikunata” ninmic.
Griëgu idiömachöqa “partikikunata” ninmi.
Kënöpis niyanmi: dëbil kayaptikim.
Griëgu idiömachöqa “ëtsëkikuna kallpannaq kaptinmi” ninmi.