Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Këchö Biblia | TRADUCCIÓN DEL NUEVO MUNDO DE LAS SANTAS ESCRITURAS

Romänus 4:1-25

IMAKUNA KANQAN

  • Markäkïninrëkur Abrahan alli kaqta ruraqnö rikashqa kanqan (1-12)

    • Abrahan, markäkoq kaqkunapa teytan (11)

  • Markäkïninrëkur chaskinqan änikï (13-25)

4  Tsënö karqa, ¿ima nishwantaq unë kastantsik Abrahanpaq?  Këllaman yarpärishun, sitsun Abrahan rurëninkunapita alli ruraqnö rikashqa kanman, tsëqa alabakïta puëdinmanmi; peru manam Diospa rikëninchöqa.  ¿Porqui imanö nirtaq qellqarëkan? “Abrahanqa Jehovämanmi* markäkurqan,* tsëmi alli kaqta ruraqnö rikashqa karqan.”  Musyanqantsiknöpis, trabajapakoq nunataqa manam alläpa alli kartsu pipis pägun qon, sinöqa jaqan cuenta karmi.  Tsënö kaptimpis, mana trabajëkarpis, mana alli nunata alli kaqta ruraqtanö Rikaqman markäkoq kaqqa, markäkïninrëkurmi alli kaqta ruraqnö rikashqa kanqa.  Rurëninkuna ley ninqanmannö chipyëpa mana këkaptimpis, alli kaqta ruraqtanö Dios rikanqan nunapa kushikïnimpaq parlar David kënö ninqannöpis:  “Kushishqam kayan mana alli rurëninkunapita perdonashqa kaqkuna, y jutsankunapita perdonta chaskishqa kaqkuna;  Jehovä* ni imanöpapis jutsanta cuentaman mana churanqan nunaqa kushishqam sientikun”.  Tsë kushikïqa, ¿penqëninchö señalashqa* kaqkunallapaqku, o penqëninchö mana señalashqa* kaqkunapaqwanku? Porqui kënömi nintsik: “Abrahanqa markäkïninrëkurmi* alli kaqta ruraqnö rikashqa karqan”. 10  ¿Imëtaq markäkïninrëkur alli kaqta ruraqnö rikashqa karqan? ¿Penqëninchö señalashqana* këkarku, o penqëninchö manaraq señalashqa këkarku? Manam penqëninchö señalashqa këkartsu, sinöqa penqëninchö manaraq señalashqa këkarmi. 11  Y juk señaltam chaskirqan, tsëqa karqan penqëninchö señalashqa* këmi, y tsëqa, penqëninchö manaraq señalashqa këkaptin markäkunqanrëkur Dios alli kaqta ruraqtanö rikanqanta musyatsikoq sëllu* cuentam karqan, tsënöpa penqëninchö mana señalashqa këkar markäkoq kaqkunapa teytan kanampaq, y alli kaqta ruraqnö rikashqa kayänampaq; 12  y penqëninchö señalashqa* mirëpa teytan kanampaq, y manam penqëninkunachö señalashqa këta cumpleqkunallapatsu, sinöqa, teytantsik Abrahan penqëninchö manaraq señalashqa këkarnin markäkur alli kaqta rurar purinqanmannö pureq kaqkunapapis. 13  Porqui manam leyrëkurtsu Abrahanqa o mirëninqa juk munduta* herenciatanö pë chaskinampaq kaq änikïta* chaskirqan, sinöqa markäkïninrëkur alli kaqta ruraqnö rikashqa kanqampitam. 14  Porqui leyta cumpleq kaqkunalla herenciatanö chaskiyänan kaptinqa, markäkïqa mana imapaqpis sirweqmi tikrarin y änikïqa ushakärinmi. 15  Rasumpa kaqchöqa, Leyqa Diospa piñakïnintam* apamun, peru ley mana kanqanchöqa, manam ni ima mana alli rurë kantsu. 16  Tsëmi tsë änikïqa markäkïrëkur,* tsënöpa Diospa alläpa alli kënimpita kanampaq, llapan mirënimpaq tsë änikï següru kanampaq, Leyta cumpleqkunallapaqtsu, sinöqa Abrahannö markäkoq kaqkunapaqpis, pëqa llapantsikpa teytantsikmi. 17  (Tsëqa kënö nir qellqarëkanqannömi: “Mëtsika nacionkunapa teytan kanëkipaqmi qamta churarqoq”.) Tsëqa karqan pë markäkunqan Diospa rikëninchömi, Pëqa wanushqakunatam kawënin qon, y manaraq cumplikaq cösaskunapaqmi cumplikashqapaqnöna parlan.* 18  Pëqa shuyararqan y markäkurqan mëtsika nacionkunapa teytan këman chänampaq kaqmanmi, tsënö kanampaq kaq mana creipaqnö këkaptimpis. Pëqa Dios kënö nishqa kanqanmanmi markäkurqan: “Tsënömi mirëniki kanqa”. 19  Y, markäkïninchö mana pishipashqa karpis,* wanushqa këkaqtanönam cuerpunta rikarqan (porqui pachak (100) watayoqnönam karqan), jina Säraqa wamrayoq këta manana puëdinqantam* cuentaman churarqan. 20  Peru Diospa änikïninrëkurmi,* markäkïninchö ni ichikllapis pishiparqantsu,* sinöqa markäkïninrëkurmi kallpayoq tikrarirqan, y tsënömi Diosta alläpa precisaqpaq churarqan, 21  y chipyëpam següru karqan Pëqa änikunqanta cumplita puëdinampaq kaqta. 22  Tsëmi, “alli kaqta ruraqnö rikashqa karqan”. 23  Tsënö kaptimpis, “rikashqa karqan” neq palabrakunaqa manam përëkurllatsu qellqashqa karqan, 24  sinöqa, jina noqantsikrëkurmi, noqantsikpis tsënö rikashqa kanantsik kaptin, porqui Señornintsik Jesusta wanushqakunapita sharkatsimoq kaqmanmi creintsik. 25  Pëmi mana alli rurënintsikkunarëkur entregashqa kashqa, y alli kaqta ruraqnö rikashqa kanapaqmi sharkatsimushqa kashqa.

Päginapa ura kuchunchö willakïkuna

Diospa jutin Jehoväqa ishkë pachak kima chunka qanchis (237) kutim kë Bibliapa versïculunkunachö yurin, y këmi juk kaq. Rikäri “Käyitsikïkuna” nishqanta.
Kënöpis niyanmi: yärakurqan.
Rikäri “Käyitsikïkuna” nishqanta.
Rikäri “Käyitsikïkuna” nishqanta.
Rikäri “Käyitsikïkuna” nishqanchö “Penqëchö señalakï” neqta.
Kënöpis niyanmi: yärakuynimpitam.
Rikäri “Käyitsikïkuna” nishqanta.
Rikäri “Käyitsikïkuna” nishqanta.
O: “garantïa”.
Rikäri “Käyitsikïkuna” nishqanta.
Rikäri “Käyitsikïkuna” nishqanta.
Kënöpis niyanmi: awnikuyta.
Kënöpis niyanmi: ajanaynintam.
Kënöpis niyanmi: yärakuypita.
O, itsapis: “mana kaq cösaskunatam kanampaq qayan”.
Kënöpis niyanmi: yärakuynin mana pishiptimpis.
O: “qolloq kanqantam”.
Kënöpis niyanmi: awnikuynimpitam.
O: “mana següruqa mana karqantsu”.