Llapan kanqanman ëwari

Qallananchö tïtulukunaman ëwë

Jehoväpa testïgunkuna

Idiömata akrë Quechua (Ancash)

Romänus 3:1-31

IMAKUNA KANQAN

  • “Dios rasumpa kaqta parlaq kanqan rikakashqa katsun” (1-8)

  • Judïukuna y Grecia nunakunapis jutsapa makinchömi këkäyan (9-20)

  • Alli kaqta ruraq këqa markäkïrëkurmi (21-31)

    • Manam pipis Diospa alläpa alli këninkunata kikinchö chipyëpa rikätsikïta puëdintsu (23)

3  Tsëqa, ¿imachötaq judïu nuna mas precisaq, o imachötaq yanapan penqëninchö señalashqa* kanqan?  Imanö kaptimpis, tukïchömi* alläpa yanapan. Puntataqa, pëkunatam sagrädu willakïninkunata Dios qoshqa karqan.  Tsëqa, ¿imataq pasanqa wakin judïukunapa markäkïninkuna* mana kanqampita? ¿Tsërëkurtsuraq Diospa llapanta cumpleq kënin ushakärinqa?  ¡Tsëqa manam ni imanöpapis kanmantsu! Tsëpa rantinqa, Dios rasumpa kaqta parlaq kanqan rikakashqa katsun, llapan nunakuna ulikoq* kayanqan rikakashqa kaptimpis, kënö nir qellqarëkanqannö: “Parlakïnikichö alli kaqta ruraq kanqëkita rikätsikunëkipaq, y juzguëkäyäshuptiki gananëkipaq”.  Tsënö kaptimpis, mana alli kaqta ruranqantsik, Dios alli kaqta ruraq kanqanta masraq rikätsikuptinqa, ¿ima nishwanraq? Diosqa manam mana allitatsu ruran piñakïninta* rikätsikur, ¿aw? (Nunakuna parlayanqannömi parlëkä.)  ¡Tsëqa manam ni imanöpapis kanmantsu! Juknöpaqa, ¿imanöraq nunakunata Dios juzganqa?  Tsënö kaptimpis, sitsun noqa ulikunqä* Dios rasumpa kaqta parlanqanta rikätsikun, y tsënöpa nunakuna pëta alabayan, tsëqa, ¿imanirtaq Diosqa jutsasapatanö juzgaman?  ¿Y imanirtaq “mana alli kaqkunata rurashun, alli kaqkuna shamunampaq” nintsiktsu, wakin nunakuna ulikurkur tsënö ninqantsikta tumpamanqantsiknöpis? Tsë nunakunaqa rasun kaqchömi juzgashqa kayanqa.  Tsëqa, ¿imatataq pensantsik? ¿Noqantsikqa wakinkunapita mas alliku këkantsik? ¡Tsëqa manam ni imanöpapis kanmantsu! Porqui qallananchömi rikätsiyarqoq tantu judïukuna y Grecia nunakunapis,* llapankuna jutsapa makinchö këkäyanqanta; 10  kënö nir qellqarëkanqannö: “Manam alli kaqllata ruraq nunaqa kantsu, ni jukllëllapis; 11  manam pipis tantiyëta yachaqqa kantsu, manam pipis kantsu Diosta asheqqa. 12  Llapankunam rakikäkuriyashqa, llapankunam upa tikrayashqa, manam ni pipis alli këninta rikätsikuntsu, ni jukllëllapis”. 13  “Kunkanqa kicharëkaq sepultüram, qallunkunawanmi engañakuyashqa.” “Shiminkuna rurinchöqa venënuyoq culebrakunapa venënunmi kan.” 14  “Parlakïninkunachöqa maldecikïlla y piñakïllam* këkan.” 15  “Chakinkunaqa rasmi yawar ramëpaq* kayan.” 16  “Ushakë y llakikïmi näninkunachö këkan, 17  y manam yamë kawakï nänita reqiyashqatsu.” 18  “Pëkunachöqa manam Diosta mantsakï kantsu.” 19  Musyantsikmi Ley llapan ninqankunaqa, Leychö këkaqkunapaq kanqanta, tsënöpa pëkuna tsapäkïta mana puëdiyänampaq y llapan nunakuna Diospa rikëninchö culpayoq kayänampaq. 20  Tsëmi ley ninqanta ruranqampitaqa, ni pï nunapis* alli ruraqnöqa rikashqatsu kanqa, porqui leyqa jutsa ima kanqantam alleq musyatsikun. 21  Peru ley kaptimpis, Dios alli kaqta ruraq kanqanqa juknöpam rikakashqa, Ley y Diospa Willakoqninkuna Qellqayanqanchö tsëpaq musyatsikuyanqannö, 22  awmi, Dios alli kaqta ruraq kanqanqa Jesucristuman markäkïchömi* rikakashqa, llapan markäkoq kaqkunapaq. Porqui llapan nunakunam igual-lla kayan. 23  Porqui llapankunam jutsallakuyashqa, y manam Diospa chipyëpa alli imanöpis këninta kikinkunachö rikätsikïta chipyëpaqa puëdiyantsu. 24  Jutsapita libramänapaq Cristu Jesus chaninta pagakunqampitam Diosqa nunakunata alli ruraqtanö rikashqa. Tsëqa alläpa alli këninchö Dios qokunqan debaldi qarëmi. 25  Diosqa imëka ofrendatanömi pëta qorqan nunakuna yawarninman markäkur Dioswan amishtayänampaq. Tsëtaqa alli kaqta ruraq këninta rikätsikunampaqmi rurarqan, porqui pacienciakurqa, unë witsan rurayanqan jutsakunatam Diosqa perdonëkarqan. 26  Tsëtaqa rurarqan kikin alli kaqta ruraq kanqanta kanan witsan rikätsikunampaqmi, tsënöpa Jesusman markäkoq nunata alli kaqta ruraqtanö rikarnimpis, pëqa alli kaqta ruraq kanampaq. 27  Tsëqa, ¿pillapis alabakïta puëdinku? Manam ni imanöpapis. ¿Ima leytaq alabakunanta michan? ¿Pë ruranqankuna precisaq kanqanta neq leyku? Manam, sinöqa markäkïyoq kanampaq kaqta neq leymi. 28  Porqui noqantsikpaqqa, nunaqa markäkïninrëkurmi alli kaqta ruraqnö rikashqa kanqa, y manam ley ninqankunata rurartsu. 29  ¿O pëqa judïukunapa Diosninllaku? ¿Manaku pëqa juk nacion nunakunapapis Diosnin? Awmi, jina juk nacion nunakunapapis pëqa Diosninmi. 30  Dios jukllëlla këkarqa, markäkïninkunapitam penqëninchö señalashqa* kaqkunata alli kaqta ruraqtanö rikanqa, y markäkïninkunarëkurmi penqëninchö mana señalashqa kaqkunatapis alli kaqta ruraqtanö rikanqa. 31  Tsëqa, ¿markäkïnintsikrëkurku leyta ushakäratsintsik? ¡Tsëqa manam ni imanöpapis kanmantsu! Tsëpa rantinqa, ley ninqantam wiyakuntsik.

Päginapa ura kuchunchö willakïkuna

Rikäri “Käyitsikïkuna” nishqanta.
Kënöpis niyanmi: imaykachömi.
Kënöpis niyanmi: yärakuyninkuna.
Kënöpis niyanmi: llullakoq.
Kënöpis niyanmi: ajanayninta.
Kënöpis niyanmi: llullakunqä.
O: “griëgukunapis”. Tsënö nirqa, griëgu idiömata parlaq mana judïu nunakunapaqmi parlëkan. Rikäri “Käyitsikïkuna” nishqanchö “Griëgu” neqta.
Kënöpis niyanmi: ajanayllam.
Kënöpis niyanmi: jichaypaq.
Griëgu idiömachöqa “ni mëqan ëtsapis” ninmi.
Kënöpis niyanmi: yärakuychömi.
Rikäri “Käyitsikïkuna” nishqanta.