Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Këchö Biblia | TRADUCCIÓN DEL NUEVO MUNDO DE LAS SANTAS ESCRITURAS

Romänus 11:1-36

IMAKUNA KANQAN

  • Israelta chipyëpatsu Dios jaqirin (1-16)

  • Olïvu montipaq parlaq igualatsikï (17-32)

  • Diospa yachënin imanö jatun kanqan (33-36)

11  ¿Markanta Dios jaqirinqantaku tsëqa rikätsikun? ¡Tsëqa manam ni imanöpapis kanmantsu! Porqui noqapis israelïtam kä, Abrahanpa mirënimpita, Benjamin kastapita.  Diosqa manam jaqirirqantsu puntata akranqan markanta. ¿Manaku musyayanki Israelpa contran parlarnin Diosman Elïas mañakunqampaq qellqarëkaqchö ima ninqanta?  Kënömi nirqan: “Jehovä,* pëkunaqa willakoqnikikunatam wanutsiyashqa, altarnikikunatam juchutsiyashqa, y noqallanam quedarqö, y kananqa kawënïta* qochiramëtam* tïrëkäyan”.  Tsënö kaptimpis, ¿imanö nirtaq Dios contestarqan? “Qanchis waranqa (7.000) kawëkaq nunakunaran kapaman, pëkunaqa manam Baalpa nöpanman qonqurikuyashqatsu.”  Jina tsënöllam kanan witsampis alläpa alli këninwan akrashqa juk wallka grüpu kan.  Tsëmi alläpa alli kënimpita kaptinqa, manam rurëkunapitanatsu; porqui rurëkunapita kaptinqa, alläpa alli këninqa mananachi alläpa alli kënatsu kanman.  Tsëqa, ¿ima nishuntaq? Israelqa manam imëkanöpa ashinqanta lograrqantsu, peru akrashqa kaqkunaqa lograyarqanmi. Wakin kaqkunaqa chukru shonqum tikrayarqan,  kënö nir qellqarëkanqannö: “Diosqa pëkunata qoshqa, shonquta chipyëpa punukätseq pununëta, mana rikaq nawita y mana wiyaq rinritam, hasta kanan junaqyaq”.  Jina Davidpis kënömi nin: “Mëtsika mikïninkuna* pëkunapaq katsun juk toqlla, juk trampa, juk trompisatsikoq rumi y castïgu. 10  Mana rikäyänampaq nawinkuna ampïtsun,* y waqtankunata imëpis qorukätsi”.* 11  ¿Trompisayanqanta y chipyëpa ishkiyanqantaku tsëqa rikätsikun? Manam. ¡Tsëqa manam ni imanöpapis kanmantsu! Peru pëkuna leyta mana cäsukuyanqampitam,* juk nacion nunakunapaq salvacion kan, tsënöpa pëkunapa shonqunta puwatsinampaq. 12  Tsëqa, leyta mana cäsukuyanqan* wakin kaq nunakunapaq atska bendicionkunata apëkämuptinqa, y wallkayäyanqan juk nacion nunakunapaq atska bendicionkunata apëkämuptinqa, ¡imanö mas atska bendicionkunaraq kanqa llapankuna completakäriyaptinnäqa! 13  Kananqa qamkunatam, juk nacion kaq nunakunata parlapäyaq. Nacionkunapaq apostol kanqäta rikarmi, sagrädu rurënïta alläpa precisaqpaq churä, 14  tsënöpa imanöllapapis judïu mayïkunapa* shonqunkunata puwatsinäpaq, y pëkunapita wakinkunallatapis salvanäpaq. 15  Porqui pëkunata Dios jaqirishqa kaptin llapan wakin kaq nunakuna Dioswan amishtëta puëdiyänan këkaptinqa, ¿imanöraq kanqa pëkuna chaskishqa kayaptin? Tsëqa imëka wanushqakunapita kawëman kutimïnömi kanqa. 16  Jinamampis masapita rakirir puntata jorqayanqan kaq masa santu këkaptinqa, jina llapan masapis santum kanqa; y montipa* watsin* santu këkaptinqa, jina llapan rämakunapis santum kayan. 17  Tsënö kaptimpis, sitsun wakin rämakuna laqtsashqa* kayashqa, y qam, lluta olïvu montipita* këkar, pëkunaman injertashqa karqunki, y olïvu montipa watsimpita imëka allikunata chaskirqunki, 18  tsëqa ama rämakunata despreciar allish tukïtsu.* Peru allish tukurqa,* yarpë, manam qamtsu watsita tsaranki, sinöqa watsim qamta tsaräshunki. 19  Itsa kënö ninki: “Wakin rämakunam laqtsashqa kayashqa, noqa injertashqa kanäpaq”. 20  ¡Tsëqa rasunmi! Mana markäkoq karmi pëkunaqa laqtsashqa kayarqan, peru qamqa markäkïnikirëkurmi shëkanki. Ama allish tukoqqa këtsu, tsëpa rantinqa, mantsakoq kë. 21  Porqui kikin montipa kaq rämankunatapis Dios mana perdonëkarqa, manam qamtapis perdonashunkitsu. 22  Tsëmi, Diospa alli këninta y castïgunta cuentaman churë. Ishkishqa kaqkunapaqqa castïgum kan, peru qampaqqa Diospa alli këninmi kan, peru alli këninchö imëpis kaptikillam tsëqa kanqa; mana tsënö karqa, qampis llümashqam* kanki. 23  Hasta pëkunapis mana markäkoq* këninkunachö mana sïguirqa, injertashqam kayanqa, porqui Diosqa yapëpis injertëta puëdinmi. 24  Porqui qam lluta olïvu montipita* roqushqa këkar, y mana rurana këkaptin huerta kaq olïvu montiman injertashqa këkaptikiqa, ¡tsëqa masran tsë kikin olïvu montipita roqushqa rämakunanäqa tsë montiman yapë injertashqa kayanqa! 25  Porqui wawqikuna y panikuna, manam munätsu Diospa pakarëkaq sagrädu willakïnimpita mana altantu kayänëkita, tsënöpa kikikikunapa rikënikikunallachö yachëyoq mana tikrayänëkipaq. Tsë pakarëkaq willakïqa këmi: Israelpita wakin nunakunam chukru shonqu tikrayashqa, hasta juk nacion nunakuna completashqa kayanqanyaq, 26  y tsënöpam llapan Israel salvashqa kanqa. Kënö nir qellqarëkanqannö: “Sionpitam librakoq* yarqunqa y Jacobpitam pasëpa mana alli rurëkunata rakinqa. 27  Y këmi pëkunawan conträtü, jutsankunata pëkunapita jorqariptï”. 28  Rasunmi, alli willakïkunata mana wiyakuyanqanrëkurmi pëkunaqa qamkunapa biennikikunapaq Dioswan mana alli kayan; peru unë kastankunata äninqanrëkurmi* Diosqa pëkunapita wakinkunata amïgun kayänampaq akrashqa. 29  Porqui Diosqa manam pësakuntsu qarëta qokunqampita y pitapis qayanqampita. 30  Porqui imanöllam qamkunapis juk tiempuchö Diosta mana wiyakoq kayarqëki, peru kananqa pëkuna mana wiyakoq kayanqanrëkur ankupashqa* kayarqunki, 31  jina tsënöllam pëkunapis kananqa mana wiyakoq kayashqa, y tsërëkurmi qamkuna ankupashqa kayarqunki, jina tsënöpa pëkunapis kananqa ankupashqa kayänampaq. 32  Porqui Diosqa llapankunatam mana wiyakoq këpa prësunkuna kayänanta jaqishqa, tsënöpa llapankunata ankupanqanta rikätsinampaq. 33  ¡Imanö jatunmi Diospa bendicionninkuna,* yachënin y musyëninqa! ¡Imanö mana käyipaqmi* juiciunkuna y reqita mana puëdipaqmi näninkuna! 34  Porqui “¿pitaq Jehoväpa* pensëninkunata musyëta puëdin, o pitaq consejaqnin këman tikrashqa?”. 35  O, “¿pitaq imallatapis pëta puntata qoshqa, pë pagar kutitsinampaq?”. 36  Porqui pëpitam, y përëkurmi y pëpaqmi llapan cösaskuna kayan. Pë imëyaqpis alläpa precisaqpaq churashqa katsun. Tsënö katsun.*

Päginapa ura kuchunchö willakïkuna

Rikäri “Käyitsikïkuna” nishqanta.
O: “almäta”. Rikäri “Käyitsikïkuna” nishqanta.
Kënöpis niyanmi: qechuramaytam.
Griëgu idiömachöqa “mësankuna” ninmi.
Kënöpis niyanmi: tsakätsun; tutapätsun.
Kënöpis niyanmi: kurkushyätsi.
O: “llutanman japayanqampitam”.
O: “llutanman japayanqan”.
Griëgu idiömachöqa “ëtsä kaqkunapa” ninmi.
Kënöpis niyanmi: jachapa.
Kënöpis niyanmi: matsun; sipin; chapan.
Kënöpis niyanmi: laktsishqa.
Kënöpis niyanmi: jachapita.
O: “contran alabakïtsu”.
O: “contran alabakurqa”.
Kënöpis niyanmi: llawmishqam; rawmashqam.
Kënöpis niyanmi: yärakoq.
Kënöpis niyanmi: jachapita.
O: “salvakoq”.
Kënöpis niyanmi: awninqampitam.
Kënöpis niyanmi: llakipashqa.
Griëgu idiömachöqa “kapoqyoq kënin” ninmi.
Kënöpis niyanmi: entiendipaqmi.
Rikäri “Käyitsikïkuna” nishqanta.
O: “amen”.