Llapan kanqanman ëwari

Qallananchö tïtulukunaman ëwë

Jehoväpa testïgunkuna

Idiömata akrë Quechua (Ancash)

Romänus 10:1-21

  • Diospa alli rurëninkunata imanö logranapaq (1-15)

    • Nunakuna jananchö musyatsikï (10)

    • Jehoväpa jutinchö qayakïqa salvaciontam apamun (13)

    • Alläpa shumaqmi alli willakïkunata musyatsikoqkunapa chakinkunaqa (15)

  • Alli willakïkunata wiyakuyantsu (16-21)

10  Wawqikuna y panikuna, pëkunapaq shonqüchö alli munënï y Diosman rogakunqäqa, rasumpa kaqchöqa salvacionninkunapaqmi.  Porqui këtam pëkunapita musyatsikü: Diospaqmi shonqunkuna ninanöraq rawran, peru musyayanqanmannö rurayanqanqa manam rasumpa kaqta alleq musyëpitatsu.  Porqui Diospa munëninmannö kaq alli kaq rurëkunata mana reqir, sinöqa kikinkunapa munëninkunamannö alli kaq rurëkunata patsätsita tïrarmi, Diospa munëninmannö kaq alli kaq rurëkunata cuentaman churayarqantsu.  Porqui Leyqa Cristuwanmi ushashqa, tsënöpa llapan markäkoq* kaqkuna alli kaqta ruraqnö rikashqa kayänampaq.  Porqui Moisesmi Leypita shamoq alli kaq rurëkunapaq kënö nir qellqarqan: “Tsëkunata ruraq nunaqa, tsëkunata ruranqampitam kawanqa”.  Peru markäkïpita shamoq alli kaq rurëkunapaqqa kënömi nin: “Ama shonqïkichö kënö nitsu: ‘¿Piraq ciëluman witsanqa?’, juk parlakïchöqa, ¿piraq ciëluman witsanqa Cristuta urätsimunampaq?,  o: ‘¿Piraq wanwanyarëkaq* uchkuman uranqa?’, juk parlakïchöqa, ¿piraq wanwanyarëkaq uchkuman uranqa Cristuta wanushqakunapita witsätsimunampaq?”.  Peru ¿ima nintaq qellqarëkaqchö? “Palabraqa qampa amänïkichömi këkan, kikikipa shimikichö y kikikipa shonqïkichö”, juk parlakïchöqa, markäkur chaskina ‘palabra’, noqantsik willakunqantsik kaq.  Porqui Jesus Señor kanqanta nunakuna jananchö shimikiwan musyatsikurqa, y wanushqakunapita Dios sharkatsimushqa kanqanta shonqïkichö markäkurqa, salvashqam kanki. 10  Porqui juk nuna alli kaqta ruraqnö rikashqa kanampaqqa, llapan shonquwanmi markäkunan, y salvashqa kanampaqqa, shiminwanmi nunakuna jananchö tsë markäkïpita musyatsikunan. 11  Porqui qellqarëkaqchömi kënö nin: “Pipis pëman markäkoq* kaqqa, manam llakikïchötsu ushanqa”. 12  Porqui judïu nunakunawan Grecia nunakunaqa* manam ni imachöpis jukläyatsu kayan. Llapan nunakunapaqpis juk Señorllam kan, pëqa, pëman llapan qayakoq kaqkunatam mëtsika bendicionkunata qon. 13  Porqui “Jehoväpa* jutinchö llapan qayakoq kaqkunam salvashqa kayanqa”. 14  Tsënö kaptimpis, ¿imanöraq pëman qayakuyanqa, pëman mana markäkushqa këkarqa? Jinamampis, ¿imanöraq pëman markäkuyanqa, pëpita mana wiyashqa këkarqa? Jina, ¿imanöraq wiyayanqa pipis mana willakïkaptinqa? 15  Y, ¿imanöraq willakuyanqa pipis mana kachashqa këkaptinqa? Kënö nir qellqarëkanqannö: “¡Alläpa shumaqmi alli kaqkunapita alli willakïkunata musyatsikoq kaqkunapa chakinkunaqa!”. 16  Tsënö kaptimpis, manam llapankunatsu alli willakïkunata wiyakuyarqan. Porqui Isaïasmi kënö nin: “Jehovä,* ¿pitaq markäkushqa noqakunapita wiyanqan kaqkunaman?”.* 17  Tsëmi markäkïqa wiyakïpitaraq shamun. Y willakïtaqa wiyakuyan, pipis Cristupita parlaptinmi. 18  ¿Tsë willakïta mana wiyashqa kayanqantaku tsëqa rikätsikun? Manam, porqui rasumpa kaqchöqa, “entëru patsapam wiyakarqan, y patsapa kuchunkunayaqmi willakïnin charqan”. 19  ¿Israel mana musyashqa kanqantaku tsëqa rikätsikun? Manam. Puntatam Moises kënö nirqan: “Mana Israel nacionwanmi shonqïkikunata puwatsimushaq;* juiciunnaq nacionwanmi chipyëpa piñatsiyashqëki”.* 20  Peru Isaïasqa mana mantsakushpam kënö nin: “Mana ashimaq kaqkunam tariyämashqa; noqapaq mana tapukoq kaqkunam reqiyämashqa”. 21  Peru pëqa kënömi Israelpaq nin: “Llapan junaqkunam mana wiyakoq y chukru shonqu markapaq makïta makyararqö”.

Päginapa ura kuchunchö willakïkuna

Kënöpis niyanmi: yärakoq.
Kënöpis niyanmi: mankaraykaq; äpa.
Kënöpis niyanmi: yärakoq.
O: “griëgukunaqa”. Tsënö nirqa, griëgu idiömata parlaq mana judïu nunakunapaqmi parlëkan. Rikäri “Käyitsikïkuna” nishqanchö “Griëgu” neqta.
Rikäri “Käyitsikïkuna” nishqanta.
Rikäri “Käyitsikïkuna” nishqanta.
O: “willakuyanqäkunaman”.
Kënöpis niyanmi: timputsimushaq.
Kënöpis niyanmi: ajanätsiyashqayki.