Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Këchö Biblia | TRADUCCIÓN DEL NUEVO MUNDO DE LAS SANTAS ESCRITURAS

Lücas 5:1-39

IMAKUNA KANQAN

  • Pescäduta tsariyanqanchö juk milagru pasakun; punta qateqninkuna (1-11)

  • Lepra qeshyayoq nuna kachakan (12-16)

  • Kuyukïta mana puëdeq nunata Jesus kachakätsin (17-26)

  • Levïta Jesus qayan (27-32)

  • Ayünupaq tapukï (33-39)

5  Juk kutim, Genesaret qocha* kuchunchö yachatsikur shëkarqan, y mëtsikaq nunakunam kichkinakur-raq pë kaqman ëllukëkur* Diospa palabranta wiyakïkäyarqan.  Y qocha kuchunchö ishkë barcukuna këkaqtam rikärirqan, peru pescaqkunaqa barcunkunapita yarpurirmi mällankunata paqëkäyarqan.*  Simonpa kaq barcuman lloqarkurmi, Simonta nirqan qocha kuchumpita ichik mas ruriman yëkaratsinampaq. Tsënam täkurirqan, y barcupita patsëmi tsëchö këkaq mëtsika nunakunata yachatsir qallëkurqan.  Parlar usharirnam, Simonta kënö nirqan: “Mas ruriman yëkï, y pescädu tsarina mällëkikunata jitayë”.  Peru Simonqa kënö nirmi contestarqan: “Maestru, entëru paqasmi afanakuyarqö, y manam ni imatapis tsariyarqötsu, peru qam mandakuptikim, mällakunata jitashaq”.  Tsëta rurarirmi, mëtsika pescädukunata tsariyarqan, rasumpa kaqchöqa, mällankunapis rachikarmi qallëkurqan.  Tsëmi shamurnin yanapayänampaq juknin kaq barcuchö këkaq yanaqinkunata qemllar qayayarqan, pëkunanam shayämurqan, y ishkan barcukuna juntam pescädukunata ëlluyarqan,* y barcunkunaqa hundikëtapis munayarqanmi.  Tsëta rikëkurmi Simon Pëdruqa Jesuspa puntanman qonqurikïkur kënö nirqan: “Noqapita witikurillë Teytë, porqui noqaqa jutsasapa nunam kallä”.  Porqui Pëdru, y pëwan këkaqkunaqa, mëtsika pescädukunata tsariyanqampitam alläpa espantakur mantsakashqa këkäyarqan, 10  jina Simonwan trabajaq Zebedeupa tsurinkuna Santiäguwan Juanpis tsënöllam këkäyarqan. Peru Jesusqa kënömi Simonta nirqan: “Ama mantsakënatsu. Kanampita patsëqa nunakunatam kawëkaqta pescanki”. 11  Tsënam barcunkunata qocha kuchunman kutitsiyämurqan, y llapanta jaqirïkurmi, pëta qatiyarqan. 12  Juk kutinam, juk markachö pë këkaptin, ¡rikë!, ¡lepra ushashqa nuna tsëchö këkarqan! Pëmi Jesusta rikëkur puntanman qonqurikïkur kënö nir rogakurqan: “Teytë, qam munarninqa kachakäratsimankimanmi”.* 13  Tsënam, pëqa makinwan yatëkur kënö nirqan: “¡Munämi kachakänëkita!”.* Y jinan höram lepranqa chipyëpa ushakärirqan. 14  Nïkurnam pitapis mana willanampaq tsë nunata mandarqan y kënö nirqan: “Tsëpa rantinqa, sacerdöti kaqta ëwë y Moises qellqanqan Ley ninqannö limpiu kanëkipaq ofrendëkita qoy, kachakanqëkita pëkuna musyayänampaq”. 15  Peru pëpaq willakuyanqanqa më tsëman charmi sïguirqan, y mëtsikaq nunakunam yachatsikunqanta wiyayänampaq y qeshyankunapita kachakätsinampaq pë kaqman ëllukäyaq.* 16  Peru pëqa mana imapis kanan sitiukunamanmi Diosman mañakoq ëwaraq. 17  Tsë junaqkuna yachatsikïkaptinmi, Galilëa provinciapa y Judëa provinciapa llapan caserïunkunapita y Jerusalenpita shamushqa fariseukuna* y Ley yachatsikoqkuna tsëchö tëkäyarqan; y Jehoväqa* nunakunata kachakätsinampaqmi pëta poderta qoshqa karqan. 18  Y ¡rikë!, juk ishkë nunakunam kuyukïta mana puëdeq nunata kirmawan apëkäyarqan, y tukïnöpam tïrayarqan Jesus këkanqanman yëkatsita y nöpanman churëta. 19  Tsëmi mëtsikaq nunakuna kayaptin ni imanöpapis yëkatsita mana puëdirnin, wayi jananman lloqatsiyarqan, y wayipa qataraqninta uchkurirmi kirmanwan yarputsiyarqan Jesuspa nöpanchö këkaq nunakunapa chowpinkunaman. 20  Y pëkunapa markäkïninkunata* rikëkurmi, kënö nirqan: “Amïgu, jutsëkikunapita perdonashqanam kanki”. 21  Tsënam Ley qellqaqkuna* y fariseukunaqa* kënö pensar y ninakur qallëkuyarqan: “¿Pitaq këqa tsënö ofendikïpa parlanampaq? ¿Manaku jutsakunataqa Dioslla perdonëta puëdin?”. 22  Peru Jesusqa imata pensëkäyanqanta cuentata qokurirmi kënö contestarqan: “¿Imatataq shonqïkikunachö pensëkäyanki? 23  ¿Imataq mas fäcil?, ¿‘jutsëkikunapita perdonashqanam kanki’ niku, o, ‘sharkï, y puri’ niku? 24  Peru nunapa Tsurinqa jutsayoqkunata perdonanampaq patsachö autoridäyoq kanqanta musyayänëkipaq. . . —nikanqantam, kuyukïta mana puëdeq nunata kënö nirqan—: noqam neq: sharkï, kirmëkita iñurkur wayikita ëwakï”. 25  Tsënam pëqa nunakunapa nöpanchö sharkurirqan, iskaranqan* kirmanta iñurkurqan y Diosta alabarnin wayinta ëwakurqan. 26  Y llapankunam espantakur mantsakäkuyarqan, y Diosta alabarmi qallëkuyarqan, y alläpa mantsakarmi kënö niyarqan: “¡Manam ni imëpis këkunatanöqa rikashqatsu kantsik!”. 27  Tsëpitanam, tsëpita yarqurirqan, y impuestu cobrakuyänan wayichö tëkaqtam Levï jutiyoq impuestu cobrakoq nunata rikärirqan, y pëtam “qatimaqnï kë” nirqan. 28  Y llapanta qepachö jaqirirmi, sharkurqan, y qatirnin qallëkurqan. 29  Tsënam Levïqa Jesuspaq juk jatun mikïta wayinchö rurarqan, y mëtsikaq impuestu cobrakoqkuna y juk nunakunam pëwan mikïkäyarqan.* 30  Tsëmi fariseukuna* y pëkunapa Ley qellqaqninkunaqa* pëpaq rimar qallëkuyarqan y qateqninkunata kënö niyarqan: “¿Imanirtaq qamkunaqa impuestu cobrakoqkunawan y jutsasapakunawan mikuyanki y upuyanki?”. 31  Tsëta contestarnam Jesusqa kënö nirqan: “Sänu këkaqkunaqa manam doctorta wanayantsu, peru qeshyëkaqkunam sïqa. 32  Manam alli kaqta ruraqkunata qayaqtsu shamurqö, sinöqa arrepentikuyänampaq jutsasapakunata qayaqmi”. 33  Pëkunam kënö niyarqan: “Juanpa qateqninkunaqa imëpis ayunayanmi, y rogakurmi mañakuyan, jina tsënöllam rurayan fariseukunapa* qateqninkunapis; peru qampa qateqnikikunaqa mikurtaq y upurtaq kayan”. 34  Jesusnam kënö nirqan: “Noviu pëkunawan këkaptinqa, qamkunaqa manam puëdiyankitsu noviupa amïgunkunata ayunatsita, ¿aw? 35  Peru chämunqam pëkunapita noviu qochishqa* kanan junaqkuna; tsë junaqkunam sïqa ayunayanqa”. 36  Jina juk igualatsikïwanmi pëkunata yachatsirqan kënö nirnin: “Manam pipis janan kaq mushoq röpapita ratashta kapchurirqa* makwa röpaman jirantsu. Tsënö ruraptinqa, tsë mushoq ratash qentikarmi makwa kaqta rachiratsin, jinamampis mushoq röpapita ratashqa manam shumaqtsu makwa röpachö rikakun. 37  Jina manam ni pipis llullu vïnutaqa makwa qara porongukunaman winantsu. Tsëta ruraptinqa, tsë qara porongukunatam llullu vïnuqa pashtaratsinqa, y vïnum ramakärinqa,* y qara porongukunam ushakäriyanqa. 38  Tsëpa rantinqa, llullu vïnutaqa mushoq qara porongukunamanmi winayänan. 39  Manam pipis poqu vïnuta upurkurqa, llullu vïnuta upïta munantsu, porqui kënömi nin: ‘Poqushqa kaq vïnum mas alliqa’”.

Päginapa ura kuchunchö willakïkuna

Juk parlakïchöqa, Galilëa qocha.
Kënöpis niyanmi: qorikaykur.
Kënöpis niyanmi: awïkäyarqan.
Kënöpis niyanmi: qoriyarqan.
Griëgu idiömachöqa “limpiaramankimanmi” ninmi.
Griëgu idiömachöqa “limpiakänëkita” ninmi.
Kënöpis niyanmi: qorikäyaq.
Rikäri “Käyitsikïkuna” nishqanta.
Rikäri “Käyitsikïkuna” nishqanta.
Kënöpis niyanmi: yärakuyninkunata.
Rikäri “Käyitsikïkuna” nishqanta.
Rikäri “Käyitsikïkuna” nishqanta.
Kënöpis niyanmi: jitaranqan.
O: “tëkur mësaman kinkisharëkäyarqan”.
Rikäri “Käyitsikïkuna” nishqanta.
Rikäri “Käyitsikïkuna” nishqanta.
Rikäri “Käyitsikïkuna” nishqanta.
Kënöpis niyanmi: qechushqa.
Kënöpis niyanmi: ruturirqa.
Kënöpis niyanmi: jichakärinqa.