Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Këchö Biblia | TRADUCCIÓN DEL NUEVO MUNDO DE LAS SANTAS ESCRITURAS

Lücas 4:1-44

IMAKUNA KANQAN

  • Jesusta Diablu tentëta tïran (1-13)

  • Galilëa provinciachö Jesus willakur qallan (14, 15)

  • Nazaret markachö Jesusta chaskiyantsu (16-30)

  • Capernaum markachö Diosta adorayänan wayichö (31-37)

  • Simonpa suegranta y wakinkunata kachakätsin (38-41)

  • Mëtsikaq nunakuna tsunyaq sitiuchö Jesusta tariyan (42-44)

4  Tsëpitanam Jesusqa santu espïrituwan junta këkar, Jordanpita ëwakurqan, y santu espïritum tsunyaqchö* wakpa këpa pusharqan  chusku chunka (40) junaqkunapa, tsëchömi Diablu tentëta tïrarqan. Y manam tsë junaqkunachö ni imatapis mikurqantsu, tsëmi, tsë junaqkuna ushariptin, Jesusqa mallaqarqan.  Tsënam Diabluqa kënö nirqan: “Diospa tsurinkunapita karqa, kë rumita niri tantaman tikrarinampaq”.  Peru Jesusqa kënömi contestarqan: “Qellqashqam këkan: ‘Nunaqa manam tantallawantsu kawanan’”.  Tsënam Diabluqa jirka jananman aparqan y patsachö llapan gobiernukunata juklla rikäratsirqan.  Nïkurmi Diabluqa kënö nirqan: “Kë llapankunata rikänëkipaq autoridäta y riquëzankunatam qoykushqëki, porqui noqam chaskirqö, y pitapis munanqätam qoykü.  Tsëmi puntäman qonqurïkur juk kutilla adorëkamaptikiqa, kë llapan qampa kanqa”.  Tsëta contestarmi Jesusqa kënö nirqan: “Qellqashqam këkan: ‘Jehovä* Diosnikillatam adoranëki, y pëllatam sirwinëki’”.  Tsëpitanam Jerusalenchö templupa perqan jananman aparqan y kënö nirqan: “Diospa tsurinkunapita karqa, këpita jeqakurkï, 10  porqui qellqashqam këkan: ‘Angelninkunatam qamman kachamunqa, cuidayäshunëkipaq’, 11  y: ‘Pëkunam makinkunawan tsaräyäshunki rumichö chakikita mana takanëkipaq’”. 12  Tsëta contestarnam Jesusqa kënö nirqan: “Kënömi nikan: ‘Manam Jehovä* Diosnikita pruëbaman churanëkitsu’”. 13  Tsënam Diabluqa tukïnöpa tentëta usharirnin, pëpita ëwakurqan mas alli tiempu kanqanyaq. 14  Tsëpitanam Jesusqa santu espïritupa poderninwan Galilëa provinciaman kutirqan. Y jinantinchömi* pëpaq allita parlar qallëkuyarqan. 15  Jina Diosta adorayänan wayinkunachömi yachatsikur qallëkurqan, y llapankunam pëta alabayaq. 16  Tsëpitanam, winanqan Nazaret markaman ëwarqan, y Säbadu junaqchö imëpis ruranqannömi, Diosta adorayänan wayiman yëkurirqan y leyinampaq sharkurirqan. 17  Tsënam, Diospa willakoqnin* Isaïas qellqanqan rölluta qoyarqan, y tsë rölluta kicharirmi kënö qellqarëkaqta taririrqan: 18  “Jehoväpa* santu espïritunmi noqachö këkan, porqui pëmi waktsakunata alli willakïkunata willanäpaq akramashqa. Pëmi kachamashqa librina kayänampaq kaqta esclävukunata willanäpaq, y yapë rikäyänampaq kaqta wiskukunata willanäpaq, sufrikaqkunata libranäpaq, 19  y Jehoväpa* rikëninchö alli këta tarina tiempu kanqanta willakunäpaq”. 20  Tsënö nirirmi, rölluta ëllurir* tsëchö sirwipakoqta kutiratsirqan, y täkurirqan; y Diospita yachatsikuyänan wayichö këkaqkunanam, llapankuna chipyëpa pëta rikaräyarqan. 21  Tsënam pëqa kënö nir qallëkurqan: “Kananmi këchö qellqarëkaqpita wiyariyanqëki cumplikärin”. 22  Y llapankunam pëpaq allita parlar qallëkuyarqan, y espantakuyaqmi shumaq parlanqanta wiyarnin, y kënömi niyaq: “¿Manaku këqa Josëpa tsurin?”. 23  Tsënam pëqa kënö nirqan: “Qamkunaqa kënöchi niyämanki: ‘Doctor, kikikita jampikï. Kikikipa markëkichöpis Capernaumchö ruranqëkikunapaq wiyayanqäta ruramï’”. 24  Nïkurnam kënö nirqan: “Rasuntam niyaq, Diospa willakoqnintaqa manam ni mëqantapis kikimpa markanchöqa chaskiyantsu. 25  Musyariyänëkipaq, rasuntam niyaq: mëtsikaq viudakunam Israelchö kayarqan Elïaspa tiempunchö kima* wata y joqta killa ciëlupita mana tamyaptin, y entëru patsachömi alläpa mallaqë karqan. 26  Tsënö kaptimpis, Elïasqa manam tsë warmikunamanqa ni mëqanmampis kachashqatsu karqan, sinöqa, Sidonchö këkaq Sarepta markachö juk viudallamanmi. 27  Jina tsënöllam Diospa willakoqnin Elisëupa tiempunchöpis Israelchö mëtsikaq nunakuna lepra qeshyayoq kayarqan, peru tsënö kaptimpis, manam ni mëqampis kachakätsishqatsu karqan, sinöqa, Siria nacionpita Naamanllam”. 28  Tsënam, tsëta wiyëkurnin Diosta adorayänan wayichö këkaqkuna chipyëpa piñakurkuyarqan,* 29  y sharkurmi markankunapita jorqariyarqan, y tsë markankuna këkanqan jirkapa jananyaqmi apayarqan, tsëpita kumarkuyänampaq. 30  Peru pëqa chowpinkunapa pasarirmi ëwakurqan. 31  Tsëpitanam pëqa Galilëa provinciachö këkaq Capernaum markaman urarqan. Y Säbaduchömi nunakunata yachatseq, 32  y imanö yachatsikunqampitam espantakur mantsakashqa këkäyarqan, porqui autoridäyoq kanqantam parlëninchö rikätsikoq. 33  Tsënam, Diosta adorayänan wayichö mana alli espïrituyoq nuna këkarqan, supëyoq nuna, pëmi sinchipa kënö nirqan: 34  “¡Jä! ¿Imatataq noqakunapita munanki Nazaret markapita Jesus? ¿Ushakätsiyämaqnïku shamurqunki? Alleqmi musyä pï kanqëkita, qamqa Diospa Santu Tsurinmi kanki”. 35  Peru Jesusqa sinchipa piñaparninmi* kënö nirqan: “¡Upälla kë, y pëpita yarqï!”. Tsënam supëqa pëkunapa chowpinchö tsë nunata ishkiratsirnin, mana imanarlla pëpita yarqurirqan. 36  Tsënam llapan nunakuna mantsakäyarqan y kikinkunapura kënö ninakur qallëkuyarqan: “¿Imanö parlakïtaq këqa? ¡Autoridäwan y poderwantaq mana alli espïritukunatapis mandan, y cäsukurtaq yarquyan!”. 37  Tsëmi pëpaq parlayanqanqa më tsëman chärirqan. 38  Diosta adorayänan wayipita yarqurirnam, Simonpa wayinman yëkurirqan. Tsëchönam, Simonpa suegran fiebriwan alläpa sufrikarqan, tsëmi yanapëkunampaq rogakuyarqan. 39  Tsënam, pëpa lädunman witirir fiebrita piñapëkurqan, y fiebriqa jaqirirqanmi. Y jinan höra sharkurmi llapankunata atiendir qallëkurqan. 40  Peru inti* jeqëkaptinnam, imëka nanatsikïkunawan qeshyëkaqninkunata pëman apayämurqan. Pënam, cada ünuman makinta churarnin llapankunata kachakätsirqan. 41  Jina mëtsikaq nunakunapitam supëkuna yarquyarqan sinchipa kënö nirnin: “Qamqa Diospa Tsurinmi kanki”. Peru pëqa sinchipa piñaparmi parlayänanta jaqeqtsu, porqui pëkunaqa musyayaqmi pë Cristu kanqanta. 42  Tsënö kaptimpis, patsa waräriptinmi yarqurir juk tsunyaq* sitiuman ëwarqan. Peru mëtsikaq nunakunaqa ashirmi qallëkuyarqan, y pë këkanqanmanmi chäriyarqan, y pëkunapita ëwakunantam michëta tïrayarqan. 43  Peru pëqa kënömi nirqan: “Jina Diospa Gobiernumpita alli willakïkunataqa juk markakunachöpis willakunämi, porqui tsëpaqmi kachamushqa karqö”. 44  Tsënömi Judëa provinciachö këkaq Diosta adorayänan wayikunachö willakurnin purirqan.

Päginapa ura kuchunchö willakïkuna

Kënöpis niyanmi: tsutsinchö.
Rikäri “Käyitsikïkuna” nishqanta.
Rikäri “Käyitsikïkuna” nishqanta.
Kënöpis niyanmi: entëruchömi.
Griëgu idiömachöqa “profëta” ninmi. Rikäri “Käyitsikïkuna” nishqanta.
Rikäri “Käyitsikïkuna” nishqanta.
Rikäri “Käyitsikïkuna” nishqanta.
Kënöpis niyanmi: lluyllurir.
Kënöpis niyanmi: kimsa.
Kënöpis niyanmi: ajanakurkuyarqan.
Kënöpis niyanmi: ajäparninmi.
Kënöpis niyanmi: rupay.
Kënöpis niyanmi: tsutsin.