Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Këchö Biblia | TRADUCCIÓN DEL NUEVO MUNDO DE LAS SANTAS ESCRITURAS

Hebrëus 4:1-16

IMAKUNA KANQAN

  • Diospa jamana junaqninman mana yëkïpita cuidakï (1-10)

  • Diospa jamana junaqninman yëkïpaq atikakï (11-13)

    • Diospa palabranqa kawaqmi (12)

  • Jesus, mas precisaq mandakoq kaq sacerdöti (14-16)

4  Tsëmi pëpa jamana junaqninchö jamanapaq änikï* jinallaraq këkaptinqa, mäkoq mäkoqlla** këkäshun, tsënöpa qamkunapita mëqëkikunapis mana lograqnö mana kayänëkipaq.  Porqui noqantsikpis pëkunanöllam alli willakïkunapita musyatsishqa karquntsik; peru pëkunataqa manam yanaparqantsu wiyayanqan palabrakuna, porqui wiyakoq kaqkunawanmi markäkïninkunachö* juknöllatsu kayarqan.  Porqui noqantsik, markäkunqantsikta rikätsikushqa kaqkunaqa, jamashunmi jamana junaqninchö, kikin kënö ninqannöpis: “Tsëmi piñakïnïchö* kënö nir jurarqä: ‘Pëkunaqa manam jamana junaqnïchö jamayanqatsu’”, tsënö kaptimpis, pëpa rurëninkunaqa patsachö nunakuna yurikur qallayanqampita patsënam ushashqana karqan.  Porqui qellqarëkaqpa juk lädunchömi pëqa qanchis kaq junaqpaq kënö nishqa: “Y Diosqa llapan rurëninkunapitam qanchis kaq junaqchö jamarqan”,  y yapëmi kënö nin: “Pëkunaqa manam jamana junaqnïchö jamayanqatsu”.  Tsëmi, wakinkuna tsëman yëkuyänan pishiptin, y alli willakïkunata puntata wiyaq kaqkuna mana wiyakuyanqanrëkur mana yëkushqa kayaptin,  juk junaqpaq yapë parlan, atska tiempu pasariptin David qellqanqan salmuchö “Kanan” nirnin; qepachö kënö ninqannöpis: “Kanan, qamkuna pë ninqanta wiyarqa, ama shonqïkikunata chukruyätsiyëtsu”.  Porqui sitsun juk jamana sitiuman pëkunata Josuë pushanman karqan, tsëqa manachi Diosqa juk junaqpaq parlanmantsu karqan.  Tsëmi Diospa markampaqqa kanraq juk jamana säbadu. 10  Porqui Diospa jamana junaqninchö jamaq nunaqa, jina kikimpis rurëninkunapitam jamashqa, rurëninkunapita Dios jamanqannölla. 11  Tsëqa, llapan puëdinqantsikta rurashun tsë jamë junaqchö jamanapaq, tsënöpa pëkunanö mana wiyakoq këman pipis mana ishkinampaq. 12  Porqui Diospa palabranqa kawaqmi, y alläpa poderyoqmi, y ishkan lädupa alli afilashqa espädapitapis mas fïlum, y juk nuna janapa imanö kanqanta y ruripa imanö kanqanta rakinqanyaq, y moqukunayaq y tullupa urusninyaqmi* yëkun, y shonqu imata pensanqanta y imata munanqantam musyatsikïta puëdin. 13  Y manam ni ima kamashqapis pëpa rikënimpita pakarëkaqqa kantsu, sinöqa cuentata qonapaq kaqpa rikëninchömi llapan imëkapis cläru y alërulla* këkan. 14  Tsëqa, ciëluman yëkushqa Diospa Tsurin Jesus mas precisaq mandakoq kaq sacerdötintsik këkaptinqa, pëman markäkunqantsikta* nunakuna jananchö musyatsikurnin imëpis këkäshun. 15  Porqui mandakoq kaq sacerdötintsikqa manam pishipanqantsikchö* ankupäkïta* mana yachaqtsu, sinöqa llapanchömi noqantsiknölla pruëbaman churashqa kashqa, peru jutsannaq. 16  Tsëqa, mana mantsakushpa mañakurnin alläpa alli këninta rikätsikoq Diospa gobernar täkunanman* witishun, tsënöpa precisaq tiempuchö yanapamänantsikpaq ankupäkïninta chaskinapaq y alläpa alli këninta tarinapaq.

Päginapa ura kuchunchö willakïkuna

Kënöpis niyanmi: awnikuy.
Kënöpis niyanmi: mayaq mayaqlla.
Griëgu idiömachöqa “mantsa mantsalla” ninmi.
Kënöpis niyanmi: yärakuyninkunachö.
Kënöpis niyanmi: ajanayninchö.
Kënöpis niyanmi: toqshunyaqmi.
Kënöpis niyanmi: alayri.
Kënöpis niyanmi: yärakunqantsikta.
Kënöpis niyanmi: dëbil kënintsikchö.
Kënöpis niyanmi: llakipäkuyta.
Kënöpis niyanmi: trönunman.