Llapan kanqanman ëwari

Qallananchö tïtulukunaman ëwë

Jehoväpa testïgunkuna

Idiömata akrë Quechua (Ancash)

Hëchus 8:1-40

  • Chikikoq y sufritsikoq Saulu (1-3)

  • Samariachö Diospita yachatsikunqanchö Felïpi alli yarqupukunqan (4-13)

  • Pëdruwan Juan Samariaman kachashqa kayanqan (14-17)

  • Simon santu espïrituta rantita munan (18-25)

  • Etiopïapita juk precisaq autoridäyoq nuna (26-40)

8  Peru Sauluqa allitanömi rikarqan Estëbanta wanutsiyanqanta. Tsë junaqpita patsëmi Jerusalenchö këkaq creikoqkunapa* contran sharkurnin chikir y sufritsir qallëkuyarqan; y Jesusman llapan creikoqkunam Judëa provinciapa y Samariapa markankunaman y estanciankunaman witsikätsishqa kayarqan, peru apostolkunallam manaqa.  Peru Diosta sirweq nunakunam Estëbanta pampayänampaq apakuyarqan, y alläpam pëpaq waqayarqan.  Tsënö kaptimpis, Sauluqa creikoqkunata* ushakätsita tïrarmi qallëkurqan. Pëqa wayin wayinmi ëwaq y mälas* yëkïkurmi ollqutapis warmitapis qarachëpa jorqamoq, y carcelman llawiyänampaqmi* entreguëkoq.  Tsënö kaptimpis, witsikätsishqa kaqkunaqa Diospa palabrampita alli willakïkunata willakurmi më tsëman ëwayaq.  Tsënam, Samaria markaman* Felïpi urarqan, y tsëchömi Cristupita willakur qallëkurqan.  Mëtsikaq nunakunam llapankuna juknölla Felïpi yachatsikunqankunata alkäbu wiyakuyaq, y señalkunata ruranqantam rikäyaq.  Porqui mëtsikaq nunakunam mana alli espïritukunayoq kayaq, y tsë espïritukunam sinchipa qaparir yarquyaq. Jinamampis, mëtsikaq kuyukïta mana puëdeqkuna y cöjukunam kachakätsishqa kayarqan.  Tsëmi tsë markachö nunakunaqa alläpa kushishqa kayarqan.  Jina tsë markachömi juk nuna karqan Simon jutiyoq, y tsë tiempuyaqmi pëqa magiata rurarnin kashqa karqan, y Samaria nacionchö llapan nunakunatam espantashqata katseq, puëdeq kanqanta nir. 10  Pëkunam llapankuna, mana precisaq kaqpita qallëkur hasta precisaq kaqyaq alkäbu wiyakuyaq y kënö niyaq: “Kë nunaqa Diospa Jatun nir reqiyanqan poderninmi”. 11  Tsëmi pëta alli wiyakuyaq, porqui magiata rurarmi mëtsika tiempupa pëkunata espantashqata katsishqa karqan. 12  Peru Diospa Gobiernumpita y Jesucristupa jutimpita alli willakïkunata Felïpi willakunqanta creirirqa, ollqupis warmipis bautizakurmi qallëkuyarqan. 13  Kikin Simonpis creikoqmi tikrarirqan, y bautizakurirmi, Felïpita yanaqar sïguirqan; y señalkunata y milagrukunata* ruranqanta rikarmi alläpa espantakoq. 14  Tsënam, Diospa palabranta Samariachö chaskikïkäyanqanta Jerusalenchö këkaq apostolkuna wiyarir, Pëdrutawan Juanta pëkuna kaqman kachayarqan; 15  y pëkunam uräyarqan y santu espïrituta chaskiyänampaqmi mañakuyarqan. 16  Porqui pëkunaqa manaran ni mëqampis santu espïrituta chaskishqaraqtsu kayarqan, sinöqa Señor Jesuspa jutinchö bautizashqallaran kayarqan. 17  Tsëmi pëkunaman makinkunata churayarqan,* y pëkunanam, santu espïrituta chaskir qallëkuyarqan. 18  Tsënam, apostolkuna makinkunata churayaptin* santu espïrituta chaskiyanqanta rikärir, Simonqa apostolkunata qellëta qoyta munarqan, 19  kënö nir: “Noqatapis tsë autoridäta qoyämë, tsënöpa pimampis makïta churaptï* santu espïrituta chaskinampaq”. 20  Peru Pëdruqa kënömi nirqan: “Qellënikiwan juntu ushakë, porqui Diospa debaldilla qarënintam qellëwan tarita pensarqunki. 21  Qampaqa manam ni imëki ni ima rurëniki kë asuntuchö kapushunkitsu, porqui Diospa rikënimpaqqa manam allitsu shonqïki. 22  Tsëmi, kë mana alli rurënikipita arrepentikï, y llapan shonqïkiwan Jehoväta* rogakï, puëdikaptinqa, shonqïkichö mana alli rurëta munanqëkipita perdonëkushunëkipaq; 23  porqui asqaq* venënu y mana alli rurëkunapa sirweqnin kanqëkitam rikä”. 24  Tsëta contestarnam Simonqa pëkunata kënö nirqan: “Qamkuna llapan shonqïkikunawan Jehoväta* noqapaq rogakïkalläyämï, tsënöpa tsë llapan niyämanqëkikuna janäman mana shamunampaq”. 25  Tsëmi, chipyëpa musyatsikurir y Jehoväpa palabrampita willakurir, Jerusalenta kutir qallëkuyarqan, y Samaria nunakunapa mëtsika caserïunkunachö alli willakïkunata willakurmi kutiyarqan. 26  Tsënö kaptimpis, Jehoväpa* angelninmi Felïpita parlaparqan, y kënömi nirqan: “Sharkï y ura kaq lädupa* ëwë, Jerusalenpita Gäza markaman uraq näniman”. (Tsëqa mana imapis kanan sitiupa pasaq nänim.) 27  Tsënam pëqa sharkurqan y ëwarqan, y ¡rikë!, Etiopïapita juk precisaq autoridäyoq nunatam rikärirqan, pëqa Etiopïata gobernaq warmipa* makinchömi autoridäyoq kaq, y llapan fortünankunatam rikaq. Pëqa Jerusalenmanmi Diosta adoraq ëwashqa karqan. 28  Y nacionninmanmi kutikarqan, y carrëtanchö tëkarmi Diospa willakoqnin* Isaïas qellqanqanta sinchipa leyikarqan. 29  Tsënam Felïpita santu espïritu kënö nirqan: “Ëwë, y tsë carrëtata taripë”. 30  Felïpinam tsë carrëtapa lädunta ëqirqan,* y Diospa willakoqnin Isaïas qellqanqanta leyikaqtam wiyarirqan, y kënömi nirqan: “¿Käyinkiku* llapan leyikanqëkita?”. 31  Pënam kënö nirqan: “Rasumpa kaqchöqa, ¿imanöraq käyïman pipis mana käyitsimaptinqa?”. Nïkurnam Felïpita rogarqan carrëtanman lloqanampaq y pëwan täkurinampaq. 32  Sinchipa leyikanqan Diospa Palabranqa këmi karqan: “Imëka üshanömi wanutsishqa kanampaq apashqa karqan; y millwanta rutuyaptin upälla wiyaräkoq achkasnömi* pëqa shiminta kichantsu. 33  Allqutsarmi katsiyarqan y manam pëpaq justicia karqantsu. ¿Piraq parlanqa ima mirëpita kanqampaq? Porqui kawënintam patsapita ushakäratsiyan”. 34  Tsënam tsë precisaq autoridäyoq nunaqa Felïpita kënö tapurqan: “Rogakullaqmi: ¿pipaqtaq Diospa willakoqnin tsënö nin? ¿Kikimpaqku o juk nunapaqku?”. 35  Felïpinam parlar qallëkurqan, y tsënö qellqarëkanqampita qallëkurmi, Jesuspita alli willakïkunata willarqan. 36  Tsënam, nänipa ëwarëkarnin mëtsika yaku këkaqman chäriyarqan, tsënam tsë precisaq autoridäyoq nunaqa kënö nirqan: “¡Rikë! Këchömi yaku kan; ¿imataq michäkun bautizashqa kanäta?”. 37  *—— 38  Tsëpitanam, carrëtata päratsinampaq mandakurqan, y tsë precisaq autoridäyoq nuna y Felïpim yakuman yarpuriyarqan, y pëmi bautizarirqan. 39  Yakupita witsärayämuptinnam, Jehoväpa* santu espïritunqa jinan höra Felïpita juk sitiuman pusharqan, y tsë precisaq autoridäyoq nunaqa mananam masqa pëta rikarqannatsu, peru alläpa kushishqam nänimpa ëwakurqan. 40  Tsënö kaptimpis, Felïpiqa Asdod markamanmi ëwarqan, y tsë ëwëpa* pasarmi Cesarëaman chanqanyaq llapan markakunachö alli willakïkunata willakurqan.

Päginapa ura kuchunchö willakïkuna

Griëgu idiömachöqa “congregacionpa” ninmi. Rikäri “Käyitsikïkuna” nishqanta.
Griëgu idiömachöqa “congregacionta” ninmi. Rikäri “Käyitsikïkuna” nishqanta.
Kënöpis niyanmi: amälas.
Kënöpis niyanmi: qaykuyänampaqmi.
O, itsapis: “Samariapa juk markanman”.
Griëgu idiömachöqa “espantakïpaq rurëkunata” ninmi.
Rikäri “Käyitsikïkuna” nishqanta.
Rikäri “Käyitsikïkuna” nishqanta.
Rikäri “Käyitsikïkuna” nishqanta.
Rikäri “Käyitsikïkuna” nishqanta.
Kënöpis niyanmi: ayaq.
Rikäri “Käyitsikïkuna” nishqanta.
Rikäri “Käyitsikïkuna” nishqanta.
O: “sur kaq lädupa”.
Griëgu idiömachöqa “Candäcipa” ninmi. Tsënöqa reqiyaq Etiopïata gobernaq reinakunatam.
Griëgu idiömachöqa “profëta” ninmi. Rikäri “Käyitsikïkuna” nishqanta.
Kënöpis niyanmi: cörrirqan.
Kënöpis niyanmi: entiendinkiku.
Kënöpis niyanmi: ashkashnömi.
Kë versïculuqa manam yurintsu wakin unë qellqashqakunachöqa, y clärum këkan Dios qellqatsinqankunachö mana këkanqanqa.
Rikäri “Käyitsikïkuna” nishqanta.
Kënöpis niyanmi: kinraypa.