Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Këchö Biblia | TRADUCCIÓN DEL NUEVO MUNDO DE LAS SANTAS ESCRITURAS

Hëchus 27:1-44

IMAKUNA KANQAN

  • Römata barcuwan Pablu ëwan (1-12)

  • Alläpa vientu barcuta wakman këman apëkachan (13-38)

  • Barcu ushakan (39-44)

27  Tsënam, Italiaman barcuwan ëwayänäpaq decidishqa kaptin, Pabluta y juk prësukunata tröpakuna mandaq Juliu jutiyoqta entregayarqan, pëqa Augustu nishqan tröpapitam karqan.  Y Asia provinciapa lamar kuchun ëwëkunachö* këkaq puertukunaman yarqunampaqna këkaq Adramitiu markapita barcuman lloqarkurmi, ëwar qallëkuyarqä; Macedoniachö këkaq Tesalönicapita Aristarcum noqakunawan këkarqan.  Waränin junaqmi Sidon markaman chäriyarqä, y Juliuqa alläpa allim* Pabluta tratarqan, y amïgunkunaman ëwananta y pëkuna atiendiyänantam jaqirqan.  Y tsëpita barcuwan ëwarmi, conträkunachö vientu kaptin, vientupita Chipri isla* tsapäyämanqan lädupa ëwayarqä.  Y lamar chowpimpa ëwarmi Ciliciapa y Panfiliapa frentimpa pasayarqä, y Liciachö këkaq Mïra nishqan markachömi pärariyarqä.  Tsëchömi tröpakunata mandaqqa Italiaman ëwaq Alejandrïa markapita barcuta tarimurqan, y tsëmanmi lloqatsiyämarqan.  Tsënam, atska junaqkunana kuyïllapa ëwarir, alläpa sasataraq Cnidu markaman chäriyarqä. Y avanzayänäta vientu mana jaqiyämaptinmi, Salmöni kuchumpa pasar vientupita Crëta isla* tsapäyämanqan lädupa pasayarqä.  Y lamar kuchunllapa alläpa sasata ëwarmi, Shumaq Puertukuna nishqan sitiuman chäriyarqä, tsëqa Lasëa markapa amänunchömi këkarqan.  Atska tiempunam pasarishqa karqan, y barcuwan viajëqa alläpa peligrösunam tikrakurishqa karqan, porqui Jutsapita Pagakuyänan Junaqchö ayunëpis* pasashqanam karqan, tsëmi Pabluqa kënö consejarqan 10  pëkunata: “Ollqukuna, cuentatam qokü kë viäjiqa desgraciachö ushanampaq kaqta y alläpata oqrapakunapaq kaqta, manam cargatawan barcullatatsu oqrashun, sinöqa kawënintsiktawanmi”.* 11  Tsënö kaptimpis, tröpakunata mandaqqa barcu manejaqta y barcupa duëñuntam Pablu ninqampitapis mas cäsurqan. 12  Peru tamya witsanta tsë puertuchö pasayänäpaq mana alli kaptinmi, viajar sïguiyänäpaq cäsi llapankuna niyarqan y imëkanöpapis Fenïce sitiuman chëkur, tsëchö tamya witsanta pasayänäpaq, tsëqa Crëta islapa* puertunmi karqan, y ishkë lädupa yëkunayoqmi karqan, jukninmi inti (rupay) yarqamunan lädupa itsoqnin kaqmampa karqan, y jukninnam inti yarqamunan lädupa derëchan kaqmampa. 13  Ura kaq lädupita shamoq vientu shumaqllapa vientuptinmi, munayanqannö rurakänampaq kaqta pensayarqan, tsëmi barcu ëwakunanta tsaraqkunata* sutayarqan y lamar kuchunllapa Crëta lädumpa barcuta avanzatsir qallëkuyarqan. 14  Peru tsëpita wallka tiempullatam, euroaquilon* niyanqan shukukï vientu feyupa vientur qallëkurqan. 15  Y alläpa vienturnin barcuta chipyëpa apakuptin y vientupa contran ëwëta mana puëdiptinmi, ni imatapis rurëta manana puëdir, vientu apayämanqampa ëwakuyarqä. 16  Tsëpitanam, vientupita tsapäyämanqan Cauda nishqan taksha isla* lädumpa ëwayarqä, peru tsënö karpis, alläpa sasataran barcupa qepanchö apayanqan bötita* salvayarqä. 17  Peru barcuman lloqarkatsirnam, waskakunawan barcuta pachampa watayarqan, y Sirti nir reqiyanqan lamar rurinchö qoturaq aqushakunaman* yakakëta mantsarmi, mas jatun kaq tolduta urätsir ichikyätsiyänampaq waskankunata sutayarqan, y vientu apanqampam barcu ëwarqan. 18  Peru alläpa feyupa vientur barcuta wakman këman kuyutsiptinmi, waränin junaqqa barcuta ankashyätsir qallëkuyarqan. 19  Y kima* kaq junaqchönam, barcupa toldumpa tsaraqninkunata kikinkuna yakuman jitarpuyarqan. 20  Atska junaqkunapa ni inti* ni qoyllurkuna mana rikakuptin, y vientuntin feyu tamya barcuta wakman këman apëkachaptinmi, manana salvakuyänäpaq kaqta pensayarqä. 21  Atska tiempupana ni imatapis mana mikuyashqa kayaptinmi Pabluqa pëkunapa chowpinkunaman sharkur kënö nirqan: “Ollqukuna, allim kanman karqan consejayanqaqta wiyakushqa kayaptiki y Crëta islapita* barcuta mana yarqatsimushqa kayaptikiqa, tsëqa manam ni kë desgraciaman ni oqrapakïman chäyankimantsu karqan. 22  Tsënö kaptimpis, kananqa kallpata tsariyänëkipaqmi niyaq, porqui manam ni pipis* wanunqatsu, sinöqa barcullam ushakanqa. 23  Kanan paqasmi adoranqä y sirwinqä Diospa angelnin yuripumashqa, y lädüman shëkamurmi 24  kënö nimashqa: ‘Ama mantsakëtsu Pablu. Römata gobernaqpa nöpanchömi shäränëki, y, ¡rikë!, Diosmi barcuchö qamwan ëwëkaqkunapa kawëninkunata salvanqa’. 25  Tsëqa, kallpata tsariyë ollqukuna, porqui creïmi Dios nimanqannö kanampaq kaqta. 26  Tsënö kaptimpis, lamarmi më islaman* karpis jitaramäshun”. 27  Tsënam, chunka chusku (14) kaq paqas chäramuptin, Adria nishqan lamarchö wakman këman apashqa këkäyaptï, barcuchö trabajaqkuna pullan paqas höra tantiyar qallëkuyarqan më patsamampis chëkäyanqäta. 28  Patsa më rurichö këkanqanta medirmi, ishkë chunka (20) brazäda* medinqanta rikäyarqan, tsëmi barcuwan ichik maslla avanzarir, yapë mediyarqan, y chunka pitsqa (15) brazäda* medinqantam rikäyarqan, 29  Y lamar rurinchö qaqakunawan trancakäyänäta mantsarmi, barcu ëwakunanta tsaraqkunata* barcupa sikin kaqpita chuskuta jitayarqan, y patsa warärinantam alläpa munëkuyarqan. 30  Peru barcuchö trabajaqkuna escapakïta* tïrarnin barcu ëwakunanta tsaraqkunata* barcupa senqan kaqpita sutayänampaq neqnölla bötita lamarman bajëkätsiyaptinmi, 31  tröpakunata mandaqta y soldädukunata Pablu kënö nirqan: “Kë nunakuna barcuchö mana quedakuyaptinqa, manam qamkunaqa salvakïta puëdiyankitsu”. 32  Tsënam soldädukunaqa bötipa waskankunata roquriyarqan, y lamarman jeqananta jaqiriyarqan. 33  Tsënam, patsa waränampaq ichikllana pishikaptin, Pabluqa llapankunata nirqan mikïta mikuyänampaq, kënö nirnin: “Kananwanqa chunka chusku (14) junaqkunanam qamkunaqa alläpa shuyararnin y ni imallatapis mana mikurnin kayarqunki. 34  Tsëmi imallatapis mikuriyänëkipaq niyaq, y qamkunapa biennikikunapaqmi tsëtaqa niyaq, porqui qamkunaqa manam ni juk aqtsallatapis oqrayankitsu”. 35  Tsëta nirirmi, juk tantata tsarirkurqan, llapankunapa nöpankunachö Diosta agradecikurirqan, pakirirqan, y mikur qallëkurqan. 36  Tsëmi llapankuna kushikuyarqan y imallatapis kanqampita mikur qallëkuyarqan. 37  Tsë barcuchöqa ishkë pachak qanchis chunka joqta (276) nunakunam* llapäkuna kayarqä. 38  Llapankuna pacha junta mikurirnam, trïguta lamarman jitar barcuta ankashyätsiyarqan. 39  Patsa waräriptinnam, më sitiu kanqanta musyayarqantsu, peru lamar kuchumpa bunlirëkaq* yakuta y arëna pampatam rikäriyarqan, y puëdirqa, tsëman barcuta chätsiyänampaqmi churapakäyarqan.* 40  Tsëmi pëkunaqa barcu ëwakunanta tsaraqkunapa* waskankunata roquriyarqan y lamarman jeqayänanta jaqiriyarqan, jina päla timonkunata tsaraq waskakunatam paskariyarqan; nïkurmi barcupa senqan kaqchö ichikllan tolduta pallariyarqan, y lamar kuchun arënamanmi barcu ëwar qallëkurqan. 41  Ishkan lädumpa lamar yaku chaq qoturaq arënamanmi barcu yakakärirqan, y barcupa senqanmi arënaman jawikärirqan y kuyïta puëdirqannatsu, peru lamar alläpa sinchipa laqcheqsaptinmi barcupa sikin kaq ushakar qallëkurqan. 42  Tsënam soldädukunaqa prësukunata wanutsiyänampaq decidiyarqan, tsënöpa ni mëqampis nadar mana escapakuyänampaq.* 43  Peru tröpakunata mandaqqa Pablu salvakunampaqmi churapakashqa karqan, tsëmi soldädukunata tsëta rurayänanta micharqan. Pëmi mandakurqan nadëta puëdeq kaqkunaqa lamarman pintiyänampaq,* y patsaman puntata chäyänampaq, 44  y wakin kaqkunapis qepankunata ëwayänampaq, wakinkuna tablakunachö y wakinkunana barcupa pakipinkunachö. Tsënömi llapankuna patsaman char salvakuyarqan.

Päginapa ura kuchunchö willakïkuna

Kënöpis niyanmi: kinraykunachö.
O: “alli nuna këninwanmi”.
Rikäri “Käyitsikïkuna” nishqanta.
Rikäri “Käyitsikïkuna” nishqanta.
Tsëqa, Tisri nishqan killam karqan, tsë witsanmi tamya qallaq y lamarkuna alläpa laqcheqsaq.
O: “almantsiktawanmi”. Rikäri “Käyitsikïkuna” nishqanta.
Rikäri “Käyitsikïkuna” nishqanta.
O: “anclakunata”.
Juk parlakïchöqa, inti yarqamunampa itsoq kaq lädumpita shamoq vientu.
Rikäri “Käyitsikïkuna” nishqanta.
Tsëtaqa inshiyaq barcu hundiptin tsëwan salvakuyänampaqmi.
Kënöpis niyanmi: arënakunaman.
Kënöpis niyanmi: kimsa.
Kënöpis niyanmi: rupay.
Rikäri “Käyitsikïkuna” nishqanta.
O: “ni juk almapis”. Rikäri “Käyitsikïkuna” nishqanchö “Alma” neqta.
Rikäri “Käyitsikïkuna” nishqanta.
Kima chunka joqta (36) metrunö.
Ishkë chunka qanchis (27) metrunö.
O: “anclakunata”.
Kënöpis niyanmi: qeshpïta; safakïta.
O: “anclakunata”.
O: “almakunam”. Rikäri “Käyitsikïkuna” nishqanta.
Kënöpis niyanmi: qocharëkaq.
Kënöpis niyanmi: churakäyarqan.
O: “anclakunapa”.
Kënöpis niyanmi: qeshpiyänampaq; safakuyänampaq.
Kënöpis niyanmi: saltayänampaq.