Llapan kanqanman ëwari

Qallananchö tïtulukunaman ëwë

Jehoväpa testïgunkuna

Idiömata akrë Quechua (Ancash)

Hëchus 26:1-32

  • Agrïpapa nöpanchö Pablu defendikun (1-11)

  • Pablu willakun creikoq imanö tikranqanta (12-23)

  • Festuwan Agrïpa contestayanqan (24-32)

26  Agrïpam Pabluta kënö nirqan: “Puëdinkim defendikurnin parlakaramïta”. Tsënam Pabluqa makinta pallarkur kënö defendikur qallëkurqan:  “Alläpam kushikü rey Agrïpa, judïukuna llapan acusayämanqampita kanan junaq qampa nöpëkichö defendikur parlanäpaq kaqpita,  masqa judïukunapa costumbrinkunata y ima asuntukunachö contranakuyanqanta alleq reqiptiki. Tsëmi pacienciawan wiyaramänëkipaq rogakoq.  Rasumpa kaqchöqa, marka* mayïkunapa rikëninchö y Jerusalenchö jövin kanqäpita imanö kawanqätaqa llapan judïukunam musyayan,  unëpitana llapan reqiyämaq kaqkuna, tsënö kanqanta musyatsikïta munayaptinqa, noqaqa Diosta adoranqantsikchö ley imanö cumplikänampaq kaqta wakinkunapitapis mas precisaqpaq churaq sectachömi* fariseunö kawarqä.  Peru kananqa unë kastantsikkunata Dios äninqanta* shuyäkunqäpitam juiciuchö këkä;  tsë änikï cumplikänanta rikëta shuyarmi chunka ishkë (12) kastantsikkunapis paqasta junaqta Diosta sirwikäyan. Tsë änikïta shuyäkunqäpitam judïukunaqa acusayäman Reyllä.  ¿Imanirtaq qamkunaqa mana creipaqtanö rikäyanki* wanushqakunata Dios sharkatsimunampaq kaqta?  Noqaqa chipyëpam següru karqä Nazaretpita Jesuspa jutimpa contran imëkata ruranä precisanqanta. 10  Tsaq tsëtam Jerusalenchö rurarqä, y mëtsikaq santu nunakunatam carcelkunaman llawitsirqä,* porqui precisaq sacerdötikunapitam tsë autoridäta chaskishqa karqä; y pëkunata wanutsiyänan kaptinqa, pëkunapa contran karmi allitanö tsë rurëta rikarqä. 11  Diosta adorayänan wayikunachöpis llapanchömi kutin kutin castigar markäkïninkunata* jaqiyänampaq obligarqä; y pëkunawan chipyëpa piñashqa* karmi, hasta juk markakunachöpis chikir qatikacharqä. 12  Precisaq sacerdötikunapita chaskinqä mandakïwan y autoridäwan tsëkunata rurar Damascu markaman viajëkarmi, 13  pullan junaq këkaptin nänichö rikëkurqä, Reyllä, noqapa y noqawan viajëkaqkunapa jiruroqnïkunachö* ciëlupita patsë aktsi chipapëkamoqta, y chipapëninqa inti* chipapanqampitapis masmi karqan. 14  Y llapäkuna patsaman ishkiriyashqächömi, hebreu idiömachö kënö nimaqta wiyarqä: ‘Saulu, Saulu, ¿imanirtaq chikimar qatikachëkämanki? Kikikim mana allita rurakïkanki tuksikoq puntayoq shukshuta** jëtar’. 15  Peru noqaqa, ‘¿pitaq kanki Teytë?’ nirqämi. Y Señornam kënö nimarqan: ‘Noqaqa chikir qatikachëkanqëki Jesusmi kä. 16  Peru sharkï. Qamtaqa yuripurqoq sirwimaqnï kanëkipaq y rikanqëkikunapita y rikätsinaqpaq kaqkunapita willakoq testïgu kanëkipaq akranaqpaqmi. 17  Y kë marka nunakunapita y juk nacion nunakunapitam librashqëki, pëkunamanqa kachëkaq 18  nawinkunata kichanëkipaq, ampipita* aktsiman y Satanaspa autoridänimpita Diosman kutitsinëkipaqmi, tsënöpa jutsankunapita perdonashqa kayänampaq y noqaman markäkur santuyätsishqakunapaq* kaq herenciata chaskiyänampaq’. 19  Tsëmi, rey Agrïpa, suëñïnïchönö rikanqäta* mana wiyakoqqa karqötsu, 20  tsëpa rantinqa, puntata Damascu markapita kaqkunaman, tsëpitana Jerusalenpita kaqkunaman, entëru Judëa provinciaman y juk nacionkunamanmi arrepentikur Diosman kutiyänampaq, y arrepentikushqa kayanqanta rurëninkunawan rikätsikuyänampaq willakïta apëkarqä. 21  Tsërëkurmi judïukunaqa templuchö tsariyämarqan y wanutsimëta tïrayarqan. 22  Tsënö kaptimpis, Diospita shamoq yanapakïta rikashqa karmi, precisaqtapis y mana precisaqtapis kanan junaqyaq alli willakïkunata musyatsir këkä, y manam imatapis juk asuntutaqa nikätsu, sinöqa rurakänampaq kaqta Diospa Willakoqninkuna Qellqayanqanchö ninqanta y Moisespis willakunqanllatam, 23  Cristu sufrinampaq kaqta, y wanushqakunapita puntata kawareq kaq karnin, kë marka nunakunata y juk nacion nunakunata aktsipita musyatsinampaq kaqta”. 24  Tsënam, defendikurnin tsëkunata Pablu nikaptin, Festuqa sinchipa kënö nirqan: “¡Löcum tikrëkanki Pablu! Alläpa yachaq kënikim löcuyëkätsishunki!”. 25  Peru Pabluqa kënömi nirqan: “Manam löcutsu tikrëkä Alläpa Respetashqa Festu, sinöqa rasumpa kaqtam y alli juiciuwanmi parlëkä. 26  Rasumpa kaqchöqa, cläru parlapëkanqä reyqa allim musyan kë cösaskunapita; noqaqa segürum këkä kë cösaskunapita mana cuentata qokunqanqa ni jukllëllapis mana kanqanta, porqui këkunaqa manam ni mëqampis pakëllapa rurashqatsu kashqa. 27  ¿Creinkiku, rey Agrïpa, Diospa Willakoqninkuna Qellqayanqankunachö ninqanta? Noqaqa musyämi creinqëkita”. 28  Peru Agrïpaqa kënömi Pabluta nirqan: “Wallka tiempullachömi cristiänu kanäpaq creiratsimankiman”. 29  Tsënam Pabluqa kënö nirqan: “Diostam mañakü, wallka tiempuchö o atska tiempuchö karpis, qamllatsu, sinöqa kanan llapan wiyëkämaq kaqkunapis noqa kanqänö nuna kayänampaq, peru amalla kënö cadënakunawan prësushqaqa”. 30  Tsënam, rey sharkurirqan, y tsënöllam rurayarqan gobernador, Berenïci y pëkunawan tëkaq nunakunapis. 31  Peru ëwakïkarmi kënö ninakur qallëkuyarqan: “Kë nunaqa manam ni imatapis rurëkantsu wanutsishqa kanampaqnö o carcelchö cadenaränampaqnöqa”. 32  Tsënam Agrïpaqa Festuta kënö nirqan: “Kë nunaqa librim yarqurinman karqan Römata gobernaq asuntunta rikänampaq mana mañakushqa karqa”.

Päginapa ura kuchunchö willakïkuna

O: “nacion”.
Rikäri “Käyitsikïkuna” nishqanta.
Kënöpis niyanmi: awninqanta.
Griëgu idiömachöqa “juzgayanki” ninmi.
Kënöpis niyanmi: qaykutsirqä.
Kënöpis niyanmi: yärakuyninkunata.
Kënöpis niyanmi: ajashqa.
Kënöpis niyanmi: entëru kuchunkunachö.
Kënöpis niyanmi: rupay.
Kënöpis niyanmi: akishata.
Puntayoq shukshutaqa inshiyaq tsëwan tukshipar animalkunata qatiyänampaqmi.
Kënöpis niyanmi: tsakaypita; tutapëpita.
O: “Diospaq rakishqakunapaq”.
Kënöpis niyanmi: visionta.