Llapan kanqanman ëwari

Qallananchö tïtulukunaman ëwë

Jehoväpa testïgunkuna

Idiömata akrë Quechua (Ancash)

Hëchus 24:1-27

IMAKUNA KANQAN

  • Pabluta imakunapita acusayanqan (1-9)

  • Fëlixpa nöpanchö Pablu defendikun (10-21)

  • Pablupa asuntuta ishkë watapa jaqiriyan (22-27)

24  Pitsqa junaq pasariptinmi, wakin respetashqa nunakunawan y Tertulu jutiyoq abogäduwan mandakoq kaq sacerdöti Ananïas urarqan, y Pablupa contranmi asuntunkunata gobernadorman chätsiyarqan.  Qayariyaptinnam Tertuluqa acusar qallëkurqan, kënö nir: “Qamrëkurmi yamë këchö kushishqa kawakuyä, y alli pensëkur imëkatapis ruraptikim kë nacionchö imëka allikuna rurakashqa,  y alläpa agradecikurmi imëpis y më tsëchöpis tsëkunata cuentaman churayä, Alläpa Respetashqa Fëlix.  Peru tiempïkita manana qochita* munarmi, alli kënikichö raslla wiyarayämänëkipaq rogakullaq.  Porqui kë nunaqa imëka muyakoq qeshyanö* kanqanta y entëru patsachö llapan judïukunata gobiernupa contran churakätsinqantam musyayä, y Nazarënukuna nishqan sectachö* pushakoqmi pëqa.  Jina pëmi templuta rakchatëta* tïrarqan, tsëmi tsariyarqä.  *——  Kikiki tapuparnam kë llapan acusayanqäkuna rasumpa kanqanta musyarinki”.  Tsënam judïukunapis tsë ninqankuna rasumpa kanqanta nir intur ushayarqan. 10  Tsënam parlanampaq Pabluta gobernador peqanwan* sëñasta rurariptin, kënö nir contestarqan: “Kë nacionchö mëtsika watakunana juez kanqëkita alli musyarmi, defendikurnin mana mantsakushpa parlakaramushaq. 11  Kikiki musyëta puëdinqëkinöpis, manam chunka ishkë (12) junaqkunapita masqa pasashqaraqtsu Jerusalenman Diosta adoraq witsanqäpita; 12  y manam templuchö piwampis discutikaqtatsu, ni pipa contrampis nunakunata shärikätseqtatsu tariyämashqa, ni Diosta adorayänan wayikunachö, ni markachö. 13  Jina kanan höra acusëkäyämanqankuna rasumpa kanqantapis manam ni imanöpa rikätsikïta puëdiyantsu. 14  Peru këtam sï willareq, noqaqa pëkuna ‘secta’* nir reqiyanqanchö kawakuyanqanmannö kawarmi unë kastäkunapa Diosninta sirwikä, porqui Leychö y Diospa Willakoqninkuna Qellqayanqankunachö llapan këkaqkunamanmi crei. 15  Y kë nunakuna alläpa shuyakïkäyanqannöllam, noqapis alli kaqta ruraqkuna y mana allita ruraqkuna kawariyämunampaq kaqta Diosman markäkur shuyäkïkä. 16  Tsërëkurmi Diospa y nunakunapa rikëninchö alli* concienciayoq kanäpaq imëpis kallpachakü. 17  Tsëmi atska watakuna pasariptin, ankupäkur* qoyämanqan qarëkunata nacionnïpaq apamur y ofrendakunata ruranäpaq shamushqa kä. 18  Tsë asuntukunata rikëkaptïmi, Ley ninqannö limpiu këkaqta templuchö tariyämarqan, peru manam mëtsika nunakunawan këkaqtatsu ni nunakunata büllëkätseqtatsu. Peru Asia provinciapita wakin judïukunam tsëchö këkäyarqan, 19  y pëkunam kanan qampa nöpëkichö këkäyanman karqan imapitapis acusayämëta munarqa. 20  O manaqa këchö këkaqkuna niyämutsun Judïukunapa Precisaq Cortinchö shëkaptï ima mana allita noqachö tariyanqanta, 21  o itsapis pëkunapa chowpinchö shëkar sinchipa kënö nirinqäpita acusayäman: ‘¡Wanushqakuna kawariyämunampaq kaqman creinqäpitam nöpëkikunachö kanan juzgashqa këkä!’”. 22  Tsënö kaptimpis, Rasumpa Kaq Nänipita alleq musyaq Fëlixqa, juk kutipaqmi tsë asuntuta jaqirirqan, y kënömi nirqan: “Soldädukunapa comandantin Lisias urämuptinmi, kë asuntïkikunata altsamushaq”. 23  Y tröpakunata mandaqtam mandarqan prësurätsir sïguinampaq, peru wakin asuntukunachö libri kananta jaqiyänampaq, y amïgunkuna atiendiyänanta permitiyänampaq. 24  Tsëpita atska junaqkuna pasariptinnam Fëlixqa warmin Drusïlawan shamurqan, y warminqa judïam karqan, y Pablutam qayatsirqan, y Cristu Jesusman creikïpita parlanqankunatam wiyakurqan. 25  Peru alli kaqta rurëpaq, peqata* alli tsarëpaq y shamoq juiciupaq Pablu parlaptinmi, Fëlixqa alläpa mantsakarqan, y kënö nirqan: “Kananqa ëwakï, yapëchö tiempü kariptinnam qayaratsishqëki”. 26  Tsënöqa nirqan Pablu qellëta qonanta shuyararmi. Tsëmi mas seguïduraq qayatseq y pëwan parlaq. 27  Peru ishkë watakuna pasariptinqa, Fëlixpa rantinmi Porciu Festu gobernador këman yëkurirqan, y judïukunapa rikëninchö alli këta munarmi, Pabluta prësurëkaqta jaqirirqan.

Päginapa ura kuchunchö willakïkuna

Kënöpis niyanmi: qechuyta.
O: “nunakunata büllatseq”.
Rikäri “Käyitsikïkuna” nishqanta.
Kënöpis niyanmi: qanratayta.
Kë versïculuqa manam yurintsu wakin unë qellqashqakunachöqa, y clärum këkan Dios qellqatsinqankunachö mana këkanqanqa.
Kënöpis niyanmi: umanwan.
Rikäri “Käyitsikïkuna” nishqanta.
O: “culpannaq”.
Kënöpis niyanmi: llakipäkur.
Kënöpis niyanmi: umata.