Llapan kanqanman ëwari

Qallananchö tïtulukunaman ëwë

Jehoväpa testïgunkuna

Idiömata akrë Quechua (Ancash)

Hëchus 22:1-30

IMAKUNA KANQAN

  • Mëtsika nunakunachö Pablu defendikun (1-21)

  • Röma nuna kanqanta Pablu välitsin (22-29)

  • Judïukunapa Precisaq Cortimpita kaqkuna ëllukäyan (30)

22  “Ollqukuna, wawqikuna y teytakuna, kanan defendikur nimunäpaq kaqta wiyariyë”.  Tsënam, hebreu idiömachö pëkunata parlapanqanta wiyarir, masraq upällariyarqan, y pënam kënö nirqan:  “Noqaqa judïum kä, Ciliciachö këkaq Tarsu markachö yurikushqa, peru kë markachö estudiashqa, kikin Gamaliel yachatsinqan, unë awiluntsikkunapa Leynimpita alleq yachatsishqa, y kanan junaq qamkuna rikätsikïkäyanqëkinö llapan shonqüwan Diosta sirweq.  Noqaqa kë Rasumpa Kaq Nänichö kaqkunatam hasta wanutsishqa kayanqanyaq chikir qatikacharqä, ollqutapis y warmitapis watarnin y carcelkunaman llawitsirnin,*  y tsënö ruranqätaqa mandakoq kaq sacerdöti y ëllukaq* grüpuchö këkaq respetashqa nunakunapis musyatsikïta puëdiyanmi. Jina pëkunapitam cartakunata chaskirqä Damascu markachö këkaq wawqikunapaq, y tsëchö këkaqkunata cadenarkur Jerusalenman apamunäpaqmi ëwëkarqä, tsënöpa pëkuna castigashqa kayänampaq.  Peru viajëkaptï y Damascu markaman chëkaptïnam, pullan junaqnö këkaptin illaqpita chipyëpa chipapaq aktsi jiruroqnïchö* ciëlupita chipapëkamurqan,  y patsamanmi ishkirirqä, y kënö nimaqtam wiyarqä: ‘Saulu, Saulu, ¿imanirtaq chikir qatikachëkämanki?’.  Noqanam, ‘¿pitaq kanki Teytë?’ nir contestarqä. Pënam kënö nimarqan: ‘Noqaqa chikir qatikachëkanqëki Nazaretpita Jesusmi kä’.  Noqawan këkaq nunakunaqa tsë aktsita rikäyarqanmi, peru parlapämanqantaqa manam wiyayarqantsu. 10  Tsënam kënö nirqä: ‘¿Imatataq rurashaq Teytë?’. Señornam kënö nimarqan: ‘Sharkï, y Damascu markaman yëkï, tsëchömi llapan ruranëkipaq dispunishqa këkaqta willayäshunki’. 11  Peru tsë aktsi chipyëpa chipapëkamunqampita ni imatapis manana rikarmi, noqawan këkaqkuna makipita pushar apayämaptinllana Damascu markaman chärirqä. 12  Tsënam, Ley ninqanmannö Diosta sirweq y tsëchö täraq llapan judïukunachö alli parlashqa Ananïas jutiyoq nuna, 13  noqaman shamurqan, y lädüman shäkurirmi, kënö nimarqan: ‘¡Saulu, wawqi, yapë rikë!’. Y tsë höram ñukirkurqä* y pëta rikärirqä. 14  Jina kënömi nimarqan: ‘Unë kastantsikkunapa Diosninmi akrashurqunki munëninta musyanëkipaq, alli kaqta ruraqta rikänëkipaq, y shimin parlanqanta wiyanëkipaq, 15  porqui rikanqëkikunata y wiyanqëkikunata llapan nunakunata musyatsinëkipaqmi pëpa testïgun kanki. 16  Y kananqa, ¿imatataq shuyaranki? Sharkï y bautizakï, y pëpa jutinman qayakurnin jutsëkikunapita limpiu kë’. 17  Peru Jerusalenman kutiramur templuchö mañakïkaptïmi, suëñïnïchö këkaqnö tikrarirqä, 18  y rikëkaptïmi kënö nimarqan: ‘Apurë y Jerusalenpita ras yarqï, porqui manam noqapita musyatsikunqëkita chaskiyäshunkitsu’. 19  Y kënömi nirqä: ‘Teytë, pëkunaqa alleqmi musyayan qamman creikoqkunata prësutsir y Diosta adorayänan wayikunaman yëkïkur maqar kanqäta; 20  y testïguïki Estëbanpa yawarninta ramëkäyaptimpis,* tsëchömi shëkarqä, y allitanömi tsëta rurayanqanta rikarqä, y wanutseqninkunapa janan kaq röpankunata täparmi këkarqä’. 21  Peru tsënö këkaptimpis, kënömi nimarqan: ‘Ëwë, porqui noqaqa karu nacionkunamanmi kachashqëki’”. 22  Tsënam, tsënö nita ushanqanyaq wiyar kayarqan. Tsëpitanam sinchipa kënö niyarqan: “¡Tsë nunata patsapita juklla ushakäratsi, porqui manam kawanmantsu!”. 23  Qaparir qayarir,* y janan kaq röpankunata jitar, y allpata vientuman jitar kayaptinnam, 24  soldädukunapa comandantinqa soldädukunapa cuartelninman Pabluta apayänampaq mandakurqan, y astarnin declaratsiyänampaqmi nirqan, tsënöpa Pablupa contran imanir qaparir qayarir kayanqanta alleq musyanampaq. 25  Peru astayänampaq watashqata këkätsiyaptinmi, Pabluqa tsëchö shëkaq tröpa mandaqta kënö nirqan: “¿Alliku qamkunapaqqa manaraq condenashqa këkaptin* Röma nunata astë?”. 26  Tsëta wiyëkurnam tröpakunata mandaqqa soldädukunapa comandantin kaqman ëwarqan, y kënö nirnin willarqan: “¿Imata rurëtataq pensanki? Porqui kë nunaqa Röma nunam”. 27  Tsënam soldädukunapa comandantinqa pë kaqman witirqan y kënö nirqan: “Nimë, ¿Röma nunaku kanki?”. Pënam, “awmi” nirqan. 28  Soldädukunapa comandantinnam kënö contestarqan: “Noqaqa atska qellëtam pagakurqö Röma nunanö derëchuyoq kanäpaq”. Pablunam kënö nirqan: “Peru noqaqa tsëchö yurikushqa kanqäpitam Röma nuna kä”. 29  Tsënam sufritsir declaratsiyänampaq kaq nunakunaqa jinan höra pëpita witikuriyarqan; y soldädukunapa comandantinqa, Röma nuna kanqanta cuentata qokurir y cadenayänampaq mandakushqa karmi, mantsakarqan. 30  Tsënam waränin junaqqa judïukuna imapita acusëkäyanqanta alleq musyëta munar, librayänampaq mandakurqan, y precisaq sacerdötikuna y Judïukunapa Precisaq Cortimpita kaqkuna llapan ëllukäyänampaqmi* mandakurqan. Tsëpitanam Pabluta urätsirqan y pëkunapa chowpinkunaman shäratsirqan.

Päginapa ura kuchunchö willakïkuna

Kënöpis niyanmi: qaykutsirnin.
Kënöpis niyanmi: qorikaq.
Kënöpis niyanmi: entërüchö.
Kënöpis niyanmi: peqäta pallarkurqä.
Kënöpis niyanmi: jichaykäyaptimpis.
Kënöpis niyanmi: qayaykachar.
O: “manaraq juzgashqa këkaptin”.
Kënöpis niyanmi: qorikäyänampaqmi.