Llapan kanqanman ëwari

Qallananchö tïtulukunaman ëwë

Jehoväpa testïgunkuna

Idiömata akrë Quechua (Ancash)

Gälatas 2:1-21

  • Jerusalenchö apostolkunawan Pablu ëllukan (1-10)

  • Pëdruta (Cëfasta) Pablu cläru parlapan (11-14)

  • Alli kaqta ruraqnö rikashqa kë markäkïrëkurlla kanqan (15-21)

2  Tsëpitanam chunka chusku (14) watakuna pasariptin Bernabëwan Jerusalenta yapë witsarqä, jina Tïtutapis pusharqämi.  Juk revelacionta chaskishqa karmi witsarqä, y juk nacionkunachö alli willakïkunata willakïkanqätam pëkunata musyatsirqä. Peru tsëtaqa wallkaqlla ëllukäyanqächömi* musyatsikurqä, creikoqkunachö precisaqpaq churashqa nunakunallata, tsënöpa sagrädu rurëta rurëkanqä o rurashqa kanqä mana kaqllapaq mana kashqa kanqanta alleq musyanäpaq.  Tsënö kaptimpis, manam ni noqawan këkaq Tïtupis Grecia nuna këkarnin penqëninchö señalashqa* kanampaq obligashqatsu karqan.  Peru tsë asuntuqa yurimurqan, wawqi tukoqkuna creikoqkunaman yachëllapa yëkayämushqa kayaptinmi, pëkunaqa Cristu Jesuswan juknölla kënintsikchö libri kanqantsikpita musyapakurir leypa esclävunkunaman chipyëpa tikratsimänapaqmi mana mäkatsikushllapa yëkayämurqan;  peru manam pëkunata cäsuyarqätsu, ni ichikllapis,* tsënöpa rasumpa kaqpita alli willakïkuna qamkunachö sïguinampaq.  Peru precisaqnö kaqkunaqa —ima kayaptimpis manam ima qokamantsu, porqui Diosqa manam nunapa rikëninllatatsu cuentaman churan— awmi, precisaqpaq churashqa nunakunaqa manam ni imatapis mushoqtaqa niyämarqantsu.  Tsëpa rantinqa, imanöllam penqëninkunachö señalashqa* kaqkunata alli willakïkunata willanampaq Pëdru carguta chaskirqan, tsënölla noqapis penqëninkunachö mana señalashqa kaqkunata alli willakïkunata willanäpaq carguta chaskishqa kanqäta rikärir  —porqui penqëninkunachö señalashqakunapa* apostolnin kanampaq Pëdruta yachënin qoqmi, noqatapis tsë yachëta qomarqan juk nacion nunakunapa apostolnin kanäpaq—  y alläpa alli këninta Dios rikätsimashqa kanqanta cuentata qokurirmi, Santiägu, Cëfas* y Juan, creikoqkunachö columna cuentanö kaqkuna, llapäkunapis trabajaq mayi kayanqäta rikätsiyämarnin Bernabëtawan noqata makinkunata qoyämarqan, tsënöpa noqakuna juk nacion nunakunaman ëwayänäpaq, y pëkunana penqëninkunachö señalashqa* kaqkunaman ëwayänampaq. 10  Peru waktsakunata cuentaman churayänällapaqmi mañayämarqan, y noqaqa tsëta ruranäpaqmi llapan puëdinqämannö kallpachakurqö. 11  Tsënö kaptimpis, Antioquïachö Cëfas* këkaptinmi, qaqllanchö cläru parlaparqä, porqui llutanta rurëkanqanqa clärum* këkarqan. 12  Porqui Santiägu kaqpita shamoq nunakuna manaraq chäyämuptinqa, juk nacion nunakunawanmi mikoq; peru pëkuna chärayämuptinqa, mananam tsëta rurarqannatsu, sinöqa rakikäkurirqanmi, penqëninkunachö señalakïta* precisaqpaq churaqkunata mantsarnin. 13  Jina wakin kaq judïu nunakunapis pënöllam ishkë qaqlla tikrariyarqan, y tsëta rurarmi qallëkuyarqan, tsëmi hasta Bernabëpis ishkë qaqlla tikrarirqan y pëkunanölla rurar qallëkurqan. 14  Peru rasumpa kaqpita alli willakïkuna ninqanmannö mana rurëkäyaqta rikarmi, pëkunapa nöpanchö Cëfasta* kënö nirqä: “Qam, judïu këkarpis juk nacion nunakunanö kawëkar y judïukunanö mana kawëkarqa, ¿imanöraq juk nacion nunakunata obliguëta puëdinkiman judïukunapa costumbrinkunamannö kawayänampaq?”. 15  Noqantsikqa yurikïnintsikpita patsë judïu kar, y juk nacion nunakuna jutsayoq kayanqannö mana karmi, 16  alleq musyantsik ley ninqanta ruranqampitatsu nunaqa alli kaqta ruraqnö rikashqa kanqanta, sinöqa Jesucristuman markäkunqanrëkurlla.* Tsëmi noqantsikqa Cristu Jesusman markäkurquntsik, tsënöpa ley ninqankunata ruranqantsikrëkurtsu, sinöqa Cristuman markäkunqantsikrëkur alli kaqta ruraqnö rikashqa kanapaq, porqui manam pipis* ley ninqanta ruranqampitatsu alli kaqta ruraqnö rikashqa kanqa. 17  Peru sitsun Cristurëkur alli kaqta ruraqnö rikashqa këta procurëkashqa jukkuna noqantsiktapis jutsasapatanö rikämantsik, tsëqa, ¿jutsapa sirweqninku Cristu? ¡Tsëqa manam ni imanöpapis kanmantsu! 18  Porqui sitsun juk tiempuchö ushakätsinqäta yapë sharkatsishaq, tsëqa leyta mana wiyakoq kanqätam rikätsikü. 19  Porqui leyrëkurmi* leypaq wanurqö, tsënöpa Diospaq kawanäpaq. 20  Cristuwan juntum qeruchö clavarëkä. Kawëkaqqa mananam noqanatsu kä, sinöqa Cristum noqawan juntu kawëkan. Rasumpa kaqchöqa, Diospa Tsurinman markäkurmi* kananqa nunanö kawëkä, pëqa kuyamarqanmi y noqarëkurmi kawëninta qorqan. 21  Noqaqa manam juk kuchumantsu Diospa alläpa alli këninta churä, porqui sitsun pipis ley ninqanta ruranqanrëkur* alli kaqta ruraqnö rikashqa kanqa, tsëqa Cristu wanunqanqa envänum.

Päginapa ura kuchunchö willakïkuna

Kënöpis niyanmi: qorikäyanqanchömi.
Rikäri “Käyitsikïkuna” nishqanta.
Griëgu idiömachöqa “ni juk hörallapis” ninmi.
Rikäri “Käyitsikïkuna” nishqanta.
Rikäri “Käyitsikïkuna” nishqanta.
Pëdru jutiwampis reqiyaqmi.
Rikäri “Käyitsikïkuna” nishqanta.
Pëdru jutiwampis reqiyaqmi.
O: “condenashqam”.
Rikäri “Käyitsikïkuna” nishqanta.
Pëdru jutiwampis reqiyaqmi.
Kënöpis niyanmi: yärakushqa kanqanllapita.
Griëgu idiömachöqa “ni pï ëtsapis” ninmi.
Kënöpis niyanmi: leypa jananmi.
Kënöpis niyanmi: yärakurmi.
Kënöpis niyanmi: ruranqampita.