Llapan kanqanman ëwari

Qallananchö tïtulukunaman ëwë

Jehoväpa testïgunkuna

Idiömata akrë Quechua (Ancash)

2 Timoteu 1:1-18

  • Salüdukuna (1, 2)

  • Timoteupa markäkïninrëkur Diosta Pablu agradecikun (3-5)

  • Diospita chaskinqëki qarëta imëka ninatanö rawrëkaqta katsirnin sïgui (6-11)

  • Alli yachatsikïkunapita tsaripukurnin sïguï (12-14)

  • Pablupa chikeqninkuna y amïgunkuna (15-18)

1  Noqa Pablupita, Diospa munënimpita y Cristu Jesuspa qateqnin këpita tarina kawëpaq Diospa änikïninmannö* Cristu Jesuspa apostolnimpita,  Timoteupaq, kuyashqa tsurilläpaq: Teyta Diospa y Señornintsik Cristu Jesuspa alläpa alli kënin, ankupäkïnin* y yamë kënin qamchö këkätsun.  Diostam agradecikü —limpiu concienciawan y unë kastäkuna rurayanqannölla sirwinqä Diosta— paqasta junaqta rogakunqächö mana qonqëta qampaq yarpararnin.  Weqikita ramanqëkita* yarparmi rikënikita alläpa munä, tsënöpa kushikunäpaq.  Porqui yarpämi markäkïniki* janan shonqulla mana kanqanta, tsënö markäkïqa puntataqa awilëki Loidachö y mamëki Eunïcichömi karqan, peru segürum këkä tsënö markäkï qamchöpis kanqanta.  Tsërëkurmi yarpätseq, qamman makïta churamuptï* Diospita chaskinqëki qarëta, imëka ninatanö rawrëkaqta katsirnin sïguinëkipaq.  Porqui Diospa santu espïritunqa manam mantsallïshu shonqutatsu qomantsik, sinöqa poderta, kuyakïta y alli juiciutam.  Tsënö këkaptinqa, ama Señorpita musyatsikïta penqakïtsu, ni noqapita, përëkur prësurëkaqpita, tsëpa rantinqa, Diospa podernimpa yanapakïninwan alli willakïkunarëkur mana allikunata sufrinëkipaq listu këkë.  Pëmi salvamarqantsik y santu nunakuna kanapaq qayamarqantsik, manam rurënintsikrëkurtsu, sinöqa kikimpa munëninrëkur y alläpa alli këninrëkurmi. Tsëtaqa rikätsimarqantsik Cristu Jesusrëkur alläpa unë tiempukunapita patsëmi, 10  peru kananqa Salvamaqnintsik Cristu Jesus rikakunqanrëkurmi chipyëpa cläru rikakärishqa, pëmi wanïta ushakäratsishqa y alli willakïkunawanmi mana ushakaq kawëpita musyatsikushqa, 11  tsëkunarëkurmi yachatsikoq, apostol y maestru kanäpaq churashqa karqö. 12  Jina tsërëkurmi kë llapankunata sufrikä, peru manam penqakütsu. Porqui reqïmi creinqä Kaqta, y makinman churanqäta tsë junaqyaq pë cuidanampaq kaqtam markäkü.* 13  Parlapanqaq alli* yachatsikïkunapita tsaripukurnin* sïgui, y Jesuswan juknölla këpita shamoq markäkïta y kuyakïta rikätsikurnin sïgui. 14  Kë alläpa alli umpakïta* cuidë, noqantsikchö këkaq santu espïrituwan. 15  Qamqa këta musyankim, Asia provinciapita llapan nunakuna noqapita rakikäkuriyanqanta, jina Figëluwan Hermögenispis. 16  Onesïforupa wayinchö kaqkunata Señor ankupëkutsun,* porqui pëqa shonqütam imëpis ankashyätsimurqan y manam carcelchö cadenarëkanqäpita penqakurqantsu. 17  Tsëpa rantinqa, Römachö këkarqa, mana utishpam* ashimarqan y tarimarqanmi. 18  Señor yanapëkutsun tsë junaqchö Jehoväpa* ankupäkïninta* tarinampaq. Y qamqa alleqmi musyanki Ëfesuchö imëkanöpa yanapakunqanta.

Päginapa ura kuchunchö willakïkuna

Kënöpis niyanmi: awnikuyninmannö.
Kënöpis niyanmi: llakipäkuynin.
Kënöpis niyanmi: jichanqaykita.
Kënöpis niyanmi: yärakuyniki.
Rikäri “Käyitsikïkuna” nishqanta.
Kënöpis niyanmi: yärakö.
O: “sänu; yanapakoq”.
Kënöpis niyanmi: tsaripakurnin.
Kënöpis niyanmi: paytakuyta.
Kënöpis niyanmi: llakipaykutsun.
Kënöpis niyanmi: mana pishipaypam.
Diospa jutin Jehoväqa ishkë pachak kima chunka qanchis (237) kutim kë Bibliapa versïculunkunachö yurin, y këmi juk kaq. Rikäri “Käyitsikïkuna” nishqanta.
Kënöpis niyanmi: llakipäkuyninta.