Llapan kanqanman ëwari

Qallananchö tïtulukunaman ëwë

Jehoväpa testïgunkuna

Idiömata akrë Quechua (Ancash)

2 Juan 1:1-13

  • Salüdukuna (1-3)

  • Rasumpa kaqmannö kawëkäyë (4-6)

  • Engañakoqkunapita cuidakuyë (7-11)

    • Ni saludayëllapistsu (10, 11)

  • Watukakunampaq patsätsinqan y salüdukuna (12, 13)

 Creikoqkunata rikaqpita,* akrashqa señörapaq* y wamrankunapaq, rasumpa kuyanqä kaqkunapaq, y mana noqallatsu, sinöqa rasumpa kaqta llapan reqishqa kaqkunapis kuyayanqan kaqkunapaq,  noqantsikchö këkaq rasumpa kaqrëkur, y tsëqa noqantsikchömi imëyaqpis këkanqa.  Teyta Diospita y Teytapa Tsurin Jesucristupitam chaskishun alläpa alli këninta, ankupäkïninta* y yamë këta, jina rasumpa kaq yachatsikïta y kuyakïta.  Alläpam kushikü, porqui wakin wamrëkikuna rasumpa kaq nänichö purikäyanqantam musyarqö, Teytapita chaskinqantsik mandakï ninqanmannölla.  Tsëmi kananqa rogaq señöra, juknintsik juknintsik kuyanakunapaq. (Manam juk mushoq mandakïtatsu qamman qellqamü, sinöqa unëpitana katsinqantsik mandakïtam.)  Y këmi kuyakïqa: mandakïninkunamannö kawarnin sïgui. Qallanampita patsë qamkuna wiyayanqëkinöpis, tsë mandakïqa, kuyakïta rikätsikurnin sïguikäyänëkipaq kaqmi.  Porqui mëtsikaq engañakoqkunam nunakunachö yuriyashqa, pëkunaqa manam markäkuyantsu* Jesucristu nunanö shamunqanman. Pëkunam engañakoq kaq y anticristu kayan.  Cuidakuyë sinchi trabajarnin lograyanqäkunata mana oqrariyänëkipaq, tsëpa rantinqa qamkunapaq alistashqa kaq llapan bendicionkunata chaskiyänëkipaq.  Pipis puntäkureq kaq y Cristupa yachatsikïninchö mana tsarakoq kaqqa, manam Dioswan juknöllatsu këkan. Tsë yachatsikïchö tsarakoq kaqmi sïqa Teytawan juknölla këkan, jina Tsuriwampis. 10  Sitsun mëqampis qamkunaman shamunqa y tsë yachatsikïta mana apamunqatsu, tsëqa ama ni imëpis wayikikunaman chaskiyëtsu ni saludayëllapistsu. 11  Porqui pipis saludareq kaqqa alläpa mana alli rurëninkunamanmi qaqëkan. 12  Qamkunaman qellqamunäpaqqa imëkaran kan, peru manam munätsu tsëkunata papelman y tintawan qellqamïtaqa, sinöqa qamkunaman shamïta y kikikikunawan parlëtam shuyä, tsënöpa kushikïnikikuna chipyëpa kanampaq. 13  Akrashqa nanëkipa* wamrankunam qampaq salüdunkunata apatsiyämun.

Päginapa ura kuchunchö willakïkuna

O: “awkin nunapita”.
“Akrashqa señörapaq” nirqa itsa parlëkan juk warmipaq o punta cristiänukunapa tiempunchö juk sitiuchö creikoqkunapaq.
Kënöpis niyanmi: llakipäkuyninta.
Kënöpis niyanmi: yärakuyantsu.
Kënöpis niyanmi: ñañaykipa.